മനാമ- മേഖലയിൽ ഉരുണ്ടുകൂടിയ സംഘർഷങ്ങളുടെ പശ്ചാതലത്തിൽ കൂടുതൽ നടപടികൾ സ്വീകരിച്ച് ബഹ്റൈൻ. വിദ്യാലയങ്ങളിലെ പഠനം ഓൺലൈൻ വഴിയാക്കിയ അധികൃതർ അത്യാവശ്യ കാര്യങ്ങൾക്കല്ലാതെ മെയിൻ റോഡുകൾ ഉപയോഗിക്കരുതെന്നും ആവശ്യപ്പെട്ടു. ബഹ്റൈൻ വാർത്താ ഏജൻസിയാണ് ഇക്കാര്യം റിപ്പോർട്ട് ചെയ്തത്.
കിന്റർഗാർട്ടനുകൾ, സ്‌കൂളുകൾ, സർവകലാശാലകൾ എന്നിവയുൾപ്പെടെ ബഹ്‌റൈനിലെ എല്ലാ പൊതു, സ്വകാര്യ വിദ്യാഭ്യാസ സ്ഥാപനങ്ങൾക്കും അധ്യാപന, പഠന ആവശ്യങ്ങൾക്കായി അവരുടെ ഡിജിറ്റൽ, ഓൺലൈൻ പ്ലാറ്റ്‌ഫോമുകൾ സജീവമാക്കാൻ നിർദ്ദേശം നൽകി. ഞായറാഴ്ച പുലർച്ചെ ഇറാനിലെ മൂന്ന് ആണവ കേന്ദ്രങ്ങളിൽ യു.എസ് ബോംബിട്ടതിനുശേഷം, മുൻകരുതൽ നടപടിയായാണ് വിദ്യാഭ്യാസ മന്ത്രാലയം എല്ലാ പൊതു, സ്വകാര്യ വിദ്യാഭ്യാസ സ്ഥാപനങ്ങൾക്കും ഓൺലൈൻ പഠനത്തിലേക്ക് മാറാൻ നിർദ്ദേശങ്ങൾ നൽകിയത്.
യാത്ര പരിമിതപ്പെടുത്താനും പ്രധാന റോഡുകൾ “ആവശ്യമുള്ളപ്പോൾ മാത്രം” ഉപയോഗിക്കാനും ആഭ്യന്തര മന്ത്രാലയം പൗരന്മാരോടും താമസക്കാരോടും അഭ്യർത്ഥിച്ചു. പൊതു സുരക്ഷ നിലനിർത്തുന്നതിനും അടിയന്തര ആവശ്യങ്ങൾക്കായി റോഡുകൾ കാര്യക്ഷമമായി ഉപയോഗിക്കാനുമാണ് ഈ നടപടി സ്വീകരിച്ചിരിക്കുന്നത്.
ബഹ്‌റൈനിലെ സിവിൽ സർവീസ് ബ്യൂറോ മന്ത്രാലയങ്ങളിലും സർക്കാർ ഏജൻസികളിലും 70 ശതമാനം വരെ ജീവനക്കാരും വീട്ടിൽ നിന്ന് ജോലി ചെയ്യുന്ന തരത്തിൽ റിമോട്ട് വർക്കിംഗ് സിസ്റ്റം നടപ്പാക്കുമെന്നും പ്രഖ്യാപിച്ചു.
ശാരീരിക സാന്നിധ്യം അത്യാവശ്യമായതോ അടിയന്തര സാഹചര്യങ്ങളിൽ പ്രത്യേക നടപടിക്രമങ്ങൾ പാലിക്കുന്നതോ ആയ മേഖലകൾക്ക് ഇത് ബാധകമല്ല. ഇന്ന് മുതൽ കൂടുതൽ അറിയിപ്പ് ഉണ്ടാകുന്നതുവരെ പൊതു സുരക്ഷാ ആവശ്യകതകൾക്ക് അനുസൃതമായി ഇത് നടപ്പിലാക്കും. ബഹ്‌റൈനും ഇറാനും തമ്മിൽ ഏകദേശം 200 കിലോമീറ്റർ മാത്രമാണ് കടലിനാൽ വേർതിരിക്കപ്പെട്ടിരിക്കുന്നത്.
ഇറാനിലെ മൂന്ന് ആണവ കേന്ദ്രങ്ങളായ ഫോർഡോ, നതാൻസ്, എസ്ഫഹാൻ എന്നിവിടങ്ങളിൽ യുഎസ് ആക്രമണം നടത്തിയതിന് ശേഷം ഗൾഫ് മേഖലയിൽ “ആക്ടീവ് ഇഫക്റ്റുകൾ ഒന്നും കണ്ടെത്തിയിട്ടില്ല” എന്ന് സൗദി റെഗുലേറ്ററി അധികാരികൾ പറഞ്ഞു. ബോംബ് ആക്രമണത്തിന് ശേഷം ഓഫ്-സൈറ്റ് വികിരണ അളവിൽ വർദ്ധനവ് ഉണ്ടായിട്ടില്ലെന്ന് അന്താരാഷ്ട്ര ആണവോർജ്ജ ഏജൻസിയും അറിയിച്ചു.