ഹാംബർഗ്- പോർച്ചുഗലിനെ പെനാൽറ്റി ഷൂട്ടൗട്ടിൽ തോൽപ്പിച്ച് ഫ്രാൻസ് യൂറോ കപ്പിന്റെ സെമിയിൽ പ്രവേശിച്ചു. മൂന്നിനെതിരെ അഞ്ചു ഗോളുകൾക്കാണ് കിലിയൻ എംബാപ്പെയുടെ ഫ്രാൻസ് വിജയിച്ചത്. യൂറോ കപ്പിലെ ക്രിസ്റ്റ്യാനോ റൊണാൾഡോയുടെ അവസാന മത്സരമായിരുന്നു ഇത്. ഫ്രാൻസ് താരങ്ങളുടെ മുഴുവൻ കിക്കും ഗോളായപ്പോൾ പോർച്ചുഗലിന്റെ ജോവോ ഫെലിക്‌സിന്റെ ഷോട്ട് പോസ്റ്റിൽ തട്ടി തെറിച്ചു. കഴിഞ്ഞ മത്സരത്തിൽ മുഴുവൻ സ്പോട്ട് കിക്കുകളും തടുത്തിട്ട പോർച്ചുഗലിന്റെ ഡീഗോ കോസ്റ്റക്ക് ഇത്തവണ ഒരു ഷോട്ടും തടുക്കാനായില്ല. സെമിയിൽ സ്പെയിനാണ് ഫ്രാൻസിന്റെ എതിരാളികൾ.
ഇന്നത്തെ മത്സരത്തിന്റെ നിശ്ചിത സമയത്തും എക്സ്ട്രാ ടൈമിലും ഇരുടീമുകൾക്കും ഗോൾ നേടാനായില്ല. ഏറെക്കാലത്തിന് ശേഷമാണ് ഫ്രാൻസ് പെനാൽറ്റി ഷൂട്ടൗട്ടിൽ വിജയിക്കുന്നത്. കഴിഞ്ഞ ലോകകപ്പിന്റെ ഫൈനലിലും ഫ്രാൻസ് ഷൂട്ടൗട്ടിൽ അർജന്റീനയോട് പരാജയപ്പെട്ടിരുന്നു.