വാഷിംഗ്ടണ് – മൂന്നര മാസമായി തുടരുന്ന ഇറാന് യുദ്ധം അവസാനിപ്പിക്കാനുള്ള കരാര് അടുത്ത വാരാദ്യത്തില് യൂറോപ്പില് വെച്ച് ഒപ്പുവെക്കുമെന്നും കരാര് ഒപ്പുവെച്ചാലുടന് ഹോര്മുസ് കടലിടുക്ക് തുറക്കുമെന്നും യു.എസ് പ്രസിഡന്റ് ഡൊണാള്ഡ് ട്രംപ് അറിയിച്ചു. ഇറാനുമായുള്ള യുദ്ധം അവസാനിപ്പിക്കാന് ഞങ്ങള് മികച്ച കരാറില് എത്തിയിരിക്കുന്നുവെന്ന് ട്രംപ് ഓവല് ഓഫീസില് മാധ്യമപ്രവര്ത്തകരോട് പറഞ്ഞു. ഒപ്പുവെക്കല് ചടങ്ങില് വൈസ് പ്രസിഡന്റ് ജെ.ഡി വാന്സ് പങ്കെടുക്കും. കരാറിനെ കുറിച്ച് ഇസ്രായില് പ്രധാനമന്ത്രി ബെഞ്ചമിന് നെതന്യാഹു ഉള്പ്പെടെയുള്ള മേഖലാ നേതാക്കളുമായി താന് സംസാരിച്ചിട്ടുണ്ട്. കരാറില് ഒപ്പുവെച്ചാലുടന് ഹോര്മുസ് കടലിടുക്ക് ഔദ്യോഗികമായി തുറക്കും. ഇറാന് പരമോന്നത നേതാവ് മുജ്തബ ഖാംനഇ അമേരിക്കയുമായി കരാറിന് സമ്മതിച്ചതായി താന് വിശ്വസിക്കുന്നു. കരാര് ഒപ്പുവെക്കുന്നത് ഹോര്മുസ് കടലിടുക്ക് തുറക്കാനും ഇറാന് തുറമുഖങ്ങള്ക്കെതിരായ യു.എസ് ഉപരോധം നീക്കാനും കാരണമാകും. കരാറിനെ വളരെ ശക്തമായ ഒരു ധാരണാപത്രം എന്ന് ട്രംപ് വിശേഷിപ്പിച്ചു.
ഇന്നലെ രാത്രി ഇറാനെതിരെ ആസൂത്രണം ചെയ്ത ആക്രമണങ്ങള് റദ്ദാക്കുന്നതായി യു.എസ് പ്രസിഡന്റ് ഡൊണാള്ഡ് ട്രംപ് പ്രഖ്യാപിച്ചു. വെനിസ്വേലയുമായി സംഭവിച്ചതുപോലെ ഇറാന്റെ എണ്ണ സമ്പന്നമായ ഖാര്ഗ് ദ്വീപും അവിടുത്തെ അടിസ്ഥാന സൗകര്യങ്ങളും പിടിച്ചെടുക്കുമെന്ന് ട്രംപ് ഭീഷണിപ്പെടുത്തി ഏതാനും മണിക്കൂറുകള്ക്ക് ശേഷമാണ് ഈ പിന്വാങ്ങല്. ഏതൊരു പുതിയ യു.എസ് ആക്രമണവും കൂടുതല് വിശാലവും അപകടകരവുമായ യുദ്ധത്തിലേക്ക് നയിക്കുമെന്ന് ഇറാന് സൈന്യം മുന്നറിയിപ്പ് നല്കി. കഴിഞ്ഞ ദിവസങ്ങളില് ഇറാനെതിരെ അമേരിക്ക നടത്തിയ ആക്രമണങ്ങള്ക്ക് തിരിച്ചടിയായി കുവൈത്ത്, ബഹ്റൈന്, ജോര്ദാന് എന്നിവിടങ്ങളിലെ യു.എസ് സൈനിക താവളങ്ങള് ലക്ഷ്യമിട്ട് ഇറാനും ആക്രമണങ്ങള് നടത്തി. കൂടാതെ ഹോര്മുസ് കടലിടുക്ക് പൂര്ണമായും അടക്കുകയും ചെയ്തു.
യുദ്ധം അവസാനിപ്പിക്കാന് ഇറാനുമായുള്ള ഒരു കരാര് പ്രാധാന്യമാണെന്ന് മാര്ച്ച് പകുതി മുതല് യു.എസ് പ്രസിഡന്റ് സ്ഥിരമായി വ്യക്തമാക്കിയിരുന്നു. എന്നിരുന്നാലും, അമേരിക്കയും ഇറാനും തമ്മിലുള്ള പ്രാഥമിക സമാധാന കരാറിനെ കുറിച്ചുള്ള പരോക്ഷ ചര്ച്ചകള് ശക്തി പ്രാപിക്കുന്നതായി ഇറാന് സ്രോതസ്സുകളും പാശ്ചാത്യ ഉദ്യോഗസ്ഥരും സൂചിപ്പിച്ചു. ഏപ്രില് ആദ്യം മുതല് ദുര്ബലമായ വെടിനിര്ത്തല് നിലവിലുണ്ട്. ചര്ച്ചകള് തുടരുകയാണെന്ന് മൂന്ന് ഇറാന് സ്രോതസ്സുകളും യൂറോപ്യന് ഉദ്യോഗസ്ഥരും പ്രസ്താവിച്ചു. പക്ഷേ, ബില്യണ് കണക്കിന് ഡോളര് വരുന്ന മരവിപ്പിച്ച ഇറാന് ആസ്തികള് വിട്ടുകൊടുക്കാനുള്ള സംവിധാനം പോലുള്ള ചില വിഷയങ്ങളില് ഇപ്പോഴും വിശദമായ ചര്ച്ച ആവശ്യമാണ്. ഇറാന് തുറമുഖങ്ങള്ക്ക് മേലുള്ള യു.എസ് ഉപരോധം ഈ കരാര് അവസാനിപ്പിക്കുമെന്നും, ഇറാന്റെ ആണവ പദ്ധതിയും ഉയര്ന്ന തോതില് സമ്പുഷ്ടീകരിച്ച യുറേനിയം ശേഖരവും സംബന്ധിച്ച പരിഹരിക്കപ്പെടാത്ത പ്രശ്നങ്ങള് ഭാവിയിലെ ചര്ച്ചകള്ക്കായി മാറ്റിവെക്കുമെന്നും ബന്ധപ്പെട്ട വൃത്തങ്ങള് സൂചിപ്പിച്ചു.