ജിദ്ദ – നുസുക് കാര്‍ഡില്ലാതെ ഹാജ് തീര്‍ഥാടകരെ പുണ്യസ്ഥലങ്ങളിലും വിശുദ്ധ ഹറമിലും പ്രവേശിക്കാന്‍ അനുവദിക്കില്ലെന്ന് ഹജ്, ഉംറ മന്ത്രി ഡോ. തൗഫീഖ് അല്‍റബീഅ പറഞ്ഞു. ജിദ്ദ സൂപ്പര്‍ഡോമില്‍ നടക്കുന്ന ഹജ് കോണ്‍ഫറന്‍സ് ആന്റ് എക്‌സിബിഷനില്‍ പങ്കെടുത്ത് സംസാരിക്കുകയായിരുന്നു മന്ത്രി.
തീര്‍ഥാടകരുടെ സുരക്ഷയും ക്ഷേമവും ഉറപ്പാക്കുന്നതിന് എല്ലാ മേഖലകളുമായും സഹകരിച്ച് പ്രവര്‍ത്തിക്കുന്ന സംവിധാനമാണ് നുസുക് കാര്‍ഡ്. ഉയര്‍ന്ന സുരക്ഷാ സവിശേഷതകളോടെയാണ് കാര്‍ഡ് രൂപകല്‍പ്പന ചെയ്തിരിക്കുന്നത്. രജിസ്റ്റര്‍ ചെയ്യാത്തവരില്‍ നിന്ന് രജിസ്റ്റര്‍ ചെയ്ത തീര്‍ഥാടകരെ തിരിച്ചറിയാന്‍ സഹായിക്കുന്ന നുസുക് കാര്‍ഡിന്റെ ഇലക്‌ട്രോണിക് കോപ്പി ലഭ്യമാണ്. ഹാജിമാരുടെ ആരോഗ്യപരമായ വിവരങ്ങളും മറ്റ് വിശദമായ വിവരങ്ങളും ഇതില്‍ അടങ്ങിയിരിക്കുന്നു. തീര്‍ഥാടകരുടെ ഡാറ്റ ആക്സസ് ചെയ്യാന്‍ സ്‌കാന്‍ ചെയ്യാന്‍ കഴിയുന്ന ഒരു ക്യു.ആര്‍ കോഡും നുസുക് കാര്‍ഡിലുണ്ട്.
തീര്‍ഥാടകരുടെ അവകാശങ്ങള്‍ ഉറപ്പാക്കാനുള്ള സൗദിയിലെ ഏറ്റവും വലിയ പ്ലാറ്റ്ഫോമുകളില്‍ ഒന്നാണ് നുസുക് മസാര്‍ പ്ലാറ്റ്ഫോം. കരാറുകളുമായി ബന്ധിപ്പിച്ചിട്ടുള്ള ഒരു എസ്‌ക്രോ അക്കൗണ്ടിലാണ് പണം അടക്കുന്നത്. ഇത് ഫണ്ട് കൈമാറ്റം ചെയ്യുന്നതിനു മുമ്പ് സേവനം ഉറപ്പാക്കുകയും സേവന ദാതാക്കള്‍ക്കും രാജ്യങ്ങള്‍ക്കും അപകടസാധ്യതകള്‍ കുറക്കുകയും ചെയ്യുന്നു.
ചരിത്രപരമായ സ്ഥലങ്ങളും അവിടങ്ങളിലെ സേവനങ്ങളും വികസിപ്പിച്ചുകൊണ്ട് തീര്‍ഥാടകരുടെ അനുഭവം സമ്പന്നമാക്കാന്‍ സൗദി അറേബ്യ പ്രതിജ്ഞാബദ്ധമാണ്. വിശിഷ്ടമായ ആത്മീയ അനുഭവം ഉറപ്പാക്കുന്നതിന് ഗൈഡുകളെയും സംയോജിത സേവനങ്ങളും ഏര്‍പ്പെടുത്തി വികസിപ്പിച്ച ചരിത്ര സ്ഥലങ്ങളുടെ എണ്ണം അഞ്ചു വര്‍ഷത്തിനുള്ളില്‍ 16 ല്‍ നിന്ന് 71 ആയി വര്‍ധിച്ചു. ലോകമെമ്പാടുമുള്ള മുസ്‌ലിംകളുടെ മക്കയിലേക്കും മദീനയിലേക്കുമുള്ള വരവ് സുഗമമാക്കാന്‍ തുടക്കം മുതല്‍ സൗദി അറേബ്യ ലക്ഷ്യമിടുന്നു. വിസ, ഗതാഗതം, താമസ സേവനങ്ങള്‍ എന്നിവ നല്‍കാനുള്ള നടപടിക്രമങ്ങളും സാങ്കേതികവിദ്യകളും വികസിപ്പിച്ചും പ്രവാചക പള്ളിയിലെ റൗദ ശരീഫ് പോലുള്ള പുണ്യസ്ഥലങ്ങളില്‍ പ്രവേശിക്കാനുള്ള അനുഭവം മെച്ചപ്പെടുത്തിയും ഈ ലക്ഷ്യം കൈവരിക്കാന്‍ ശ്രമിക്കുന്നു. 2022 ല്‍ ഏകദേശം 40 ലക്ഷം വിശ്വാസികളാണ് റൗദ ശരീഫ് സന്ദര്‍ശിച്ചത്. ഈ വര്‍ഷം റൗദ ശരീഫ് സന്ദര്‍ശകരുടെ എണ്ണം 1.4 കോടി മുതല്‍ 1.5 കോടി വരെയായി വര്‍ധിച്ചു. സാങ്കേതികവിദ്യയുടെ ഉപയോഗത്തിലൂടെയും മുന്‍കൂര്‍ ബുക്കിംഗിലൂടെയും റൗദ ശരീഫ് സന്ദര്‍ശകരുടെ സംതൃപ്തി നിരക്ക് 57 ശതമാനത്തില്‍ നിന്ന് 88 ശതമാനമായി ഉയര്‍ന്നു.
നേരത്തെ ഹജ് സേവന മേഖലയില്‍ ആറ് സ്ഥാപനങ്ങള്‍ മാത്രമാണ് ഉണ്ടായിരുന്നത്. ഹാജിമാര്‍ക്ക് മികച്ച സേവനങ്ങള്‍ നല്‍കാനായി ഈ മേഖലയില്‍ കൂടുതല്‍ കമ്പനികളെയും സ്ഥാപനങ്ങളെയും അനുവദിച്ചു. ഇപ്പോള്‍ നാല്‍പതോളം കമ്പനികള്‍ തീര്‍ഥാടകര്‍ക്ക് സേവനങ്ങള്‍ നല്‍കുന്നു. ഇത് സേവന നിലവാരവും തീര്‍ഥാടക സംതൃപ്തിയും വര്‍ധിപ്പിക്കുന്നു.
മത്സരത്തിനായുള്ള ഈ തുറന്ന സമീപനം അമുസ്‌ലിം രാജ്യങ്ങളിലേക്കും വ്യാപിച്ചിട്ടുണ്ട്. മുമ്പ് ഈ രാജ്യങ്ങളില്‍ നിന്ന് പ്രത്യേക ട്രാവല്‍ ഏജന്‍സികള്‍ വഴിയാണ് ഹജ് യാത്രകള്‍ കൈകാര്യം ചെയ്തിരുന്നത്. ഇത് തീര്‍ഥാടകരുടെ അവകാശങ്ങള്‍ സംരക്ഷിക്കുന്നതില്‍ വെല്ലുവിളികള്‍ ഉയര്‍ത്തിയിരുന്നു. ഇപ്പോള്‍ 127 രാജ്യങ്ങളിലെ തീര്‍ഥാടകര്‍ക്ക് ഇടനിലക്കാരില്ലാതെ സൗദിയിലെ സേവന ദാതാക്കളില്‍ നിന്ന് നേരിട്ട് ഹജ് സേവന പാക്കേജുകള്‍ വാങ്ങാന്‍ കഴിയും. ഇത് തീര്‍ഥാടകര്‍ക്ക് വൈവിധ്യമാര്‍ന്ന ഓപ്ഷനുകള്‍ വാഗ്ദാനം ചെയ്യുകയും ഇരു വിഭാഗങ്ങളുടെയും അവകാശങ്ങള്‍ സംരക്ഷിക്കുകയും ചെയ്യുന്നു.
അന്താരാഷ്ട്ര പങ്കാളികളുമായും ഹജ്, ഉംറ ടൂര്‍ ഓപ്പറേറ്റര്‍മാരുമായും രാജ്യം സഹകരിക്കുന്നുണ്ട്. ഈ വര്‍ഷം ഇതുവരെ വിവിധ രാജ്യങ്ങളുമായി ഏകദേശം 80 ഹജ് കരാറുകള്‍ ഒപ്പുവച്ചിട്ടുണ്ട്. ഉംറ യാത്രകള്‍ സംഘടിപ്പിക്കാനായി പ്രതിവര്‍ഷം 3,000 ലേറെ കരാറുകള്‍ ഒപ്പുവെക്കുന്നു. സൗദിയില്‍ ലഭ്യമായ സേവനങ്ങളെ കുറിച്ച് വിദേശ കമ്പനികളെ പരിചയപ്പെടുത്താനും നടപടിക്രമങ്ങള്‍ വേഗത്തിലാക്കാനുമായി അന്താരാഷ്ട്ര പ്രദര്‍ശനങ്ങളും സംഘടിപ്പിക്കുന്നു. ഇത്തരത്തില്‍ പെട്ട ഏകദേശം 100 അന്താരാഷ്ട്ര പ്രദര്‍ശനങ്ങള്‍ ഇതിനകം സംഘടിപ്പിച്ചിട്ടുണ്ട്.
150 ലധികം രാജ്യങ്ങളില്‍ നിന്നുള്ള സര്‍ക്കാര്‍, സ്വകാര്യ സ്ഥാപനങ്ങളെയും ഹജ്, ഉംറ മേഖലയില്‍ പ്രവര്‍ത്തിക്കുന്ന പങ്കാളികളെയും ഒരുമിച്ച് കൊണ്ടുവരുന്ന ഒരു ആഗോള വേദിയാണ് ഹജ് കോണ്‍ഫറന്‍സ് ആന്റ് എക്‌സിബിഷന്‍. പ്രദര്‍ശനത്തില്‍ ഉന്നതതല പ്രതിനിധികളും പ്രാദേശിക, അന്തര്‍ദേശീയ പ്രദര്‍ശകരും പങ്കാളിത്തം വഹിക്കുന്നു. ഇത്തവണ ഒരു ലക്ഷത്തിലേറെ പേര്‍ എക്‌സിബിഷന്‍ സന്ദര്‍ശിക്കുമെന്നാണ് പ്രതീക്ഷിക്കുന്നതെന്നും ഹജ്, ഉംറ മന്ത്രി പറഞ്ഞു.