ദമാസ്കസ് – കിഴക്കന് സിറിയയിലെ ദെയ്ര് അല്സൂറിന് പടിഞ്ഞാറുള്ള അയ്യാശ് പ്രദേശത്തുള്ള സൈനിക കേന്ദ്രങ്ങളിലൊന്നില് വെള്ളിയാഴ്ച ഉണ്ടായ സ്ഫോടനത്തില് 11 സൈനികര് കൊല്ലപ്പെട്ടതായി സിറിയന് പ്രതിരോധ മന്ത്രാലയം അറിയിച്ചു. സ്ഫോടനത്തില് കൊല്ലപ്പെട്ട സൈനികരുടെ സംസ്കാര ചടങ്ങിന്റെ ഫോട്ടോകള് മന്ത്രാലയം പ്രസിദ്ധീകരിച്ചു. ദെയ്ര് അല്സൂറിന് പടിഞ്ഞാറുള്ള അയ്യാശ് പ്രദേശത്തുള്ള സിറിയന് ആര്മി കേന്ദ്രങ്ങളിലൊന്നില് ഇന്നലെ ഉണ്ടായ സ്ഫോടനത്തില് മരിച്ച 11 പേരുടെ സംസ്കാര ചടങ്ങ് പ്രതിരോധ മന്ത്രാലയം നഗരത്തിലെ നാഷണല് ആശുപത്രിയില് നിന്ന് നടത്തുകയാണെന്ന് സിറിയന് അറബ് വാര്ത്താ ഏജന്സി സാന റിപ്പോര്ട്ട് ചെയ്തു.
പടിഞ്ഞാറന് ദെയ്ര് അല്സൂര് ഗ്രാമപ്രദേശത്തെ അയ്യാശ് പ്രദേശത്ത് ഇന്നലെ ഉച്ചത്തിലുള്ളതും തുടര്ച്ചയായതുമായ സ്ഫോടനങ്ങള് കേട്ടതായി റിപ്പോര്ട്ട് ചെയ്തു. അയ്യാശ് ഗ്രാമത്തിനടുത്തുള്ള ആയുധ ഡിപ്പോക്കുള്ളിലാണ് സ്ഫോടനങ്ങള് ഉണ്ടായത്. സ്ഫോടനങ്ങളുടെ കാരണവും അവയെ ചുറ്റിപ്പറ്റിയുള്ള സാഹചര്യങ്ങളും വ്യക്തമല്ല.
ഈ സെപ്റ്റംബറില് സിറിയയിലെ ഏതാനും പ്രദേശങ്ങളെ പിടിച്ചുകുലുക്കിയ, വെടിക്കോപ്പുകളും ആയുധ ഡിപ്പോകളും സൈനിക സംഭരണ സൗകര്യങ്ങളും ലക്ഷ്യമിട്ട് നടന്ന സ്ഫോടന പരമ്പരകള്ക്കിടയിലാണ് അയ്യാശ് സംഭവം. ദമാസ്കസിന്റെ വടക്കുകിഴക്കുള്ള അല്ദുമൈര് പ്രദേശത്തെ വെടിക്കോപ്പ് ഡിപ്പോക്കുള്ളില് കഴിഞ്ഞയാഴ്ച നടന്ന സ്ഫോടനമാണ് ഇതില് ഏറ്റവും ഒടുവിലത്തേത്.
ഡിപ്പോയില് കാലഹരണപ്പെട്ട വെടിക്കോപ്പുകള് സൂക്ഷിച്ചിരുന്നതായി റിപ്പോര്ട്ടുകള് സൂചിപ്പിക്കുന്നുണ്ട്. സ്ഫോടനത്തില് ആളപായമൊന്നും റിപ്പോര്ട്ട് ചെയ്തിട്ടില്ല. ഇതിന് രണ്ട് ദിവസം മുമ്പ്, വടക്കന് ഇദ്ലിബ് ഗ്രാമപ്രദേശത്തുള്ള സര്മദാ നഗരത്തിന് സമീപം ആയുധ ഡിപ്പോ പൊട്ടിത്തെറിച്ച് 17 പേര് കൊല്ലപ്പെടുകയും 10 പേര്ക്ക് പരിക്കേല്ക്കുകയും ചെയ്തു. ബുര്ജ് അല്നിംറ പ്രദേശത്തെ ഹൈവേയിലാണ് സ്ഫോടനം ഉണ്ടായത്.
പരിക്കേറ്റവരെ ദാന നഗരത്തിലെ അല്റാസി ആശുപത്രിയില് പ്രവേശിപ്പിച്ചു. മറ്റ് സ്ഥലങ്ങളിലേക്ക് മാറ്റുന്നതിന് മുമ്പ് ആയുധങ്ങളും യുദ്ധാവശിഷ്ടങ്ങളും ശേഖരിക്കാന് ഉപയോഗിക്കുന്ന താല്ക്കാലിക സംഭരണ കേന്ദ്രത്തിലാണ് സ്ഫോടനം നടന്നതെന്ന് സര്മദാ സംഭവത്തിനു പിന്നാലെ സിറിയന് പ്രതിരോധ മന്ത്രാലയം വ്യക്തമാക്കി.