മലപ്പുറം: സമസ്ത കേരള ജംഇയ്യത്തുൽ ഉലമ ജനറൽ സെക്രട്ടറിയും പ്രമുഖ ഇസ്ലാമിക പണ്ഡിതനുമായ പ്രൊഫ. കെ. ആലിക്കുട്ടി മുസ്ലിയാർ (81) അന്തരിച്ചു. വാർദ്ധക്യസഹജമായ അസുഖങ്ങളെ തുടർന്ന് പെരിന്തൽമണ്ണയിലെ സ്വകാര്യ ആശുപത്രിയിൽ ചികിത്സയിലായിരുന്നു. ഭൗതികശരീരം സ്വദേശമായ മലപ്പുറം തിരൂർക്കാട്ടെ ജുമാമസ്ജിദ് ഖബർസ്ഥാനിൽ ഖബറടക്കും.
ചെറുശ്ശേരി സൈനുദ്ദീൻ മുസ്ലിയാരുടെ നിര്യാണത്തെ തുടർന്ന് 2016 ഫെബ്രുവരി 27-നാണ് ആലിക്കുട്ടി മുസ്ലിയാർ സമസ്ത ജനറൽ സെക്രട്ടറിയായി ചുമതലയേൽക്കുന്നത്.
ബഹുമുഖ വ്യക്തിത്വം, സംഘാടക മികവ്
ആത്മീയ-വിദ്യാഭ്യാസ-സാമൂഹിക രംഗങ്ങളിൽ അരനൂറ്റാണ്ടിലേറെ സജീവമായിരുന്ന ആലിക്കുട്ടി മുസ്ലിയാർ നിരവധി പ്രമുഖ സ്ഥാപനങ്ങളുടെ അമരക്കാരനായിരുന്നു. പട്ടിക്കാട് ജാമിയ നൂരിയ്യ അറബിക് കോളേജ് പ്രിൻസിപ്പൽ, സമസ്ത കേരള മദ്രസ മാനേജ്മെന്റ് അസോസിയേഷൻ (SMF) സ്റ്റേറ്റ് പ്രസിഡന്റ്, കേന്ദ്ര ഹജ്ജ് കമ്മിറ്റി മുൻ അംഗം, അഖിലേന്ത്യാ മുസ്ലിം വ്യക്തി നിയമ ബോർഡ് (AIMPLB) ദേശീയ സമിതിയംഗം, കാസർകോട് സംയുക്ത മുസ്ലിം ജമാഅത്ത് ഖാസി തുടങ്ങി നിരവധി പദവികൾ വഹിച്ചിട്ടുണ്ട്.
തിരൂർക്കാട് അൻവാറുൽ ഇസ്ലാമിക് വിദ്യാഭ്യാസ കോംപ്ലക്സ് വൈസ് പ്രസിഡന്റ്, പൊന്നാനി മഊനത്തുൽ ഇസ്ലാം അറബിക് കോളജ് പ്രസിഡന്റ്, വടകര ഹുജ്ജത്തുൽ ഇസ്ലാം ഇസ്ലാമിക് കോംപ്ലക്സ് ഭാരവാഹിത്വം എന്നിവയും അദ്ദേഹം നിർവ്വഹിച്ചുപോന്നു. സംസ്ഥാനത്തെ നിരവധി മഹല്ലുകളുടെ ഖാസി കൂടിയായിരുന്നു അദ്ദേഹം.
മാധ്യമ-സാഹിത്യ രംഗത്തെ സംഭാവനകൾ
സുന്നീ യുവജന സംഘത്തിന്റെ (SYS) മുഖപത്രമായ സുന്നി അഫ്കാർ വാരിക, സമസ്ത കേരള ജംഇയ്യത്തുൽ മുഅല്ലിമീൻ പ്രസിദ്ധീകരണമായ അൽ മുഅല്ലിം മാസിക, അന്നൂർ അറബി മാസിക, തിരൂർക്കാട് ആസ്ഥാനമായി പ്രവർത്തിക്കുന്ന ഡാറ്റാ നെറ്റ് ഫോർ ഇസ്ലാമിക് പ്രൊപ്പഗേഷൻ പുറത്തിറക്കുന്ന മുസ്ലിം ലോകം ഇയർ ബുക്ക് എന്നിവയുടെ മുഖ്യ പത്രാധിപരായി സേവനമനുഷ്ഠിച്ചിട്ടുണ്ട്. കേരള മുസ്ലിം ഡാറ്റാബാങ്ക് വെബ്പോർട്ടലിന്റെ ചീഫ് എഡിറ്ററുമായിരുന്നു.
‘ആഗോള തലത്തിൽ ഇസ്ലാമിക മുന്നേറ്റം’, ‘പുണ്യ ഭൂമിയിലേക്ക്’ എന്നീ ഗ്രന്ഥങ്ങളും ഹജ്ജ് കർമ്മത്തെക്കുറിച്ചുള്ള മൂന്ന് പുസ്തകങ്ങളും രചിച്ചിട്ടുണ്ട്.