ബെംഗളുരു-ചിന്നസ്വാമി സ്‌റ്റേഡിയത്തില്‍ മുന്നില്‍ സ്വീകരണ ചടങ്ങിനെത്തിയ 11 പേര്‍ മരിക്കാനിടയായ സംഭവത്തില്‍ പരിപാടിയുടെ സംഘാടകരില്‍ ചിലരേയും ക്ലബ്ബ് ഭാരവാഹിയേയും അറസ്റ്റ് ചെയ്തു. റോയല്‍ ചാലഞ്ചേഴ്‌സ് ബെംഗളുരു (ആര്‍സിബി) മര്‍ക്കറ്റിംഗ് മേധാവി നിഖില്‍ സാസലെ, ഇവന്റ് മാനേജ്‌മെന്റ് കമ്പനിയായ ഡിഎന്‍എയുടെ ഉപാധ്യക്ഷന്‍ സുനില്‍ മാത്യു, കിരണ്‍, സുമന്ത് എന്നിവരേയാണ് പൊലീസ് അറസ്റ്റ് ചെയ്തത്.
ആര്‍സിബിയുടെ ആദ്യ ഐപിഎല്‍ കിരീട നേട്ടം ആഘോഷിക്കാന്‍ ചിന്നസ്വാമി സ്‌റ്റേഡിയത്തിലേക്കെത്തിയ താരങ്ങളെ കാണാന്‍ ആരാധകര്‍ കൂട്ടത്തോടെ തള്ളിക്കയറാന്‍ ശ്രമിച്ചപ്പോഴാണ് അപകടമുണ്ടായത്. ആര്‍സിബി ടീം മാനേജ്‌മെന്റ്, കര്‍ണ്ണാടക സ്റ്റേറ്റ് ക്രിക്കറ്റ് അസോസിയേഷന്‍ (കെഎസ് സിഎ), പരിപാടിയുടെ നടത്തിപ്പുകാരായ ഇവന്റ് മാനേജ്‌മെന്റ് കമ്പനി ഡിഎന്‍എ എന്റര്‍ടൈന്‍മെന്റ് നെറ്റ് വര്‍ക്ക് എന്നിവര്‍ക്കെതിരെ കുറ്റകരമായ അനാസ്ഥയ്ക്ക് പൊലീസ് കേസെടുത്ത് അന്വേഷണം തുടങ്ങിയിരുന്നു. 13 വയസ്സുകാരിയുള്‍പ്പെടെ 11 പേരാണ് അപകടത്തില്‍പെട്ട് മരിക്കാനിടയായത്. സ്വമേധയാ കേസെടുത്ത കര്‍ണ്ണാടക ഹൈക്കോടതി സര്‍ക്കാരിനോട് ഈ മാസം പത്തിനകം റിപ്പോര്‍ട്ട് സമര്‍പ്പിക്കാന്‍ ആവശ്യപ്പെട്ടു. ആരാധകരെ നിയന്ത്രിക്കുന്നതില്‍ വീഴ്ച സംഭവിച്ചതായി സര്‍ക്കാര്‍ ഹൈക്കോടതിയില്‍ തുറന്നുസമ്മതിച്ചിരുന്നു.
അതിനിടെ മുഖ്യമന്ത്രി സിദ്ധരാമയ്യ ജൂഡീഷ്യല്‍ അന്വേഷണവും പ്രഖ്യാപിച്ചു. ആര്‍സിബി മാനേജ്‌മെന്റ്, ഇവന്റ് മാനേജ്‌മെന്റ് കമ്പനി പ്രതിനിധികളെ ഉടന്‍ അറസ്റ്റ് ചെയ്യാനായിരുന്നു മുഖ്യമന്ത്രിയുടെ ഉത്തരവ്. സിറ്റി പൊലീസ് കമ്മീഷണര്‍, 4 പൊലീസ് ഉദ്യോഗസ്ഥര്‍ എന്നിവരെ സസ്‌പെന്‍ഡ് ചെയ്തു.