ദുബായ് – ദുബായിലെ എമിറേറ്റ്സ് റോഡില് ഞായറാഴ്ചയുണ്ടായ മിനിബസ് അപകടത്തില് മരിച്ച ഏഴ് തൊഴിലാളികളില് ആറ് പേര് ഇന്ത്യക്കാരാണെന്ന് ഇവര് ജോലി ചെയ്യുന്ന കമ്പനി സ്ഥിരീകരിച്ചു. ഏഴാമന് ശ്രീലങ്കക്കാരനനാണ്. പരിക്കേറ്റ ഒമ്പത് പേരില് നാലുപേര് ഇപ്പോഴും ആശുപത്രിയില് ചികിത്സയിലാണെന്ന് കമ്പനി വൃത്തങ്ങള് അറിയിച്ചു. മരിച്ചവരെ തിരിച്ചറിയാനുള്ള ശ്രമകരമായ പ്രക്രിയ തുടരുകയാണ്. പരിക്കുകളുടെ തീവ്രത കാരണം ചില മൃതദേഹങ്ങള് എളുപ്പത്തില് തിരിച്ചറിയാന് കഴിയാത്തവിധം വികൃതമായിട്ടുണ്ട്. ദുബായിലെ നിര്മ്മാണ സ്ഥലത്തു നിന്ന് ജോലി കഴിഞ്ഞ് ഷാര്ജയിലെ താമസസ്ഥലത്തേക്ക് മടങ്ങുകയായിരുന്ന, സാങ്കേതിക സേവന കമ്പനിയിലെ ജീവനക്കാര് സഞ്ചരിച്ച മിനിബസ് ആണ് ഞായറാഴ്ച ഉച്ചക്ക് അപകടത്തില് പെട്ടത്. ഡ്രൈവര് ഉള്പ്പെടെ 17 പേര് സഞ്ചരിച്ച മിനിബസ് ദുബായ്-ഷാര്ജ അതിര്ത്തിക്ക് സമീപം എമിറേറ്റ്സ് റോഡിന്റെ മധ്യത്തില് നിര്ത്തിയിരുന്ന ട്രക്കില് ഇടിക്കുകയായിരുന്നെന്ന് കമ്പനി വൃത്തങ്ങള് വ്യക്തമാക്കി.
മരിച്ചവരെല്ലാവരും മിനിബസിന്റെ വലതുവശത്തായിരുന്നു. അപകടത്തിന്റെ മുഴുവന് ആഘാതവും നേരിട്ടത് ഈ വശത്തായിരുന്നു. അപകടത്തില് പരിക്കേറ്റ ഒമ്പത് പേരില് അഞ്ച് പേരെ ആശുപത്രിയില് നിന്ന് ഡിസ്ചാര്ജ് ചെയ്തു. ബാക്കി നാലുപേര് ഇപ്പോഴും ചികിത്സയിലാണ്. ഇവരില് മൂന്ന് പേര് ഇന്ത്യക്കാരും ഒരാള് നേപ്പാള് സ്വദേശിയുമാണ്.
മരിച്ച ഏഴ് പേരെയും ഔദ്യോഗികമായി തിരിച്ചറിയുന്ന പ്രക്രിയ ഇപ്പോഴും പുരോഗമിക്കുകയാണെന്ന് കമ്പനി അറിയിച്ചു. ചില മൃതദേഹങ്ങള്ക്ക് ഗുരുതരമായി പരിക്കേറ്റതിനാല് തിരിച്ചറിയല് പ്രക്രിയക്ക് അധികൃതരും സഹപ്രവര്ത്തകരും കടുത്ത വെല്ലുവിളി നേരിടുന്നു. പ്രക്രിയ കഴിയുന്നത്ര വേഗത്തില് മുന്നോട്ട് പോകുന്നുവെന്ന് ഉറപ്പാക്കാന് അധികൃതരുമായി ശക്തമായ ഏകോപനം നടത്തുന്നുണ്ടെന്ന് കമ്പനി പറഞ്ഞു.
കൊല്ലപ്പെട്ടവരില് ഏതാനും ഇന്ത്യന് തൊഴിലാളികളുണ്ടെന്ന് തിങ്കളാഴ്ച വൈകുന്നേരം ദുബായിലെ ഇന്ത്യന് കോണ്സുലേറ്റ് സ്ഥിരീകരിച്ചിരുന്നു. തങ്ങളുടെ ഉദ്യോഗസ്ഥര് ആശുപത്രി സന്ദര്ശിക്കുകയും പരിക്കേറ്റ ഇന്ത്യന് പൗരന്മാരെ സന്ദര്ശിക്കുകയും ഇരകള്ക്കും അവരുടെ കുടുംബങ്ങള്ക്കും സാധ്യമായ എല്ലാ സഹായങ്ങളും നല്കുന്നതിന് പ്രാദേശിക അധികൃതരുമായി ചേര്ന്ന് പ്രവര്ത്തിക്കുകയും ചെയ്തുവെന്ന് കോണ്സുലേറ്റ് അറിയിച്ചു. മരിച്ചവരുടെയും പരിക്കേറ്റവരുടെയും കുടുംബങ്ങളുമായി ബന്ധപ്പെട്ടിട്ടുണ്ടെന്നും സാധ്യമായ എല്ലാ പിന്തുണയും വാഗ്ദാനം ചെയ്തിട്ടുണ്ടെന്നും കമ്പനി വ്യക്തമാക്കി. ദുബായ് പോലീസ്, മെഡിക്കല് ടീമുകള്, തൊഴിലാളികളുടെ രാജ്യങ്ങളുടെ കോണ്സുലേറ്റുകള് എന്നിവരുമായി പൂര്ണ്ണ സഹകരണത്തോടെ പ്രവര്ത്തിക്കുന്നത് തുടരുമെന്നും കമ്പനി കൂട്ടിച്ചേര്ത്തു.
സാങ്കേതിക തകരാര് മൂലം എമിറേറ്റ്സ് റോഡിന്റെ മധ്യത്തില് ട്രക്ക് പെട്ടെന്ന് നിര്ത്തിയതായും മിനിബസ് ഡ്രൈവര് സുരക്ഷിതമായ അകലം പാലിക്കുന്നതില് പരാജയപ്പെട്ട് പിന്നില് നിന്ന് ഇടിച്ചതായും പ്രാഥമിക അന്വേഷണങ്ങള് സൂചിപ്പിക്കുന്നതായി ദുബായ് പോലീസ് നേരത്തെ പറഞ്ഞിരുന്നു. വാഹന തകരാര്, ഇന്ധനം തീരല്, ടയര് തകരാര് എന്നിവ കാരണം റോഡിന്റെ മധ്യത്തില് നിര്ത്തുന്നതിന്റെ ഗുരുതരമായ അപകടങ്ങളെ കുറിച്ച് ദുബായ് പോലീസ് ഡ്രൈവര്മാര്ക്ക് മുന്നറിയിപ്പ് നല്കി. ഇത്തരം നിയമ ലംഘനത്തിന് ഫെഡറല് ട്രാഫിക് നിയമപ്രകാരം 1,000 ദിര്ഹം പിഴയും ആറ് ട്രാഫിക് പോയിന്റുകളും ലഭിക്കുമെന്ന് പോലീസ് വ്യക്തമാക്കി.