കുവൈത്ത് സിറ്റി – തുടര്ച്ചയായി രണ്ടാം ദിവസവും ഇറാനില് അമേരിക്ക നടത്തിയ ആക്രമണങ്ങള്ക്ക് തിരിച്ചടിയായി കുവൈത്തിലും ബഹ്റൈനിലും ഖത്തറിലും ഇറാന് ആക്രമണങ്ങള് നടത്തി. മിസൈലുകളും ഡ്രോണുകളും തടഞ്ഞ് തകര്ത്തതായി കുവൈത്തും ബഹ്റൈനും അറിയിച്ചു. ഇറാന്റെ മിസൈല് ആക്രമണങ്ങള് പരാജയപ്പെടുത്തിയതായി ബഹ്റൈന് സൈന്യം വ്യക്തമാക്കി. അചഞ്ചലമായ നിശ്ചയദാര്ഢ്യത്തോടും ഉയര്ന്ന പോരാട്ട സന്നദ്ധതയോടും കൂടി, ബഹ്റൈന് പ്രതിരോധ സേനയുടെ വ്യോമ പ്രതിരോധ സംവിധാനങ്ങള് ഇന്ന് രാവിലെ ഇറാന് വ്യോമാക്രമണങ്ങളെ നേരിടുകയും തടയുകയും നശിപ്പിക്കുകയും ചെയ്തുവെന്ന് ജനറല് കമാന്ഡ് വ്യക്തമാക്കുന്നതായി ബഹ്റൈന് സൈന്യം പ്രസ്താവനയില് പറഞ്ഞു. ഇറാന് ആക്രമണത്തെ കുറിച്ച് മുന്നറിയിപ്പ് നല്കാനായി വ്യോമാക്രമണ സൈറണുകള് സജീവമാക്കിയതായി ബഹ്റൈന് ആഭ്യന്തര മന്ത്രാലയം നേരത്തെ അറിയിച്ചു. സുരക്ഷാ ഭീഷണി ഉയര്ന്നതാണെന്ന് ഖത്തര് ആഭ്യന്തര മന്ത്രാലയം വ്യക്തമാക്കി. എല്ലാവരും വീടിനുള്ളില് തന്നെ തുടരണമെന്നും പുറത്തുപോകുന്നത് ഒഴിവാക്കണമെന്നും ജനാലകളില് നിന്നും തുറന്ന സ്ഥലങ്ങളില് നിന്നും അകന്നു നില്ക്കണമെന്നും ഖത്തര് ആഭ്യന്തര മന്ത്രാലയം അഭ്യര്ഥിച്ചു.
അമേരിക്ക നടത്തിയ ആക്രമണങ്ങള്ക്ക് പ്രതികാരമായി, കുവൈത്ത്, ഖത്തര്, ബഹ്റൈന് എന്നിവിടങ്ങളിലെ യു.എസ് സൈനിക കേന്ദ്രങ്ങള് ഡ്രോണുകള് ഉപയോഗിച്ച് ആക്രമിച്ചതായി ഇറാന് സായുധ സേന അറിയിച്ചു. മേഖലയിലെ യു.എസ് താവളങ്ങള്ക്കെതിരായ ഇറാന് സായുധ സേനയുടെ ആക്രമണങ്ങളുടെ തുടര്ച്ചയെന്നോണം, കുവൈത്തിലെ പാട്രിയറ്റ് മിസൈല് പ്രതിരോധ സംവിധാനം, ഖത്തറിലെ മുന്കൂര് മുന്നറിയിപ്പ് സംവിധാനം, ബഹ്റൈനിലെ ഇന്ധന ഡിപ്പോകള് എന്നിവ വ്യത്യസ്ത തരം ഡ്രോണുകള് ഉപയോഗിച്ച് ആക്രമിച്ചതായി ഇറാന് സൈന്യം പ്രസ്താവിച്ചു. ബഹ്റൈന് ആഭ്യന്തര മന്ത്രാലയം പൗരന്മാരോടും പ്രവാസികളോടും ശാന്തത പാലിക്കാനും ഏറ്റവും അടുത്തുള്ള സുരക്ഷിത സ്ഥലത്ത് അഭയം തേടാനും ഔദ്യോഗിക ചാനലുകളിലൂടെ വാര്ത്തകള് പിന്തുടരാനും ആവശ്യപ്പെട്ടു.
യു.എസ് ആക്രമണങ്ങള്ക്ക് പ്രതികാരമായി ബഹ്റൈനിലെയും കുവൈത്തിലെയും അമേരിക്കന് സൈനിക താവളങ്ങള് ലക്ഷ്യമിട്ട് ആക്രമണങ്ങള് നടത്തിയതായി റെവല്യൂഷണറി ഗാര്ഡ് അറിയിച്ചു. കുവൈത്തിലെ അരിഫ്ജാന്, അലി അല്സാലിം വ്യോ താവളങ്ങളിലെയും ബഹ്റൈനിലെ ജുഫൈര്, ശൈഖ് ഈസ വ്യോമതാവളങ്ങളിലെയും സുപ്രധാന അടിസ്ഥാന സൗകര്യങ്ങള് ലക്ഷ്യമിട്ട് ആക്രമണങ്ങള് നടത്തിയതായി റെവല്യൂഷണറി ഗാര്ഡ് പറഞ്ഞു. യു.എസ് ആക്രമണങ്ങള് ആവര്ത്തിച്ചാല് മേഖലയിലെ മറ്റ് താവളങ്ങളിലേക്ക് കൂടി തങ്ങളുടെ പ്രതികരണം വ്യാപിപ്പിക്കുമെന്നും റെവല്യൂഷണറി ഗാര്ഡ് മുന്നറിയിപ്പ് നല്കി.