ജിദ്ദ: സൗദി അറേബ്യയിൽ ജലം, മലിനജലം, വൈദ്യുതി സേവനങ്ങളുടെ നിരക്കുകൾ വർദ്ധിപ്പിക്കാൻ തീരുമാനിച്ചതോടെ രാജ്യത്തെ പ്രവാസികളുടെ ജീവിതച്ചെലവ് കുത്തനെ ഉയരും. പുതിയ നിരക്ക് വർദ്ധനവ് 2027 ജനുവരി മുതൽ പ്രാബല്യത്തിൽ വരും. എന്നാൽ നിരക്ക് വർദ്ധന മൂലമുണ്ടാകുന്ന സാമ്പത്തിക ഭാരം ലഘൂകരിക്കുന്നതിനായി സ്വദേശികൾക്ക് സൗദി സർക്കാർ പ്രത്യേക സമാശ്വാസ നടപടികൾ പ്രഖ്യാപിച്ചിട്ടുണ്ട്.
പുതിയ താരിഫ് നടപ്പിലാക്കുമ്പോൾ ഉപഭോഗത്തിനനുസരിച്ച് ബിൽ തുകകളിൽ ഉണ്ടാകുന്ന വർദ്ധനവ് ലീഗൽ കൺസൾട്ടന്റ് ബദർ അൽ ശുവൈഅർ വിശദീകരിച്ചു. ഈ കണക്കുകൾ ഏകദേശ ഉദാഹരണങ്ങൾ മാത്രമാണെന്നും, മൂല്യവർദ്ധിത നികുതി (VAT) ഇതിൽ ഉൾപ്പെടുത്തിയിട്ടില്ലെന്നും അദ്ദേഹം വ്യക്തമാക്കി. വസ്തുവിന്റെ വലുപ്പമല്ല, മറിച്ച് ഉപഭോഗത്തിന്റെ അളവും മീറ്റർ സ്പെസിഫിക്കേഷനുകളും റെസിഡൻഷ്യൽ യൂണിറ്റുകളുടെ എണ്ണവുമാണ് ബിൽ തുക നിർണ്ണയിക്കുന്നത്.
⚡ വൈദ്യുതി ബില്ലിലെ പ്രധാന മാറ്റങ്ങൾ (ഏകദേശ കണക്ക്):
100 റിയാൽ അടച്ചിരുന്നവർ ഇനി 183 റിയാൽ അടയ്ക്കണം.
200 റിയാൽ അടച്ചിരുന്ന ബിൽ 300 റിയാലായും, 500 റിയാൽ ബിൽ 650 റിയാലായും ഉയരും.
1,000 റിയാലിന്റെ ബിൽ 1,233 റിയാലായും, 2,000 റിയാലിന്റെ ബിൽ 2,350 റിയാലായും വർദ്ധിക്കും.
ഉപഭോഗമില്ലാതെ ഒഴിഞ്ഞുകിടക്കുന്ന അപ്പാർട്ട്മെന്റുകളുടെ പ്രതിമാസ മിനിമം ബിൽ 10 റിയാലിൽ നിന്ന് 70 റിയാലായി ഉയരും.
1,000 യൂണിറ്റ് ഉപയോഗിക്കുന്ന അപ്പാർട്ട്മെന്റിന്റെ ബിൽ 190 റിയാലിൽ നിന്ന് 280 റിയാലാവും.
💧 ജല-മലിനജല നിരക്കുകളിലെ മാറ്റങ്ങൾ:
ഒഴിഞ്ഞുകിടക്കുന്ന അപ്പാർട്ട്മെന്റിന്റെ ജല ബിൽ പ്രതിമാസം 5 റിയാലിൽ നിന്ന് 30 റിയാലായി വർദ്ധിക്കും.
പ്രതിമാസം 10,000 ലിറ്റർ വെള്ളം ഉപയോഗിക്കുന്ന അപ്പാർട്ട്മെന്റിന്റെ ബിൽ 6.50 റിയാലിൽ നിന്ന് 45 റിയാലായി ഉയരും.
30,000 ലിറ്റർ ഉപയോഗിക്കുന്ന വില്ലയുടെ ബിൽ 34.75 റിയാലിൽ നിന്ന് 127.50 റിയാലായി വർദ്ധിക്കും.