വെസ്റ്റ് ബാങ്ക് ആക്രമണത്തിൽ മകന് പരിക്കേറ്റതായി അമേരിക്കയിലെ ഇസ്രായേൽ സ്ഥാനപതി

തെൽഅവീവ്- അധിനിവിഷ്ട വെസ്റ്റ് ബാങ്കിൽ ബുധനാഴ്ച നടന്ന, കാർ ഓടിച്ചുകയറ്റിയുള്ള ആക്രമണത്തിൽ ഗുരുതരമായി പരിക്കേറ്റ സൈനികൻ തന്റെ മകനാണെന്ന് അമേരിക്കയിലെ ഇസ്രായേൽ അംബാസഡർ യെച്ചിയേൽ ലെയ്റ്റർ വെളിപ്പെടുത്തി. നെറിയക്ക് ഒരു അത്ഭുതം ആവശ്യമാണ്. തന്റെ മൂത്ത സഹോദരൻ മോശെ യെദിദ്യ ലെയ്റ്റർ കൊല്ലപ്പെട്ട ശേഷവും നെറിയ റിസർവ് സേനയിൽ സേവനം തുടരുകയായിരുന്നു- ലെയ്റ്റർ എക്സ് പ്ലാറ്റ്‌ഫോമിൽ കുറിച്ചു.
2023 നവംബറിൽ ഗാസയിലെ പോരാട്ടത്തിനിടെ കൊല്ലപ്പെട്ട തന്റെ മറ്റൊരു മകനെ കുറിച്ചാണ് അദ്ദേഹം പരാമർശിച്ചത്.

ഇദ്ദേഹത്തിന് പിന്തുണയുമായി നിരവധി ഇസ്രായേൽ രാഷ്ട്രീയ നേതാക്കൾ രംഗത്തെത്തി. എന്റെ ഭാര്യ സാറയും ഞാനും, ഇസ്രായേലിലെ മുഴുവൻ ജനങ്ങളോടൊപ്പം ചേർന്ന് ഒരു അത്ഭുതത്തിനായി പ്രാർഥിക്കുന്നു- പ്രധാനമന്ത്രി ബെഞ്ചമിൻ നെതന്യാഹു എക്സിലെ മറ്റൊരു പോസ്റ്റിൽ പ്രതികരിച്ചു.
റാമല്ലക്കടുത്തുള്ള ബെഞ്ചമിൻ ബ്രിഗേഡ് മേഖലയിലെ മക്കാബിം ചെക്ക്‌പോസ്റ്റിൽ ഇന്നലെയാണ് ആക്രമണം. സംഭവസ്ഥലത്തുണ്ടായിരുന്ന ഇസ്രായേൽ സേന അക്രമിയെ ഉടനടി വെടിവെച്ചു കൊന്നതായി ഇസ്രായേൽ മാധ്യമങ്ങൾ റിപ്പോർട്ട് ചെയ്തു. സംഭവത്തിൽ പോലീസ് അന്വേഷണം ആരംഭിച്ചു.