മനാമ- മിഡിൽ ഈസ്റ്റിലെ നിലവിലെ സുരക്ഷാ സാഹചര്യം കണക്കിലെടുത്ത് 2026 ഫോർമുല 1 സീസണിലെ ബഹ്റൈൻ, സൗദി അറേബ്യ ഗ്രാൻഡ് പ്രി റേസുകൾ റദ്ദാക്കിയേക്കുമെന്ന് റിപ്പോർട്ടുകൾ. മേഖലയിലെ തുടരുന്ന സംഘർഷാവസ്ഥയും സുരക്ഷാ വെല്ലുവിളികളും പരിഗണിച്ച് മത്സരങ്ങൾ മാറ്റിവയ്ക്കാനോ പൂർണ്ണമായും ഒഴിവാക്കാനോ ഉള്ള ആലോചനയിലാണ് ഫോർമുല 1 അധികൃതരും FIAയും. ടീമുകൾ, സാങ്കേതിക ജീവനക്കാർ, ലോകമെമ്പാടുനിന്നും എത്തുന്ന ആരാധകർ എന്നിവരുടെ സുരക്ഷ ഉറപ്പാക്കുക എന്നതിനാണ് പ്രഥമ പരിഗണനയെന്ന് ബന്ധപ്പെട്ട വൃത്തങ്ങൾ സൂചിപ്പിക്കുന്നു.
2026 കലണ്ടർ പ്രകാരം ഏപ്രിൽ 12-ന് ബഹ്റൈനിലും ഏപ്രിൽ 19-ന് ജിദ്ദയിലുമാണ് റേസുകൾ നിശ്ചയിച്ചിരുന്നത്. എന്നാൽ പ്രദേശത്തെ സൈനിക സംഘർഷങ്ങൾ അന്താരാഷ്ട്ര കായിക മാമാങ്കങ്ങൾക്ക് അനുയോജ്യമായ സുരക്ഷാ അന്തരീക്ഷത്തെ ബാധിച്ചിരിക്കുകയാണ്. ഈ രണ്ട് മത്സരങ്ങളും ഒഴിവാക്കപ്പെടുകയാണെങ്കിൽ സീസണിലെ ആകെ റേസുകളുടെ എണ്ണം 24-ൽ നിന്ന് 22 ആയി കുറയും. ഇതോടെ മാർച്ച് 29-ലെ ജപ്പാൻ ഗ്രാൻഡ് പ്രിക്ക് ശേഷം അടുത്ത മത്സരം മെയ് 3-ന് മിയാമിയിലായിരിക്കും നടക്കുക. ഇത് റേസിംഗ് കലണ്ടറിൽ അഞ്ച് ആഴ്ചയുടെ വലിയൊരു ഇടവേളയ്ക്ക് കാരണമാകും.
നിലവിൽ വർഷാവസാനം നടക്കേണ്ട ഖത്തർ, അബുദാബി റേസുകൾക്ക് മാറ്റമില്ലെങ്കിലും അവിടുത്തെ സാഹചര്യങ്ങൾ അധികൃതർ സൂക്ഷ്മമായി നിരീക്ഷിച്ചുവരികയാണ്. തിരക്കേറിയ ഷെഡ്യൂൾ ആയതിനാൽ റദ്ദാക്കുന്ന റേസുകൾ മറ്റൊരു തീയതിയിലേക്ക് മാറ്റുന്നത് പ്രായോഗികമായി ബുദ്ധിമുട്ടായിരിക്കും. ഇതുസംബന്ധിച്ച ഔദ്യോഗിക പ്രഖ്യാപനം വരും ദിവസങ്ങളിൽ ഉണ്ടായേക്കും.