ജിദ്ദ- സ്വകാര്യ മേഖലയിലെ 94 എൻജിനീയറിംഗ് സാങ്കേതിക പ്രൊഫഷനുകളിൽ സ്വദേശിവൽക്കരണം (സൗദിവൽക്കരണം) 35 ശതമാനമായി ഉയർത്താൻ സൗദി അറേബ്യ തീരുമാനിച്ചു. നഗരസഭാ, ഭവനകാര്യ മന്ത്രാലയവുമായി സഹകരിച്ച് മാനവ വിഭവശേഷി, സാമൂഹിക വികസന മന്ത്രാലയമാണ് ഈ നിർണായക തീരുമാനം പ്രഖ്യാപിച്ചത്. 2027 മേയ് 9 മുതൽ പുതിയ നിരക്ക് പ്രാബല്യത്തിൽ വരും. തൊഴിൽ വിപണി തന്ത്രത്തിന്റെയും സൗദി വിഷൻ 2030-ന്റെയും ലക്ഷ്യങ്ങൾക്ക് അനുസൃതമായി ദേശീയ പ്രതിഭകളെ ശാക്തീകരിക്കാനും തൊഴിൽ വിപണിയിൽ സ്വദേശികളുടെ പങ്കാളിത്തം വർധിപ്പിക്കാനും ലക്ഷ്യമിട്ടാണ് ഈ നടപടി. പ്രധാന വിവരങ്ങൾ ഒറ്റനോട്ടത്തിൽ സ്വദേശികളുടെ സാങ്കേതിക ശേഷികൾ പരിപോഷിപ്പിക്കാനും തൊഴിൽ വിപണിയുടെ കാര്യക്ഷമത വർധിപ്പിച്ച് രാജ്യത്തിന്റെ സാമ്പത്തിക വളർച്ചയ്ക്ക് വേഗം കൂട്ടാനും ഈ നീക്കം സഹായിക്കുമെന്ന് മന്ത്രാലയം വ്യക്തമാക്കി.