വാഷിംഗ്ടൺ: ഇറാനുമായുള്ള സാധ്യമായ യുദ്ധത്തെക്കുറിച്ചും യെമനിലെ ഹൂത്തി പ്രതിസന്ധിയെക്കുറിച്ചും നിർണായക തീരുമാനങ്ങളെടുക്കാൻ പ്രസിഡന്റ് ഡൊണാൾഡ് ട്രംപ് ഭരണകൂടത്തിലെ മുതിർന്ന ദേശീയ സുരക്ഷാ ഉദ്യോഗസ്ഥർ രഹസ്യ കൂടിക്കാഴ്ച നടത്തി. യു.എസ് പ്രസിഡന്റുമാരുടെ ഔദ്യോഗിക വിശ്രമകേന്ദ്രമായ ക്യാമ്പ് ഡേവിഡിലായിരുന്നു അപ്രഖ്യാപിത യോഗം. മൂന്ന് യു.എസ് ഉദ്യോഗസ്ഥരെ ഉദ്ധരിച്ച് അന്താരാഷ്ട്ര വാർത്താ ഏജൻസിയായ ‘ആക്‌സിയോസ്’ ആണ് ഇക്കാര്യം പുറത്തുവിട്ടത്.
വൈസ് പ്രസിഡന്റ് ജെ.ഡി. വാൻസ് അധ്യക്ഷത വഹിച്ച യോഗത്തിൽ സ്റ്റേറ്റ് സെക്രട്ടറി മാർക്കോ റൂബിയോ, പ്രതിരോധ സെക്രട്ടറി പീറ്റ് ഹെഗ്സെത്ത്, വൈറ്റ് ഹൗസ് പ്രത്യേക ദൂതൻ സ്റ്റീവ് വിറ്റ്‌കോഫ്, സി.ഐ.എ ഡയറക്ടർ ജോൺ റാറ്റ്ക്ലിഫ്, ജോയിന്റ് ചീഫ്സ് ഓഫ് സ്റ്റാഫ് ജനറൽ ഡാൻ കീൻ തുടങ്ങിയ ഉന്നതർ പങ്കെടുത്തു. മണിക്കൂറുകൾ നീണ്ട ചർച്ചയിൽ നിർണായക തീരുമാനങ്ങൾ കൈക്കൊണ്ടതായാണ് സൂചന.
ഇറാനുമായുള്ള നയതന്ത്ര ചർച്ചകൾ പൂർണ്ണമായി സ്തംഭിച്ച പശ്ചാത്തലത്തിലാണ് യു.എസ് സൈനിക നീക്കങ്ങളെക്കുറിച്ച് ഗൗരവമായി ചിന്തിക്കുന്നത്. ഇറാനെതിരെ വൻതോതിലുള്ള സൈനിക നടപടിക്ക് പ്രസിഡന്റ് ട്രംപ് ഒരുങ്ങുന്നതായാണ് റിപ്പോർട്ടുകൾ. അതേസമയം, യെമനിൽ കൂടുതൽ ആഴത്തിലുള്ള സൈനിക ഇടപെടലുകൾ ഒഴിവാക്കാൻ അദ്ദേഹം ആഗ്രഹിക്കുന്നുണ്ടെങ്കിലും നിലവിലെ സാഹചര്യത്തിൽ നിലപാടുകളിൽ മാറ്റം വന്നേക്കാം.
അതേസമയം, യോഗത്തെക്കുറിച്ച് പ്രതികരിക്കാൻ വൈറ്റ് ഹൗസ് തയ്യാറായിട്ടില്ല. എന്നാൽ, ഇറാനെതിരായ ആസന്നമായ നടപടികളെക്കുറിച്ചുള്ള മാധ്യമപ്രവർത്തകരുടെ ചോദ്യത്തിന് ‘കാര്യങ്ങൾ വളരെ നന്നായി പോകുന്നു, ഇറാൻ ഇപ്പോൾ നല്ല അവസ്ഥയിലല്ല’ എന്നായിരുന്നു ട്രംപിന്റെ പ്രതികരണം. 2025 ജൂണിൽ ഇറാനും ഇസ്രായേലും തമ്മിൽ നേരിട്ട് ഏറ്റുമുട്ടുന്നതിന് തൊട്ടുമുമ്പാണ് സമാനമായ രീതിയിൽ അവസാനമായി ക്യാമ്പ് ഡേവിഡിൽ അപ്രഖ്യാപിത യോഗം ചേർന്നത്.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group