കോഴിക്കോട്- ഇന്ത്യക്ക് മാതൃകയായ സംസ്ഥാനമാണ് കേരളമെന്ന് തെലങ്കാന മുഖ്യമന്ത്രി രേവന്ത് റെഡ്ഢി അഭിപ്രായപ്പെട്ടു. കോഴിക്കോട്ട് കടവ് റിസോർട്ടിൽ മുസ്ലിം ലീഗ് സംസ്ഥാന പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങൾ സംഘടിപ്പിച്ച സ്നേഹസദസ്സ് ഉദ്ഘാടനം ചെയ്യുകയായിരുന്നു അദ്ദേഹം.
രാജ്യം ഫാഷിസത്തിലേക്ക് പോകുന്ന സമയത്ത് അതിനെ പ്രതിരോധിക്കുന്നത് കേരളമാണ്. കേരളത്തിലെ ഇരുപത് ലോക്സഭ സീറ്റുകളിൽനിന്നും ഫാഷിസ്റ്റ് കക്ഷിയെ അകറ്റിനിർത്തി മാതൃക കാണിച്ചു. ലോക്സഭ തെരഞ്ഞെടുപ്പിന്റെ വിജയം ഇന്ത്യാ മുന്നണിക്ക് അനുകൂലമാകുമെന്നും അദ്ദേഹം പറഞ്ഞു. സാദിഖലി ശിഹാബ് തങ്ങൾ അധ്യക്ഷത വഹിച്ചു.
പ്രതിപക്ഷ നേതാവ് വി.ഡി സതീശൻ, കെ.പി.സി.സി അധ്യക്ഷൻ കെ.സുധാകരൻ, സമസ്ത പ്രസിഡന്റ് സയ്യിദ് ജിഫ്രി മുത്തുക്കോയ തങ്ങൾ, കൈതപ്രം ദാമോദരൻ നമ്പൂതിരി, കടയ്ക്കൽ അബ്ദുൽ അസീസ് മൗലവി തുടങ്ങി നിരവധി പേർ സംബന്ധിച്ചു.
സമൂഹത്തിന്റെ വിവിധ തുറകളിലുള്ള നിരവധി പേരാണ് സ്നേഹസദസ്സിൽ പങ്കെടുത്തത്. ലീഗ് വേദികളിലെ സ്ഥിരം സാന്നിധ്യമായിരുന്ന പരേതനായ ഇ.സാദിഖലിയുടെ സേവനങ്ങളെ മുസ്ലീം ലീഗ് സംസ്ഥാന ജനറൽ സെക്രട്ടറി പി.എം.എ സലാം എടുത്തുപറഞ്ഞു. സാദിഖലിയുടെ തീവ്രപ്രയത്നങ്ങളുടെ ഭാഗമായി പുറത്തിറക്കിയ സ്നേഹസദസ് ഗ്രന്ഥം വേദിയിൽ പ്രകാശനം ചെയ്തു.