തിരുവനന്തപുരം: യുഡിഎഫ് സർക്കാർ അധികാരമേറ്റെടുത്ത് അഞ്ചു മാസം പിന്നിടുമ്പോഴും സംസ്ഥാന സർക്കാരിന്റെ ഔദ്യോഗിക സോഷ്യൽ മീഡിയ പേജുകൾ നിർജീവമായി തുടരുന്നു. ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പിന്റെ (ഐപിആർഡി) നേതൃത്വത്തിലുള്ള ഫേസ്ബുക്ക്, ഇൻസ്റ്റഗ്രാം, എക്സ് (ട്വിറ്റർ) ഹാൻഡിലുകൾ വഴിയുള്ള ആശയവിനിമയത്തിൽ വലിയ വീഴ്ച സംഭവിക്കുന്നതായാണ് വിമർശനം ഉയരുന്നത്.
സോഷ്യൽ മീഡിയ പ്രവർത്തനങ്ങൾ ഏകോപിപ്പിക്കാൻ വകുപ്പിന് കീഴിൽ പ്രത്യേക ന്യൂമീഡിയ വിഭാഗവും ഡയറക്ടറുടെ മേൽനോട്ടത്തിൽ ഉദ്യോഗസ്ഥരും സജ്ജമായിരിക്കെയാണ് ഈ അനാസ്ഥ. സർക്കാർ നടപ്പാക്കുന്ന പദ്ധതികൾ, ക്ഷേമപ്രവർത്തനങ്ങൾ, ജനക്ഷേമ തീരുമാനങ്ങൾ എന്നിവ സമയബന്ധിതമായി പൊതുജനങ്ങളിലേക്ക് എത്തിക്കുന്നതിൽ അധികൃതർ പരാജയപ്പെടുന്നു.
മുഖ്യമന്ത്രിയുടെയും മറ്റ് മന്ത്രിമാരുടെയും വാർത്താസമ്മേളന വിവരങ്ങൾ മാത്രമാണ് നിലവിൽ പ്രധാനമായും പേജുകളിൽ പ്രത്യക്ഷപ്പെടുന്നത്. മുഖ്യമന്ത്രിയുടെ ഔദ്യോഗിക സോഷ്യൽ മീഡിയ പേജിൽ വരുന്ന അതേ പോസ്റ്ററുകൾ അതേപടി സംസ്ഥാന സർക്കാരിന്റെ പേജുകളിലും റീ-പോസ്റ്റ് ചെയ്യുന്ന രീതിയാണ് തുടരുന്നത്.
അഞ്ചു മാസത്തിനിടെ 75 പോസ്റ്ററുകൾ മാത്രം
സർക്കാർ അധികാരമേറ്റ ശേഷമുള്ള അഞ്ചു മാസത്തിനിടെ ഏകദേശം 75 പോസ്റ്ററുകൾ മാത്രമാണ് സംസ്ഥാന സർക്കാരിന്റെ ഔദ്യോഗിക പേജുകളിൽ പ്രസിദ്ധീകരിച്ചത്. ഇതിൽ 23 എണ്ണം ബജറ്റ് പ്രഖ്യാപനങ്ങളുമായി ബന്ധപ്പെട്ടവയും, ബാക്കിയുള്ളവയിൽ ഭൂരിഭാഗവും കാലാവസ്ഥാ മുന്നറിയിപ്പുകൾ മാത്രവുമാണ്.
സർക്കാരിന്റെ നൂറുദിന കർമപദ്ധതിയുടെ പുരോഗതി, വിവിധ വകുപ്പുകളുടെ നേട്ടങ്ങൾ, ക്ഷേമപദ്ധതികളുടെ വിശദാശങ്ങൾ എന്നിവ ജനങ്ങളിലെത്തിക്കുന്നതിൽ ക്രമബദ്ധമായ ആശയവിനിമയത്തിന്റെ അഭാവമുണ്ട്. സർക്കാരിന്റെ പ്രവർത്തനങ്ങൾ നേരിട്ടെത്തിക്കാനുള്ള പ്രധാന പൊതുജനസമ്പർക്ക സംവിധാനം കാര്യക്ഷമമല്ലാത്തത്, പദ്ധതികളുടെ പ്രചാരണത്തെ സാരമായി ബാധിക്കുന്നുണ്ട്.
ഐപിആർഡി ഡയറക്ടറുടെ നേരിട്ടുള്ള മേൽനോട്ടത്തിലാണ് സോഷ്യൽ മീഡിയ ഹാൻഡിലുകളുടെ പ്രവർത്തനം. പേജുകൾ സജീവമായി നിലനിർത്താൻ പ്രത്യേകം ഉദ്യോഗസ്ഥരും ന്യൂമീഡിയ വിഭാഗവും ഉണ്ടായിട്ടും ഈ സ്ഥിതി തുടരുന്നത് വകുപ്പിന്റെ പ്രവർത്തനക്ഷമതയെക്കുറിച്ചുള്ള ചോദ്യങ്ങൾക്കിടയാക്കുന്നു. സർക്കാരിന്റെ നയങ്ങളും പദ്ധതികളും നേട്ടങ്ങളും കൃത്യമായി പൊതുജനങ്ങളിലെത്തിക്കാൻ അടിയന്തര ഇടപെടൽ ഉണ്ടാകണമെന്ന ആവശ്യം ശക്തമാണ്.