ദോഹ – ഖത്തർ ഫുട്ബോൾ ലീഗായ ഖത്തർ സ്റ്റാർ ലീഗിൽ കേരളക്കരയിൽ നിന്നുള്ള ആദ്യ ഗോൾ പിറന്നു. അൽ ദുഹൈൽ ക്ലബിന് വേണ്ടി ബൂട്ട് കെട്ടുന്ന കണ്ണൂർ സ്വദേശിയായ തഹ്സീൻ മുഹമ്മദാണ് ആ ചരിത്ര ഗോളിന് അവകാശി. അൽ ഷമാലിനെതിരെ നടന്ന മത്സരത്തിന്റെ 41-ാം മിനുറ്റിലാണ് തഹ്സീൻ ഗോൾ നേടിയത്. കോർണറിൽ ലഭിച്ച പന്ത് സഹതാരമായ ക്രിസ്റ്റോഫ് പിയാറ്റെക് ഹെഡ് ചെയ്യുന്നു, പന്ത് എത്തിയത് പോസ്റ്റിന് തൊട്ടുമുന്നിൽ നിൽക്കുന്ന മലയാളിയുടെ ബൂട്ടിലേക്ക്, തഹ്സീൻ ലക്ഷ്യം തെറ്റാതെ പന്ത് വലയിൽ എത്തിക്കുകയും ചെയ്തു. ശനിയാഴ്ച വൈകിട്ട് നടന്ന മത്സരത്തിൽ എതിരില്ലാത്ത രണ്ടു ഗോളിന് അൽ ദുഹൈൽ എതിരാളികളെ പരാജയപ്പെടുത്തി. ആദ്യം ഗോൾ നേടിയത് മലയാളി താരത്തിന്റെ ഗോളിന് വഴിയൊരുക്കിയ പിയാറ്റെക്കാണ്.
മലയാളിയാണെങ്കിലും ജനിച്ച മണ്ണായ ഖത്തർ ദേശീയ ടീമിന് വേണ്ടി കളിക്കുന്ന തഹ്സീൻ 2026 ലോകകപ്പ് കളിക്കാനും സാധ്യത വളരെയേറെയാണ്. ഖത്തർ യു എ ഇയെ തോൽപ്പിച്ച് ലോകകപ്പിലേക്ക് യോഗ്യത ഉറപ്പിക്കുമ്പോൾ പകരക്കാരുടെ ബെഞ്ചിൽ ആഹ്ലാദം പങ്കിടുന്നതിൽ താരവും ഉണ്ടായിരുന്നു.
2024ൽ യോഗ്യത മത്സരത്തിൽ അഫ്ഗാനിസ്ഥാനിന് എതിരെ ബൂട്ട് കെട്ടിയാണ് ദേശീയ ടീമിന് വേണ്ടി തഹ്സീന് അരങ്ങേറ്റം കുറിച്ചത്.
കാലിക്കറ്റ് യൂണിവേഴ്സിറ്റി ടീമിനുവേണ്ടി വരെ ബൂട്ട് കെട്ടി നാഷണൽ ടീമിന്റെ ക്യാമ്പു വരെ എത്തിയ ജംഷീദാണ് താരത്തിന്റെ പിതാവ്. പരിക്ക് വില്ലൻ ആയപ്പോൾ ഫുട്ബോൾ മൈതാനം മതിയാക്കി പ്രവാസ ലോകത്തേക്ക് കടന്നതാണ് ജംഷീദ്.