തെഹ്റാൻ– ഹോർമുസ് കടലിടുക്കിൽ മൂന്ന് ടാങ്കറുകൾക്ക് നേരെ ആക്രമണം നടന്ന് മണിക്കൂറുകൾക്ക് ശേഷം, ഇറാൻ എണ്ണ വിൽപനയ്ക്ക് നൽകിയിരുന്ന താൽക്കാലിക ലൈസൻസ് അമേരിക്ക റദ്ദാക്കി. യു.എസും ഇറാനും തമ്മിലുള്ള യുദ്ധം അവസാനിപ്പിക്കാനുള്ള ഇടക്കാല കരാറിന്റെ ഭാഗമായാണ് ഈ താൽക്കാലിക ലൈസൻസ് അനുവദിച്ചിരുന്നത്. ഇന്ധന-ഷിപ്പിംഗ് ജലപാതയിൽ ഏപ്രിൽ അവസാനം മുതൽ ഒറ്റ ദിവസം കൊണ്ട് നടക്കുന്ന ഏറ്റവും കൂടുതൽ ആക്രമണങ്ങളാണിതെന്ന് യു.എൻ ഇന്റർനാഷണൽ മാരിടൈം ഓർഗനൈസേഷൻ വ്യക്തമാക്കി. സാധാരണ ഷിപ്പിംഗ് രീതികൾ പുനഃസ്ഥാപിക്കാനും യുദ്ധത്തിന്റെ ആഗോള സാമ്പത്തിക സമ്മർദ്ദം ലഘൂകരിക്കാനുമുള്ള ശ്രമങ്ങൾക്കിടെ ഉണ്ടായ പുതിയ ആക്രമണങ്ങൾ ഹോർമുസ് കടലിടുക്കിലെ ഗതാഗതത്തെ സ്തംഭിപ്പിക്കുമെന്ന് ഭീഷണി ഉയർത്തുന്നു.
കടലിടുക്കിലെ ഇറാന്റെ നടപടികൾ അസ്വീകാര്യമാണെന്നും അതിന്റെ അനന്തരഫലങ്ങൾ നേരിടേണ്ടതുണ്ടതിനാലുമാണ് ലൈസൻസ് റദ്ദാക്കിയതെന്ന് യു.എസ് ഉദ്യോഗസ്ഥൻ അറിയിച്ചു. ജർമ്മനിയിലോ മറ്റോ ജൂണിൽ പ്രഖ്യാപിച്ച ഈ ഇളവ് പ്രകാരം ഓഗസ്റ്റ് 21 വരെ ഇറാനെ അസംസ്കൃത എണ്ണയും ഡെറിവേറ്റീവുകളും ഉൽപാദിപ്പിക്കാനും വില്ക്കാനും വിതരണം ചെയ്യാനും അനുവദിച്ചിരുന്നു.
ലൈസൻസ് റദ്ദാക്കാനുള്ള യു.എസ് നീക്കത്തെ ഇറാൻ വിദേശ മന്ത്രാലയം ശക്തമായി അപലപിച്ചു. ഇത് ഇടക്കാല കരാറിന്റെ ലംഘനമാണെന്നും ഈ പ്രതിബദ്ധതാ ലംഘനത്തിന്റെ അനന്തരഫലങ്ങളുടെ ഉത്തരവാദിത്തം യു.എസ് സർക്കാരിനാണെന്നും ഇറാൻ വിദേശ മന്ത്രാലയം പ്രസ്താവനയിൽ പറഞ്ഞു. യു.എസിന്റെ പുതിയ നടപടികൾ കരാറിന്റെ ലംഘനമാണെന്ന് ഇറാൻ ഡെപ്യൂട്ടി വിദേശ മന്ത്രി കാസിം ഗാരീബാബാദിയും എക്സിലെ (X) പോസ്റ്റിൽ വ്യക്തമാക്കി.
ഒമാൻ തീരത്ത് നിന്ന് സഞ്ചരിക്കുകയായിരുന്ന ടാങ്കറിന് ആക്രമണത്തിൽ തീപിടിച്ചതായി യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷൻസ് സെന്റർ അറിയിച്ചു. തങ്ങളുടെ മുന്നറിയിപ്പുകൾ അവഗണിച്ചതിനെ തുടർന്നാണ് ദ്രവീകൃത പ്രകൃതി വാതക ടാങ്കറിനു നേരെ ആക്രമണം നടത്തിയതെന്ന് ഇറാൻ സ്റ്റേറ്റ് ടെലിവിഷൻ വ്യക്തമാക്കി. ആക്രമണം നേരിട്ട മറ്റ് രണ്ട് കപ്പലുകൾക്ക് ചില കേടുപാടുകൾ സംഭവിച്ചെങ്കിലും ആർക്കും പരിക്കേറ്റിട്ടില്ലെന്നും രണ്ട് കപ്പലുകളും യാത്ര തുടർന്നതായും യു.കെ മാരിടൈം ഏജൻസി അറിയിച്ചു.
ഹോർമുസ് കടലിടുക്കിലൂടെയുള്ള തങ്ങളുടെ അംഗീകൃത പാത മാത്രമാണ് സുരക്ഷിതമെന്ന് ഇറാൻ ആവർത്തിച്ച് പ്രഖ്യാപിച്ചിരുന്നു. എന്നാൽ ഒമാൻ തീരത്തിന് സമീപം മറ്റൊരു പാത ഉപയോഗിച്ച കപ്പലുകളെയാണ് ഇറാൻ ആക്രമിച്ചതെന്ന് സംശയിക്കുന്നു. മൂന്ന് ആക്രമണങ്ങളും ഒമാൻ തീരത്തോ അയൽരാജ്യമായ യു.എ.ഇയിലോ ആണ് നടന്നതെന്ന് യു.കെ ഏജൻസി നൽകിയ സ്ഥല വിശദാംശങ്ങൾ വ്യക്തമാക്കുന്നു. അതിനാൽ കപ്പലുകൾ ഒമാനിനടുത്തുള്ള പാത ഉപയോഗിച്ചിരിക്കാനാണ് സാധ്യതയെന്നും വിലയിരുത്തപ്പെടുന്നു.