മക്ക: വിശുദ്ധ കഅബാലയത്തിൽ പുതിയ ‘കിസ്വ’ (പുതപ്പ്) അണിയിച്ചു. കിംഗ് അബ്ദുൽ അസീസ് കിസ്വ കോംപ്ലക്സിൽ നിന്നുള്ള 150-ലധികം വിദഗ്ധ തൊഴിലാളികൾ ചേർന്നാണ് ചടങ്ങുകൾ പൂർത്തിയാക്കിയത്. മുൻവർഷങ്ങളെ അപേക്ഷിച്ച് വെറും മൂന്ന് മണിക്കൂറിനുള്ളിൽ കിസ്വ മാറ്റാൻ സാധിച്ചു എന്നത് ഇത്തവണത്തെ പ്രത്യേകതയാണ്. ചരിത്രത്തിൽ ആദ്യമായാണ് ഇത്രയും കുറഞ്ഞ സമയത്തിനകം ഈ ചടങ്ങ് പൂർത്തിയാകുന്നത്.
ഇന്നലെ വൈകീട്ടോടെയാണ് പ്രത്യേക വാഹനങ്ങളിൽ പുതിയ കിസ്വ ഹറമിലെ മതാഫിൽ എത്തിച്ചത്. തുടർന്ന് പഴയ കിസ്വയുടെ കെട്ടുകൾ അഴിച്ചുമാറ്റി, പുതിയത് അണിയിക്കുകയായിരുന്നു. നാല് വശങ്ങളിലെയും തുണികൾ പ്രത്യേകമായി തൂക്കിയ ശേഷം പരസ്പരം തുന്നിച്ചേർക്കുകയാണ് ചെയ്തത്. കഅ്ബയുടെ കവാടത്തിന് മുകളിൽ തൂക്കുന്ന കർട്ടനും ഇതിനൊപ്പം സ്ഥാപിച്ചു. രണ്ടര കോടിയിലധികം റിയാൽ ചെലവഴിച്ചാണ് ഈ കിസ്വ നിർമിച്ചിരിക്കുന്നത്.
ചെലവ് 2.5 കോടി റിയാൽ; നിർമാണത്തിന് സ്വർണ്ണവും വെള്ളിയും
ഹറംകാര്യ വകുപ്പിന് കീഴിൽ ഉമ്മുൽജൂദ് ഡിസ്ട്രിക്ടിൽ പ്രവർത്തിക്കുന്ന ഫാക്ടറിയിലാണ് കിസ്വ തയാറാക്കുന്നത്. പ്രകൃതിദത്തമായ പട്ടുനൂലിനൊപ്പം 120 കിലോ സ്വർണ്ണ നൂലുകളും 100 കിലോ വെള്ളി നൂലുകളും ഇതിനായി ഉപയോഗിച്ചിട്ടുണ്ട്. ഏകദേശം 1,415 കിലോഗ്രാമാണ് ഇതിന്റെ തൂക്കം. 14 മീറ്റർ ഉയരമുള്ള കിസ്വയ്ക്ക് 47 മീറ്റർ നീളമുള്ള ബെൽറ്റുമുണ്ട്. ലോകത്തിലെ ഏറ്റവും നീളം കൂടിയ (16 മീറ്റർ) കംപ്യൂട്ടർ തയ്യൽ മെഷീൻ ഉപയോഗിച്ചാണ് ഇത് തുന്നുന്നത്. ഇരുന്നൂറിലധികം സ്വദേശി ജീവനക്കാരാണ് ഈ കോംപ്ലക്സിൽ ജോലി ചെയ്യുന്നത്.
സുരക്ഷയ്ക്കായി കിസ്വ ഉയർത്തിക്കെട്ടി
ഹജ്ജ് തീർഥാടകരുടെ കടുത്ത തിരക്കിൽപ്പെട്ട് കേടുപാടുകൾ സംഭവിക്കാതിരിക്കാൻ കിസ്വയുടെ താഴത്തെ ഭാഗം തറനിരപ്പിൽ നിന്ന് മൂന്ന് മീറ്റർ ഉയരത്തിൽ മുകളിലേക്ക് ചുരുട്ടിവെച്ചിട്ടുണ്ട്. ഈ ഭാഗം വെളുത്ത പട്ടുതുണി കൊണ്ടാണ് മൂടിയിരിക്കുന്നത്. ഹജ്ജ് സീസൺ അവസാനിക്കുന്നതോടെ കിസ്വ പഴയപടി താഴ്ത്തിക്കെട്ടും.
മുൻകാലങ്ങളിൽ ഹജ്ജ് ദിനമായ ദുൽഹജ്ജ് ഒൻപതിനാണ് കിസ്വ മാറ്റിയിരുന്നത്. എന്നാൽ 2022 മുതൽ സൽമാൻ രാജാവിന്റെ നിർദേശപ്രകാരം ഇത് ഇസ്ലാമിക പുതുവർഷ ദിനമായ മുഹറം ഒന്നിലേക്ക് മാറ്റുകയായിരുന്നു.
