തെഹ്റാന് – യുദ്ധം അവസാനിപ്പിക്കാന് ഇറാനു മുന്നില് അമേരിക്ക അവതരിപ്പിച്ച നിര്ദേശങ്ങളില് ഭൂരിഭാഗവും യാഥാര്ഥ്യബോധമില്ലാത്തതും യുക്തിരഹിതവും അതിശയോക്തിപരവുമാണെന്ന് ഇറാന് വിദേശ മന്ത്രാലയ വക്താവ് ഇസ്മായില് ബഗായ് പറഞ്ഞു. ഇറാന് അമേരിക്കയുമായി നേരിട്ട് ചര്ച്ചകള് നടത്തിയിട്ടില്ല. പകരം ഇടനിലക്കാര് വഴി മാത്രമേ സന്ദേശങ്ങള് കൈമാറിയുള്ളൂ. നിരന്തരം നിലപാട് മാറ്റുന്ന അമേരിക്കയില് നിന്ന് വ്യത്യസ്തമായി ഇറാന്റെ നിലപാട് തുടക്കം മുതല് തന്നെ സുവ്യക്തമാണ്. അമേരിക്ക ചര്ച്ച വാഗ്ദാനം ചെയ്യുമ്പോഴെല്ലാം എല്ലാവരും ജാഗ്രത പാലിക്കുന്നു. ലോകം, അല്ലെങ്കില് അമേരിക്കക്കാര് പോലും, അമേരിക്കന് നയതന്ത്രത്തെ എത്രത്തോളം വിശ്വസിക്കുന്നുണ്ട് എന്ന് എനിക്കറിയില്ല. ചില അമേരിക്കന് ഉദ്യോഗസ്ഥരുടെ പരസ്പരവിരുദ്ധമായ പെരുമാറ്റം ഉണ്ടായിരുന്നിട്ടും, വിവിധ വിഷയങ്ങളില് ഇറാന്റെ നിലപാട് തുടക്കം മുതല് തന്നെ സുവ്യക്തമാണ്. ഞങ്ങള്ക്ക് സ്വീകാര്യമായ ചട്ടക്കൂട് ഞങ്ങള്ക്ക് നന്നായി അറിയാം. വിവിധ പേരുകളില് ഉദാഹരണത്തിന്, 15 പോയിന്റുകള്, അല്ലെങ്കില് അതില് കുറവ്, അല്ലെങ്കില് അതില് കൂടുതല് ഞങ്ങള്ക്ക് സമര്പ്പിച്ച രേഖകള് യാഥാര്ഥ്യബോധമില്ലാത്തതും യുക്തിരഹിതവും അമിതമായ ആവശ്യങ്ങള് അടങ്ങിയതുമായിരുന്നെന്ന് ഇസ്മായില് ബഗായ് വ്യക്തമാക്കി.
അമേരിക്കയും ഇറാനും നേരിട്ടും പരോക്ഷമായും ചര്ച്ചകള് നടത്തുന്നുണ്ടെന്നും ഇറാന്റെ പുതിയ നേതാക്കള് വളരെ യുക്തിസഹമായി പെരുമാറുന്നുണ്ടെന്നും യു.എസ് പ്രസിഡന്റ് ഡൊണാള്ഡ് ട്രംപ് നേരത്തെ പറഞ്ഞു. കൂടുതല് യു.എസ് സൈനികര് മേഖലയില് എത്തിയിട്ടുണ്ട്. എന്നാല് അപമാനം അംഗീകരിക്കില്ലെന്ന് ഇറാന് മുന്നറിയിപ്പ് നല്കി. അമേരിക്കക്കും ഇറാനും ഇടയില് മധ്യസ്ഥത വഹിക്കുന്ന പാകിസ്ഥാന്, ഇറാനുമായുള്ള ഒരു മാസം നീണ്ടുനിന്ന യുദ്ധം അവസാനിപ്പിക്കാന് ലക്ഷ്യമിട്ട് വരും ദിവസങ്ങളില് അര്ഥവത്തായ ചര്ച്ചകള്ക്ക് ആതിഥേയത്വം വഹിക്കാന് തയ്യാറെടുക്കുന്നതായി അറിയിച്ചതിന് ശേഷമാണ് ട്രംപിന്റെ പരാമര്ശം.
നമ്മള് അവരുമായി ഒരു കരാര് ഉണ്ടാക്കുമെന്ന് ഞാന് കരുതുന്നു, എനിക്ക് ഉറപ്പുണ്ട്, പക്ഷേ ഞങ്ങള് അത് ചെയ്യില്ലായിരിക്കാമെന്ന് ട്രംപ് ഞായറാഴ്ച വൈകുന്നേരം വാഷിംഗ്ടണിലേക്കുള്ള യാത്രാമധ്യേ എയര്ഫോഴ്സ് വണ് വിമാനത്തില് മാധ്യമപ്രവര്ത്തകരോട് പറഞ്ഞു. ആക്രമണങ്ങളില് രാജ്യത്തെ പരമോന്നത നേതാവും മറ്റ് ഉന്നത ഉദ്യോഗസ്ഥരും കൊല്ലപ്പെട്ടതിനാല് അമേരിക്ക ഇതിനകം ഇറാനില് ഭരണമാറ്റം നേടിയിട്ടുണ്ടെന്ന് വിശ്വസിക്കുന്നതായി ട്രംപ് പറഞ്ഞു.
ഫെബ്രുവരി 28 ന് യുദ്ധത്തിന്റെ തുടക്കത്തില് ഇസ്രായില് നടത്തിയ വ്യോമാക്രമണത്തില് ഇറാന് പരമോന്നത നേതാവ് അലി ഖാംനഇ കൊല്ലപ്പെട്ടു. അദ്ദേഹത്തിന് ശേഷം മകന് മുജ്തബ ചുമതലയേറ്റു. യുദ്ധം മിഡില് ഈസ്റ്റിലുടനീളം വ്യാപിച്ചു. ആയിരക്കണക്കിന് ആളുകള് കൊല്ലപ്പെട്ടിട്ടുണ്ട്. ഊര്ജ വിതരണത്തില് ഇതുവരെ ഉണ്ടായിട്ടില്ലാത്ത ഏറ്റവും വലിയ തടസ്സത്തിന് കാരണമായി. ആഗോള സമ്പദ്വ്യവസ്ഥയെ ബാധിച്ചു. മേഖലാ രാജ്യങ്ങളിലെ വിദേശ മന്ത്രിമാര് തമ്മില് ഞായറാഴ്ച നടത്തിയ ചര്ച്ചകള് യുദ്ധം എത്രയും വേഗം അവസാനിപ്പിക്കാനുള്ള വഴികളും ഇസ്ലാമാബാദില് അമേരിക്കയും ഇറാനും തമ്മിലുള്ള ചര്ച്ചകള് നടത്താനുള്ള സാധ്യതയും പരിഗണിച്ചതായി പാകിസ്ഥാന് വിദേശകാര്യ മന്ത്രി ഇസ്ഹഖ്ദര് പറഞ്ഞു. നിലവിലുള്ള സംഘര്ഷത്തിന് സമഗ്രവും ശാശ്വതവുമായ ഒരു പരിഹാരത്തിലെത്താനായി വരും ദിവസങ്ങളില് ഇരുപക്ഷവും തമ്മില് ഗൗരവമേറിയ ചര്ച്ചകള്ക്ക് ആതിഥേയത്വം വഹിക്കുന്നതിലും സൗകര്യമൊരുക്കുന്നതിലും പാകിസ്ഥാന് സന്തോഷിക്കുന്നതായും മന്ത്രി കൂട്ടിചേർത്തു.
സാധ്യമായ ചര്ച്ചകളെ കുറിച്ചുള്ള സൂചനകള് അയക്കുന്നതോടൊപ്പം ഇറാനിലേക്ക് കരസേനയെ അയക്കാന് അമേരിക്ക രഹസ്യമായി പദ്ധതിയിടുന്നതായി ഇറാന് പാര്ലമെന്റ് സ്പീക്കര് മുഹമ്മദ് ബാഖര് ഖാലിബാഫ് ആരോപിച്ചു. അമേരിക്ക കരസേനയെ വിന്യസിച്ചാല് ഇറാന് തിരിച്ചടിക്കാന് തയ്യാറാണെന്നും അദ്ദേഹം കൂട്ടിച്ചേര്ത്തു. അമേരിക്കക്കാര് ഇറാന്റെ കീഴടങ്ങല് ആഗ്രഹിക്കുന്നിടത്തോളം കാലം, ഞങ്ങള് ഒരിക്കലും അപമാനം അംഗീകരിക്കില്ല എന്നതായിരിക്കും ഞങ്ങളുടെ പ്രതികരണം എന്ന് ഖാലിബാഫ് പറഞ്ഞു.