ജിദ്ദ: ജിദ്ദ ഇന്റർനാഷണൽ ഇന്ത്യൻ സ്‌കൂളിൽ (IISJ) പഠനം താൽക്കാലികമായി ഓൺലൈൻ രൂപത്തിലേക്ക് മാറ്റി. ഇന്ന് (ഞായർ) മുതൽ ഈ മാസം 5-ാം തീയതി (വ്യാഴം) വരെയായിരിക്കും ക്ലാസുകൾ ഓൺലൈനായി നടക്കുക. കെ.ജി മുതൽ പ്ലസ് ടു വരെയുള്ള മുഴുവൻ വിദ്യാർഥികൾക്കും ഈ തീരുമാനം ബാധകമാണ്.
സൗദി വിദ്യാഭ്യാസ മന്ത്രാലയത്തിൽനിന്ന് ലഭിച്ച പ്രത്യേക നിർദേശത്തെ തുടർന്നാണ് ഈ നടപടിയെന്ന് സ്കൂൾ അധികൃതർ അറിയിച്ചു. പുതിയ സമയക്രമവും ഓൺലൈൻ ക്ലാസുകളിൽ പങ്കെടുക്കുന്നതിനുള്ള നിർദേശങ്ങളും അതത് എച്ച്.ഒ.ഡി (HOD) മാരും അക്കാദമിക് സൂപ്പർവൈസർമാരും ഉടൻ തന്നെ വിദ്യാർഥികൾക്കും രക്ഷിതാക്കൾക്കും കൈമാറും.
അതേസമയം, ഓൺലൈൻ പഠനം നടക്കുന്ന ദിവസങ്ങളിൽ സ്കൂളിലെ നോൺ-ടീച്ചിംഗ്, അഡ്മിനിസ്ട്രേറ്റീവ് ഓഫീസുകളും ഫീസ് കൗണ്ടറുകളും പ്രവർത്തിക്കില്ല. എന്നാൽ രക്ഷിതാക്കൾക്ക് സ്കൂളിന്റെ ഓൺലൈൻ പോർട്ടൽ വഴി ഫീസ് അടക്കാവുന്നതാണെന്നും മാനേജ്‌മെന്റ് അറിയിച്ചു.