മസ്‌കത്ത്– ഇസ്രാഈല്‍ ആക്രമണത്തെത്തുടര്‍ന്ന് പ്രതിസന്ധി നേരിടുന്ന ഇറാനില്‍ കുടുങ്ങിപ്പോയ ഒമാന്‍ സ്വദേശികളില്‍ 313 പേര്‍ ഇതിനകം തിരിച്ചെത്തിയതായി അധികൃതര്‍. ഇറാനിലെ ബന്ദര്‍ അബ്ബാസ് വഴിയാണ് തിങ്കളാഴ്ച രാത്രിയോടെ ഇവര്‍ സുരക്ഷിതമായി രാജ്യത്ത് തിരിച്ചെത്തിയതെന്ന് ഒമാന്‍ വിദേശകാര്യമന്ത്രാലയം അറിയിച്ചു. മസ്‌കത്ത് ഡെയിലിയാണ് ഇക്കാര്യം റിപ്പോര്‍ട്ട് ചെയ്തത്.
പൗരന്മാരുടെ സുരക്ഷിതമായ തിരിച്ചുവരവ് ഉറപ്പാക്കുന്നതിനുള്ള ഒമാന്‍ സര്‍ക്കാരിന്റെ പ്രതിബദ്ധതയുടെ ഭാഗമായി തെഹ്റാനിലെ ഒമാന്‍ എംബസിയുമായും മറ്റ് ബന്ധപ്പെട്ട വിഭാഗങ്ങളുമായും സഹകരിച്ച് ഒഴിപ്പിക്കല്‍ നടപടികള്‍ പുരോഗമിക്കുന്നുണ്ടെന്നും ബന്ധപ്പെട്ടവര്‍ വിശദീകരിച്ചു. ഷാലംജ അതിര്‍ത്തി വഴി കൂടുതല്‍ ഒമാനി പൗരന്മാരെ സ്വദേശത്തേക്ക് തിരിച്ചെത്തിക്കുന്നതിനുള്ള നടപടികള്‍ അതിവേഗം പുരോഗമിക്കുകയാണ്. ഒമാനി പൗരന്മാരെ തിരിച്ചെത്തിക്കാനുള്ള നടപടികളില്‍ സഹകരിച്ചവരോടുള്ള പ്രതിബദ്ധതയും കടപ്പാടുമുണ്ടെന്ന് നന്ദി അറിയിക്കുന്നതായും മന്ത്രാലയം പ്രസ്താവനയില്‍ വിശദീകരിച്ചു.