ന്യൂയോർക്ക് സിറ്റി: ഐക്യരാഷ്ട്രസഭയുടെ പൊതുസഭയിൽ നയതന്ത്ര നാടകീയത. യു.എസ് പ്രസിഡന്റ് ഡൊണാൾഡ് ട്രംപ് പ്രസംഗിക്കവെ, ഇറാൻ പ്രതിനിധി സംഘം സഭയിൽ നിന്ന് ഇറങ്ങിപ്പോയി. ഇറാനെതിരായ സൈനിക നടപടിയെ ന്യായീകരിക്കുകയും കടുത്ത ഭാഷയിൽ മുന്നറിയിപ്പ് നൽകുകയും ചെയ്ത ഘട്ടത്തിലാണ് ഇറാൻ നയതന്ത്രജ്ഞർ വാക്കൗട്ട് നടത്തിയത്.
ഇറാനിൽ നിന്നുള്ള ഭീഷണികൾ തടയാൻ അമേരിക്കയ്ക്ക് മടിയില്ലെന്ന് ട്രംപ് തന്റെ പ്രസംഗത്തിൽ വ്യക്തമാക്കി. “51 വർഷമായി തുടരുന്ന ഇറാൻ ഭീകരതയുടെ ഭീഷണി അവസാനിപ്പിക്കാൻ ലോകരാഷ്ട്രങ്ങളുടെ ഐക്യത്തിനും നിശ്ചയദാർഢ്യത്തിനും സാധിക്കും. നാം ഒറ്റക്കെട്ടായി നിന്നാൽ ഭീകരതയില്ലാത്ത ലോകവും കുറഞ്ഞ എണ്ണവിലയും യാഥാർത്ഥ്യമാകും,” എന്ന് ട്രംപ് പറഞ്ഞു. പ്രശ്നങ്ങൾ പരിഹരിക്കാതെ നീട്ടിക്കൊണ്ടുപോകുന്നതിൽ തനിക്ക് വിശ്വാസമില്ലെന്നും അദ്ദേഹം കൂട്ടിച്ചേർത്തു.
“സൈനിക ശക്തിക്ക് മാത്രം സമാധാനം സാധ്യമല്ല”: അന്തോണിയോ ഗുട്ടെറസ്
അതേസമയം, വൻശക്തി രാജ്യങ്ങൾക്ക് കടുത്ത മുന്നറിയിപ്പുമായി യു.എൻ സെക്രട്ടറി ജനറൽ അന്റോണിയോ ഗുട്ടെറസ് രംഗത്തെത്തി. സൈനിക ശക്തി കൊണ്ടുമാത്രം ലോകത്ത് ശാശ്വത സമാധാനം കൈവരിക്കാനാകില്ലെന്നും തങ്ങളുടെ സ്വാധീനത്തിനും പരിധികളുണ്ടെന്ന് വൻശക്തികൾ തിരിച്ചറിയണമെന്നും അദ്ദേഹം ഓർമ്മിപ്പിച്ചു.
രണ്ട് അഞ്ച് വർഷത്തെ കാലാവധി പൂർത്തിയാക്കി ഈ വർഷം ഡിസംബർ 31-ന് സ്ഥാനമൊഴിയുന്ന ഗുട്ടെറസിന്റെ, പൊതുസഭയിലെ അവസാന പ്രസംഗമായിരുന്നു ഇത്. ഭൗമരാഷ്ട്രീയ പിരിമുറുക്കങ്ങൾ, യുദ്ധങ്ങൾ, കാലാവസ്ഥാ വ്യതിയാനം, ആർട്ടിഫിഷ്യൽ ഇന്റലിജൻസ് എന്നിവ ലോകത്തെ കൂടുതൽ വിഭജിക്കുകയാണെന്ന് അദ്ദേഹം ആശങ്ക പ്രകടിപ്പിച്ചു.
ഇറാൻ, ഗാസ, ഉക്രെയ്ൻ, സുഡാൻ, കോംഗോ, മ്യാൻമർ എന്നിവിടങ്ങളിലെ സംഘർഷങ്ങൾ രൂക്ഷമാകുന്ന സാഹചര്യത്തിൽ, പരസ്പര സഹകരണത്തിലധിഷ്ഠിതമായ ലോകക്രമത്തിനായി ലോകനേതാക്കൾ ഒന്നിക്കണമെന്ന് അദ്ദേഹം ആഹ്വാനം ചെയ്തു.