പാലക്കാട്: പാലക്കാട് എം.എൽ.എ രാഹുൽ മാങ്കൂട്ടത്തിൽ പീഡനക്കേസില് കസ്റ്റഡിയില്. പാലക്കാട് നഗരത്തിലെ ഹോട്ടലില് നിന്നും പ്രത്യേക അന്വേഷണ സംഘമാണ് രാഹുലിനെ പിടികൂടിയത്. വനിത പൊലീസ് ഉള്പ്പെടെയുള്ള സംഘം രാഹുല് താമസിച്ചിരുന്ന ഹോട്ടലിലേക്ക് രാത്രി 12 മണിയോടെ എത്തിയാണ് അറസ്റ്റ് ചെയ്തത്. മുറിയിലേക്ക് എത്തിയ പോലീസ് രാഹുലിനെ കസ്റ്റഡിയിലെടുത്ത് കൊണ്ടുപോകുകയായിരുന്നു. ലൈംഗിക പീഡനം, ഗർഭഛിദ്രം, സാമ്പത്തിക ചൂഷണം തുടങ്ങിയ കുറ്റങ്ങളാണ് ചുമത്തിയത്.
രാഹുലിന് എതിരെ നേരത്തെ ലഭിച്ച രണ്ടു പരാതികളിൽ മുൻകൂർ ജാമ്യം ലഭിച്ചിരുന്നു. പുതിയ പരാതിയിലാണ് അറസ്റ്റ്. അതീവരഹസ്യമായാണ് പോലീസ് എത്തി രാഹുലിനെ അറസ്റ്റ് ചെയ്തത്. തൃശ്ശൂരിലായിരുന്ന രാഹുൽ പാലക്കാട്ടേക്ക് തിരിച്ചെത്തിയത് രാത്രി 9 മണിയോടെയായിരുന്നു. പുതിയ പരാതി ലഭിച്ചതിന് പിന്നാലെ രാഹുല് മുഴുവന് സമയം പോലീസ് നിരീക്ഷണത്തിലായിരുന്നു. രാഹുലിന് എതിരെ യുവതി നിർണായക തെളിവുകൾ നൽകിയതായും സൂചനയുണ്ട്.