ജിദ്ദ: വിമാന സർവീസുകൾ തടസ്സപ്പെട്ടതിനെ തുടർന്ന് സൗദി അറേബ്യയിൽ പ്രയാസത്തിലായ ഇന്ത്യയിൽനിന്നുള്ള ഉംറ തീർത്ഥാടകർക്ക് അടിയന്തര സഹായങ്ങൾ ലഭ്യമാക്കാൻ ജിദ്ദയിലെ ഇന്ത്യൻ കോൺസുലേറ്റ് നടപടികൾ ഊർജിതമാക്കി.
സർവീസുകൾ റദ്ദാക്കപ്പെട്ട സാഹചര്യത്തിൽ കോൺസുലേറ്റ് പുറത്തിറക്കിയ പ്രധാന നിർദ്ദേശങ്ങൾ താഴെ പറയുന്നവയാണ്:
24 മണിക്കൂറും പ്രവർത്തിക്കുന്ന കൺട്രോൾ റൂമുകൾ: ജിദ്ദയിലും മക്കയിലുമായി 24×7 കൺട്രോൾ റൂമുകൾ സജ്ജീകരിച്ചിട്ടുണ്ട്. ഇന്ത്യൻ കമ്മ്യൂണിറ്റി സംഘടനകളുടെയും സന്നദ്ധപ്രവർത്തകരുടെയും സഹകരണത്തോടെ തീർത്ഥാടകർക്ക് ഭക്ഷണവും അടിയന്തര മരുന്നുകളും ഉൾപ്പെടെയുള്ള പ്രാഥമിക ആവശ്യങ്ങൾ കോൺസുലേറ്റ് ഉറപ്പാക്കുന്നുണ്ട്.
സൗദി അധികൃതരുമായി നിരന്തര ബന്ധം: വിസയുടെ കാലാവധിയും യാത്ര വൈകുന്നതുമായി ബന്ധപ്പെട്ട ബുദ്ധിമുട്ടുകൾ പരിഹരിക്കുന്നതിനായി ഹജ്ജ്-ഉംറ മന്ത്രാലയം, വിദേശകാര്യ മന്ത്രാലയം തുടങ്ങിയ സൗദി അധികാരികളുമായി കോൺസുലേറ്റ് നിരന്തരം ആശയവിനിമയം നടത്തുന്നുണ്ട്.
📢 IMPORTANT UPDATE The Consulate continues to assist Indian nationals affected by flight disruptions through its Control Rooms, community networks and coordination with Saudi authorities and airlines. ➡️ Umrah tour operators seeking assistance in connecting with airlines currently operating flights to India may approach the Consulate. 📄 Please refer to the attached advisory for details. @MEAIndia @IndianEmbRiyadh
— India in Jeddah (@CGIJeddah) October 24, 2026
പരാതി പരിഹാരത്തിന് പ്രത്യേക നമ്പർ: അധിക ദിവസങ്ങളിലെ താമസം അടക്കമുള്ള പ്രയാസങ്ങൾ നേരിടുന്ന തീർത്ഥാടകർക്ക് സൗദി ഹജ്ജ്-ഉംറ മന്ത്രാലയത്തിന്റെ പിൽഗ്രിം കെയർ സെന്ററുമായി 1966 നമ്പറിൽ ബന്ധപ്പെട്ട് പരാതി രജിസ്റ്റർ ചെയ്ത് കേസ് റഫറൻസ് നമ്പർ കരസ്ഥമാക്കാവുന്നതാണ്. ഈ റഫറൻസ് നമ്പർ കോൺസുലേറ്റിന്റെ കൺട്രോൾ റൂമുകളുമായി പങ്കുവെച്ചാൽ കൂടുതൽ ഏകോപനം സാധ്യമാകും.
വിമാന കമ്പനികളുമായുള്ള ചർച്ചകൾ: വിമാനങ്ങൾ റദ്ദാക്കിയതുമായി ബന്ധപ്പെട്ട ആശങ്കകളും ടിക്കറ്റ് തുക തിരികെ ലഭിക്കുന്നതിലെ (Refund) തടസ്സങ്ങളും പരിഹരിക്കാൻ ഇന്ത്യൻ വിമാനക്കമ്പനികളുമായി കോൺസുലേറ്റ് ചർച്ചകൾ നടത്തിവരുന്നു.
പകരമുള്ള യാത്രാ സൗകര്യങ്ങൾ: ഇന്ത്യയിലേക്ക് സർവീസ് നടത്തുന്ന മറ്റ് വിമാനക്കമ്പനികളുമായി ഉംറ ടൂർ ഓപ്പറേറ്റർമാരെ ബന്ധപ്പെടുത്തി ബദൽ യാത്രാ സൗകര്യങ്ങൾ ഒരുക്കാനുള്ള ശ്രമങ്ങൾ പുരോഗമിക്കുകയാണ്. സീറ്റുകളുടെ ലഭ്യതയ്ക്കും നിരക്കുകൾക്കും വിധേയമായിരിക്കും ഈ ക്രമീകരണങ്ങൾ. യാത്രക്കാർ തങ്ങളുടെ എയർലൈനുകൾ, ട്രാവൽ ഏജന്റുകൾ, ഉംറ സർവീസ് പ്രൊവൈഡർമാർ എന്നിവരുമായി ബന്ധപ്പെട്ട് റീബുക്കിംഗ് ഉൾപ്പെടെയുള്ള വിവരങ്ങൾ നിരന്തരം മനസ്സിലാക്കണമെന്ന് കോൺസുലേറ്റ് നിർദ്ദേശിച്ചിട്ടുണ്ട്. ഏതെങ്കിലും തരത്തിലുള്ള കോൺസുലാർ സഹായങ്ങൾ ആവശ്യമുളളവർക്ക് ജിദ്ദയിലെയും മക്കയിലെയും കൺട്രോൾ റൂമുകളെ എപ്പോഴും സമീപിക്കാവുന്നതാണെന്നും അധികൃതർ അറിയിച്ചു.