ജെറുസലേം: ഇസ്രായേലിൽ പുതിയ സർക്കാർ രൂപീകരണത്തിന് വഴിയൊരുങ്ങുന്നു. മുൻ സൈനിക മേധാവിയും പ്രതിപക്ഷ സഖ്യ നേതാവുമായ ഗാഡി ഐസൻകോട്ടിനെ അടുത്ത സർക്കാർ രൂപീകരിക്കാൻ പ്രസിഡന്റ് ഐസക് ഹെർസോഗ് ഔദ്യോഗികമായി ക്ഷണിച്ചു. സർക്കാർ രൂപീകരണത്തിൽ വിജയിച്ചാൽ, ഇസ്രായേലിൽ ഏറ്റവും കൂടുതൽ കാലം പ്രധാനമന്ത്രിയായിരുന്ന ബെഞ്ചമിൻ നെതന്യാഹുവിന് പകരക്കാരനായി 66-കാരനായ ഐസൻകോട്ട് അധികാരമേൽക്കും.
ശാന്തനും ലളിതസ്വഭാവക്കാരനുമായ ഐസൻകോട്ടിന്റെ ശൈലി, നെതന്യാഹുവിന്റെ പ്രകോപനപരമായ ഭരണരീതിയിൽ മനംമടുത്ത വോട്ടർമാർക്കിടയിൽ വലിയ സ്വീകാര്യതയാണ് ഉണ്ടാക്കിയത്. ഇസ്രായേലിന്റെ ചരിത്രത്തിലാദ്യമായി മധ്യപൂർവേഷ്യൻ-വടക്കേ ആഫ്രിക്കൻ പശ്ചാത്തലമുള്ള (സെഫാർഡിക്) മൊറോക്കൻ ജൂത വംശജൻ പ്രധാനമന്ത്രി പദത്തിലെത്തുന്നു എന്ന പ്രത്യേകതയുമുണ്ട്. ഗാസ യുദ്ധത്തിൽ മകനെയും രണ്ട് സഹോദരീപുത്രന്മാരെയും നഷ്ടപ്പെട്ട ഐസൻകോട്ടിന് ഇസ്രായേൽ ജനതയ്ക്കിടയിൽ വലിയ ജനപ്രീതിയാണുള്ളത്.
രാഷ്ട്രീയ സാഹചര്യം:
ഒക്ടോബറിൽ നടന്ന തെരഞ്ഞെടുപ്പിൽ പാർലമെന്റിലെ (നെസെറ്റ്) 120 സീറ്റുകളിൽ ഐസൻകോട്ടിന്റെ നേതൃത്വത്തിലുള്ള വിശാല പ്രതിപക്ഷ സഖ്യം 48 സീറ്റുകളും നെതന്യാഹു പക്ഷം 53 സീറ്റുകളും നേടിയിരുന്നു. ഇരുവിഭാഗത്തിനും കേവലഭൂരിപക്ഷം ലഭിക്കാതിരുന്ന സാഹചര്യത്തിൽ, തെരഞ്ഞെടുപ്പിൽ വൻ മുന്നേറ്റം നടത്തിയ അറബ് വംശജരുടെ രാഷ്ട്രീയ മുന്നണികളുടെ പിന്തുണ പ്രസിഡന്റുമായുള്ള ചർച്ചകളിൽ ഐസൻകോട്ടിന് ലഭിച്ചു. എങ്കിലും, സർക്കാർ രൂപീകരണത്തിൽ അറബ് മുന്നണികളെ നേരിട്ട് പങ്കാളികളാക്കുമോ എന്നത് വ്യക്തമല്ല.
നയങ്ങളും വഗ്ദാനങ്ങളും:
- ജനാധിപത്യ സംരക്ഷണം: ജുഡീഷ്യറിയുടെ സ്വാതന്ത്ര്യം, നിയമവാഴ്ച, ന്യൂനപക്ഷ അവകാശങ്ങൾ, സ്വതന്ത്ര മാധ്യമങ്ങൾ എന്നിവ സംരക്ഷിക്കുമെന്ന് അദ്ദേഹം ഉറപ്പുനൽകുന്നു.
- തീവ്രവാദത്തിനെതിരെ നിലപാട്: വെസ്റ്റ് ബാങ്കിൽ ഫലസ്തീനികൾക്കെതിരെ അക്രമം നടത്തുന്ന തീവ്രവാദികളായ ജൂത കുടിയേറ്റക്കാർക്കെതിരെ കടുത്ത നടപടിയെടുക്കും. അവിടെയുള്ള ‘യഹൂദ ഭീകരതയ്ക്ക്’ നെതന്യാഹു സർക്കാർ ഒത്താശ ചെയ്തതായും അദ്ദേഹം കുറ്റപ്പെടുത്തി.
- സൈനിക സേവനം: അൾട്രാ-ഓർത്തഡോക്സ് ജൂതന്മാർക്കും അറബ് പൗരന്മാർക്കും സൈനിക അല്ലെങ്കിൽ സിവിലിയൻ സേവനം നിർബന്ധമാക്കുന്ന സാർവത്രിക ദേശീയ സേവന നിയമം നടപ്പിലാക്കും.
- ഗാസ നയം: ഫലസ്തീൻ രാഷ്ട്ര രൂപീകരണത്തെ എതിർക്കുന്ന ഐസൻകോട്ട്, 18 മാസത്തിനുള്ളിൽ ഹമാസ് ഭരണവും അവരുടെ സൈനിക വിഭാഗവും തകർക്കുമെന്ന് പ്രഖ്യാപിച്ചിട്ടുണ്ട്.
- അന്താരാഷ്ട്ര ബന്ധം: അമേരിക്കയുമായുള്ള സഖ്യം കൂടുതൽ ശക്തമാക്കുമെന്നും അദ്ദേഹം വാഗ്ദാനം ചെയ്തു.