ഷിരൂർ: കർണാടകയിലെ ഷിരൂർ ഗംഗാവലിപ്പുഴയിൽ നിന്ന് അർജുന്റെ ലോറി കരയ്ക്ക് കയറ്റി. ക്യാബിനുള്ളിൽ കൂടുതൽ അസ്ഥികളുണ്ടെന്നാണ് വിവരം. ലോറിക്കകത്ത് നിന്ന് ഇവ പൂർണമായും ശേഖരിച്ച് ഡി.എൻ.എ ടെസ്റ്റിന് വിധേയമാക്കുമെന്ന് ഉദ്യോഗസ്ഥർ പറഞ്ഞു.
ലോറി കരക്കെത്തിച്ചപ്പോൾ ബാക്കിയായത് ചില കണ്ണീർക്കാഴ്ചകളാണ്. ലോറിയുടെ കാബിനുള്ളിൽ നിന്ന് കിട്ടിയ ഷർട്ടും ബനിയനും അടക്കം അർജുൻ ഉപയോഗിച്ചിരുന്നതാണെന്ന് സഹോദരൻ തിരിച്ചറിഞ്ഞു. അർജുന്റെ ബാഗ്, രണ്ട് ഫോണുകൾ, പാചകത്തിനുപയോഗിക്കുന്ന കുക്കർ ഉൾപ്പെടെയുള്ള പാത്രങ്ങൾ, വാച്ച്, ചെരിപ്പുകൾ എന്നിവയും കണ്ടെടുത്തു. മകന്റെ കളിപ്പാട്ടവുമുണ്ടായിരുന്നു ലോറിയിൽ. മകനായി അർജുൻ വാങ്ങിയതായിരുന്നു ഇതെന്ന് അനിയൻ അഭിജിത്ത് പ്രതികരിച്ചു.
കാബിന്റെ ഭാഗത്തുള്ള ചെളി നീക്കിയപ്പോഴാണ് ഇവയെല്ലാം കിട്ടിയത്. അർജുൻ ഉപയോഗിച്ച വസ്തുക്കൾ മുഴുവൻ ലോറിയിൽ നിന്ന് തിരികെ വീട്ടിലേക്ക് കൊണ്ടുവരണമെന്ന് ഭാര്യ ഷിരൂരിലുള്ള സഹോദരൻ ജിതിനോട് പറഞ്ഞു.
ഇന്നലെയാണ് അർജുന്റെ ശരീരഭാഗങ്ങളും ലോറിയും ഗംഗാവലി പുഴയിൽ നിന്നും കണ്ടെത്തിയത്. ഡി.എൻ.എ ഫലം കിട്ടിയാലുടൻ മൃതദേഹം ബന്ധുക്കൾക്ക് കൈമാറി നാട്ടിലെത്തിക്കാനാണ് പ്ലാൻ. ഇന്നുതന്നെ ഡി.എൻ.എ പരിശോധന പൂർത്തിയാക്കാനാണ് ശ്രമമെന്നും മൃതദേഹം നാട്ടിലെത്തിക്കാനുള്ള പൂർണ ചെലവ് വഹിക്കുമെന്നും കർണാടക സർക്കാർ അറിയിച്ചു.
അർജുൻ ഓടിച്ചിരുന്ന ലോറി പൂർണമായും പുഴക്കരയിലേക്ക് മാറ്റിയെന്നും കാണാതായ മറ്റ് രണ്ട് പേർക്കായുള്ള തിരച്ചിൽ തുടരുകയാണെന്നും അധികൃതർ വ്യക്തമാക്കി.