റിയാദ്- തവനൂര്‍ മണ്ഡലം റിയാദ് കെ.എം സി.സിയുടെ കീഴില്‍ പുറത്തൂര്‍ സി.എച്ച് ഡയാലിസ് സെന്ററിന്റെ നിര്‍മ്മാണത്തിലേക്ക് റിയാദ് ചാപ്റ്റര്‍ നടത്തുന്ന ടൈല്‍സ് ചലഞ്ചിന്റെ ആദ്യ ഗഡു ഫണ്ട് കൈമാറ്റവും തസ്‌കിയത്ത് ക്യാമ്പും സംഘടിപ്പിച്ചു. ആലത്തിയൂര്‍ മുസ്ലീംലീഗ് ഓഫീസില്‍ റിയാദ് കെഎംസിസി തവനൂര്‍ നിയോജക മണ്ഡലം പ്രസിഡണ്ട് അലിക്കുട്ടി കൂട്ടായിയുടെ അധ്യക്ഷതയില്‍ ചേര്‍ന്ന യോഗം മണ്ഡലം മുസ്ലിം ലീഗ് പ്രസിഡണ്ട് എം അബ്ദുല്ലക്കുട്ടി ഉദ്ഘാടനം ചെയ്തു. സൗദി കെഎംസിസി നാഷണല്‍ കമ്മിറ്റി ജനറല്‍ സെക്രട്ടറി അഷ്‌റഫ് വേങ്ങാട്ട് പുറത്തൂര്‍ സിഎച്ച് സെന്ററിനുള്ള ഫണ്ട് ഭാരവാഹികള്‍ക്ക് കൈമാറി.
ലോകസഭാ തെരെഞ്ഞെടുപ്പില്‍ കോണ്‍ഗ്രസിന്റെ നേതൃത്വത്തിലുള്ള ഇന്ത്യ മുന്നണിയെ അധികാരത്തിലേറ്റാന്‍ കേരളത്തിലെ യുഡിഎഫ് സ്ഥാനാര്‍ഥികളെ വിജയിപ്പിക്കണമെന്ന് കോഴിക്കോട് സൗത്ത് മണ്ഡലം മുസ്ലിം ലീഗ് ജനറല്‍ സെക്രട്ടറി അര്‍ശുല്‍ അഹമ്മദ് മുഖ്യപ്രഭാഷണത്തില്‍ പറഞ്ഞു. തസ്‌കിയത്ത് ക്യാമ്പ് ആലത്തിയൂര്‍ ജുമാ മസ്ജിദ് ഖത്തീബ് മുജ്തബ ഫൈസി നേതൃത്വം നല്‍കി.
ചടങ്ങില്‍ മണ്ഡലം മുസ്ലിം ലീഗ് ജനറല്‍ സെക്രട്ടറി ടി പി ഹൈദരലി, വൈസ് പ്രസിഡണ്ട് ആര്‍ കെ ഹമീദ്, സെക്രട്ടറി മുജീബ് പൂളക്കല്‍, തൃപ്രങ്ങോട് പഞ്ചായത്ത് മുസ്ലിംലീഗ് നേതാക്കളായ മുസ്തഫ ഹാജി, ജനറല്‍ സെക്രട്ടറി പി.കെ കമറുദ്ദീന്‍, യൂത്ത് ലീഗ് നേതാക്കളായ ഐ.പി ജലീല്‍, നാസിക് ബീരാഞ്ചിറ, ഷൗക്കത്ത് കുന്നത്ത്, എസ്ടിയു നേതാവ് കെ.പി ബാപ്പുട്ടി, എംഎസ്എഫ് മണ്ഡലം നേതാവ് റാഷിഖ്, റിയാദ് കെ.എം സി.സി നേതാക്കളായ കെ.സി ലത്തീഫ്, ഗഫൂര്‍ കൂട്ടായി, പുറത്തൂര്‍ സി എച്ച് സെന്റര്‍ ഭാരവാഹികളായ അസ്‌കര്‍ മാസ്റ്റര്‍, റഷീദ് ഫൈസി, ദുബായ് കെ.എം.സി.സി നേതാക്കളായ ഖാദര്‍ പെരുന്തല്ലൂര്‍, റിയാസ് പുറത്തൂര്‍, ജലീല്‍ പ്രസംഗിച്ചു
ഫസലുല്‍ ഹഖ് ബുഖാരി ഖിറാഅത്ത് നടത്തി. കെ.എം സി.സി റിയാദ് തവനൂര്‍ മണ്ഡലം ജനറല്‍ സെക്രട്ടറി റഷീദ് ചെറിയ പറപ്പൂര്‍ സ്വാഗതവും മണ്ഡലം വൈസ് പ്രസിഡന്റ് അബൂബക്കര്‍ ആലത്തിയൂര്‍ നന്ദിയും പറഞ്ഞു.