- യു.ഡി.എഫിന് എല്ലായിടത്തും വിജയപ്രതീക്ഷ. ആര് വോട്ട് ചെയ്യാതിരുന്നാലും പോളിങ് ശതമാനം കുറയും. പോളിങ്ങിലെ കുറവ് പ്രിയങ്കയുടെ ഭൂരിപക്ഷത്തെ ബാധിക്കില്ല. പാലക്കാട്ട് ഇടതുപക്ഷം വീണ്ടും താഴേക്ക് പോകും. അവിടെ യു.ഡി.എഫും ബി.ജെ.പിയും തമ്മിലാണ് മത്സരമെന്നും മുസ്‌ലിം ലീഗ് ദേശീയ ജനറൽസെക്രട്ടറി പി.കെ കുഞ്ഞാലിക്കുട്ടി
പാലക്കാട്: വയനാട് ദുരന്തം ദേശീയ ദുരന്തമായി പ്രഖ്യാപിക്കാനാവില്ലെന്ന കേന്ദ്ര സർക്കാർ തീരുമാനത്തിൽ രൂക്ഷ വിമർശവുമായി പ്രതിപക്ഷ ഉപനേതാവ് പി കെ കുഞ്ഞാലിക്കുട്ടി.
വയനാട് ഉപതെരഞ്ഞെടുപ്പ് കഴിയുംവരെ സമയം നോക്കി നടക്കുകയായിരുന്നു അവർ. ഇനി കേരളത്തോടുള്ള കേന്ദ്ര നയത്തിന് മറുപടി പറയാനുള്ള അവസരം പാലക്കാട്ടെ ജനങ്ങൾക്കാണെന്നും അദ്ദേഹം പ്രതികരിച്ചു.
കേന്ദ്രത്തിന്റെ ഭൂപടത്തിൽ കേരളം ഇല്ല. കേരളത്തിന്റെ ഭൂപടത്തിൽ ഇനി അവരും ഉണ്ടാവാൻ പാടില്ലെന്നും കുഞ്ഞാലിക്കുട്ടി പറഞ്ഞു.
ഇത്രേം സമയമായിട്ടും കേന്ദ്രം സഹായം എത്തിച്ചില്ല. ദേശീയ ദുരന്തമായി പ്രഖ്യാപിക്കാതിരിക്കാനുള്ള വഴി നോക്കി നടക്കുകയായിരുന്നു കേന്ദ്ര സർക്കാർ. സഹായം നേടിയെടുക്കാൻ ഉമ്മൻ ചാണ്ടി സർക്കാറിനുണ്ടായിരുന്ന ഉത്സാഹം ഈ സർക്കാരിനില്ല. സംസ്ഥാന സർക്കാരിന് കഴിവും ത്രാണിയുമില്ലാത്തതിനാലാണ് കേന്ദ്ര സഹായം കിട്ടാത്തതെന്നും അദ്ദേഹം കുറ്റപ്പെടുത്തി.
കോൺഗ്രസും ലീഗും ഉൾപ്പെടെയുളളവർ നൂറുകണക്കിന് വീടുകൾ വയനാട്ടിൽ നിർമിച്ചു നൽകാമെന്ന് പറഞ്ഞിട്ടുണ്ട്. സർക്കാരുകൾ പരാജയപ്പെട്ട സ്ഥലത്ത് സംഘടനകൾ സഹായിക്കാൻ മുന്നോട്ട് വരുന്ന സ്ഥിതിയാണ് വയനാട്ടിലെന്നും അദ്ദേഹം പറഞ്ഞു.
തെരഞ്ഞെടുപ്പിൽ എല്ലായിടത്തും യു.ഡി.എഫിന് വിജയപ്രതീക്ഷയാണുള്ളത്. വയനാട്ടിൽ പ്രിയങ്കയ്ക്ക് വമ്പിച്ച ഭൂരിപക്ഷം കിട്ടും. ആര് വോട്ട് ചെയ്യാതിരുന്നാലും പോളിങ് ശതമാനം കുറയും. പ്രിയങ്കയുടെ വിജയത്തിളക്കത്തെ പോളിങ്ങിലെ കുറവ് ബാധിക്കില്ലെന്നും അദ്ദേഹം അഭിപ്രായപ്പെട്ടു.
പാലക്കാട് 15,000 വോട്ടുകളുടെ ഭൂരിപക്ഷം രാഹുലിനുണ്ടാകും. ഇടതുപക്ഷം വീണ്ടും താഴേക്ക് പോകും. അവിടെ യു.ഡി.എഫും ബി.ജെ.പിയും തമ്മിലാണ് മത്സരം. ഞങ്ങളൊക്കെ വഖഫ് മന്ത്രിമാർ ആയിട്ടുണ്ടെന്നും അന്നൊന്നും മുനമ്പം പ്രശ്‌നം ഉണ്ടായിട്ടില്ലെന്നും പറഞ്ഞു. ബി.ജെ.പിയും കേരള സർക്കാരും കൂടി കളിക്കുകയാണെന്നും മുനമ്പത്തുകാർക്ക് ഭൂമി നൽകണം എന്നൊന്നുമല്ല ബി.ജെ.പിക്ക് ഉള്ളതെന്നും കുഞ്ഞാലിക്കുട്ടി ചൂണ്ടിക്കാട്ടി.