വാഷിംഗ്ടണ് – ഗാസയിലെ സമാധാനവും സ്ഥിരതയും ലക്ഷ്യമിട്ട് താൻ രൂപീകരിച്ച ‘പീസ് ബോർഡിലേക്ക്’ 1,000 കോടി ഡോളർ സംഭാവന നൽകുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. യുദ്ധത്തിനായി ചെലവാക്കുന്ന വൻ തുകയുമായി താരതമ്യം ചെയ്യുമ്പോൾ ഇത് നിസ്സാരമാണെന്നും, ഗാസയുടെ പുനർനിർമ്മാണത്തിന് ആവശ്യമായ 7,000 കോടി ഡോളറിൽ ഒരു ഭാഗം മറ്റ് അംഗരാജ്യങ്ങൾ വാഗ്ദാനം ചെയ്തിട്ടുണ്ടെന്നും അദ്ദേഹം പറഞ്ഞു. പീസ് ബോർഡിന്റെ ഉദ്ഘാടന പ്രസംഗത്തിൽ, 3,000 വർഷമായി സംഘർഷം നിലനിൽക്കുന്ന ഈ മേഖലയിൽ ശാശ്വത സമാധാനം കൊണ്ടുവരാൻ കഴിയുമെന്ന് ട്രംപ് പ്രത്യാശ പ്രകടിപ്പിച്ചു. കസാക്കിസ്ഥാൻ, യു.എ.ഇ, സൗദി അറേബ്യ, ഖത്തർ തുടങ്ങി നിരവധി രാജ്യങ്ങൾ ഇതിനകം തന്നെ 700 കോടി ഡോളറിലധികം സഹായം വാഗ്ദാനം ചെയ്തിട്ടുണ്ട്. ഗാസയിലെ വെടിനിർത്തൽ ബന്ദികളുടെ മോചനത്തിന് വഴിയൊരുക്കിയെന്നും, ഹമാസ് ആയുധം വച്ചില്ലെങ്കിൽ കഠിനമായ പ്രത്യാഘാതങ്ങൾ നേരിടേണ്ടി വരുമെന്നും അദ്ദേഹം മുന്നറിയിപ്പ് നൽകി. ഇറാന്റെ ആണവ കേന്ദ്രങ്ങൾക്ക് നേരെയുള്ള ആക്രമണം മേഖലയിലെ സമാധാനത്തിന് നിർണ്ണായകമായെന്നും ട്രംപ് അവകാശപ്പെട്ടു.
ഭാവി പദ്ധതികളുടെ ഭാഗമായി നോർവേയിൽ അടുത്ത യോഗം ചേരുമെന്നും, ഗാസയിലെ സ്പോർട്സ് സ്റ്റേഡിയങ്ങൾ ഉൾപ്പെടെയുള്ള വികസനത്തിനായി ഫിഫയുടെ സഹകരണം ഉറപ്പാക്കുമെന്നും അദ്ദേഹം അറിയിച്ചു. പീസ് ബോർഡ് ഐക്യരാഷ്ട്രസഭയുമായി ചേർന്ന് പ്രവർത്തിക്കുമെന്നും അതിന്റെ പ്രവർത്തനങ്ങൾ നിരീക്ഷിക്കുമെന്നും ട്രംപ് വ്യക്തമാക്കി. തന്റെ ഭരണത്തിന്റെ ആദ്യ വർഷത്തിൽ എട്ട് യുദ്ധങ്ങൾ അവസാനിപ്പിക്കാൻ കഴിഞ്ഞത് വലിയ നേട്ടമാണെന്ന് പറഞ്ഞ അദ്ദേഹം, തന്റെ നയതന്ത്ര സംഘത്തെ പ്രശംസിക്കുകയും ചെയ്തു. ഗാസയിൽ ഹമാസിന് പകരം ഒരു പോലീസ് സേന രൂപീകരിക്കാനുള്ള നടപടികൾ തുടങ്ങിയതായും ഇതിനകം 2,000 അപേക്ഷകൾ ലഭിച്ചതായും പീസ് ബോർഡ് കോർഡിനേറ്റർ അറിയിച്ചു. ഫലസ്തീൻ പ്രതിനിധി അലി ശഅത് യോഗത്തിൽ പങ്കെടുക്കുകയും സുരക്ഷ, തൊഴിലവസരം, മാനുഷിക സഹായം എന്നിവയ്ക്ക് മുൻഗണന നൽകുമെന്ന് അറിയിക്കുകയും ചെയ്തു. യുഎൻ രക്ഷാസമിതിയുടെ അംഗീകാരത്തോടെയാണ് പീസ് ബോർഡ് പ്രവർത്തിക്കുന്നത്. എങ്കിലും, ഗാസയുടെ പകുതിയോളം ഇപ്പോഴും ഇസ്രായേൽ നിയന്ത്രണത്തിലാണെന്നതും വെടിനിർത്തൽ ലംഘനങ്ങളെക്കുറിച്ചുള്ള ആരോപണങ്ങളും നിലവിലെ സാഹചര്യം സങ്കീർണ്ണമാക്കുന്നു. ഹമാസിനെ നിരായുധീകരിക്കാനുള്ള ചർച്ചകൾ ഈജിപ്ത്, ഖത്തർ തുടങ്ങിയ രാജ്യങ്ങളുമായി ചേർന്ന് അമേരിക്ക തുടരുകയാണ്.