ഹജ് നിര്‍വഹിക്കുകയെന്ന ലക്ഷ്യത്തോടെ അനധികൃതമായി രാജ്യത്ത് തങ്ങിയ വിസിറ്റ് വിസക്കാര്‍ക്ക് ആതിഥേയത്വം നല്‍കിയവര്‍ അടക്കം 16,190 വിസാ നിയമ ലംഘകര്‍ക്ക് ഓട്ടോമാറ്റിക് ആയി പിഴകള്‍ ചുമത്തിയതായി പൊതുസുരക്ഷാ വകുപ്പ് മേധാവിയും ഹജ് സുരക്ഷാ കമ്മിറ്റി ചെയര്‍മാനുമായ ലെഫ്. ജനറല്‍ മുഹമ്മദ് അല്‍ബസ്സാമി അറിയിച്ചു.
നിരവധി സ്ത്രീകള്‍ അടക്കം വിസിറ്റ് വിസക്കാരായ 108 പേരെ ട്രെയിലറുകളിലുണ്ടാക്കിയ രഹസ്യ അറകളില്‍ ഒളിപ്പിച്ച് മക്കയിലേക്ക് കടത്താന്‍ ശ്രമിച്ച മൂന്നു സൗദി പൗരന്മാരെ ഹജ് സുരക്ഷാ സേന അറസ്റ്റ് ചെയ്തു. വിസിറ്റ് വിസക്കാരെ കാറുകളില്‍ വിജനമായ സ്ഥലത്തെ ചുറ്റുമതിലോടു കൂടിയ കോംപൗണ്ടില്‍ എത്തിച്ച് ട്രെയിലറുകളിലെ രഹസ്യ അറകളില്‍ ഒളിപ്പിച്ച് മക്കിയിലേക്ക് കടത്താനാണ് സംഘം ശ്രമിച്ചത്.
