മക്ക – ഈ വര്‍ഷത്തെ ഹജിനുള്ള സിവില്‍ ഡിഫന്‍സ് ഡയറക്ടറേറ്റ് സംവിധാനങ്ങളുടെ ഭാഗമായി കൃത്രിമബുദ്ധി ഉപയോഗിച്ച് മെച്ചപ്പെടുത്തിയ ഫാല്‍ക്കണ്‍ (സഖ്ര്‍) എന്ന് പേരിട്ട അഗ്നിശമന ഡ്രോണ്‍ പുറത്തിറക്കിയതായി സിവില്‍ ഡിഫന്‍സ് അറിയിച്ചു. ഉയര്‍ന്ന പ്രദേശങ്ങളിലും, എത്തിച്ചേരാന്‍ പ്രയാസമുള്ള സ്ഥലങ്ങളിലും അഗ്നിശമന, രക്ഷാ പ്രവര്‍ത്തനങ്ങള്‍ക്കായി ഈ ഡ്രോണ്‍ രൂപകല്‍പന ചെയ്തിരിക്കുന്നു. ഏറെ ഉയര്‍ന്ന ഉയരത്തില്‍ 12 മണിക്കൂര്‍ തുടര്‍ച്ചയായി പ്രവര്‍ത്തിക്കാന്‍ സാധിക്കുന്ന ഈ ഡ്രോണിന് 40 കിലോഗ്രാം ഭാരം വഹിക്കാന്‍ കഴിയും.
മള്‍ട്ടി പര്‍പ്പസ് അഗ്നിശമന സംവിധാനം, രക്ഷാപ്രവര്‍ത്തനം, നിയന്ത്രണം, സുരക്ഷാ സംവിധാനങ്ങള്‍, തെര്‍മല്‍ ക്യാമറകള്‍, അപകട സ്ഥലത്തിന്റെ തത്സമയ സംപ്രേക്ഷേണം എന്നിവ ഇതില്‍ അടങ്ങിയിരിക്കുന്നു. ഡ്രോണിനെ കമാന്‍ഡ് ആന്റ് കണ്‍ട്രോള്‍ സെന്ററുമായി ബന്ധിപ്പിക്കാനും കഴിയും.
ഉയര്‍ന്ന കെട്ടിടങ്ങള്‍, വ്യാവസായിക കേന്ദ്രങ്ങള്‍, അപകടകരമായ വസ്തുക്കള്‍ അടങ്ങിയ സ്ഥലങ്ങള്‍, തിരക്കേറിയ പ്രദേശങ്ങള്‍, കാട്ടുതീ എന്നിവിടങ്ങളില്‍ ഫാല്‍ക്കണ്‍ ഡ്രോണിന് ഒന്നിലധികം ഉപയോഗങ്ങളുണ്ട്. ഉയര്‍ന്ന പ്രതികരണ വേഗത, ഉദ്യോഗസ്ഥര്‍ക്കുള്ള അപകടസാധ്യത കുറക്കല്‍, തത്സമയ ഇമേജിംഗ് വഴി തീരുമാനമെടുക്കാനുള്ള പിന്തുണ എന്നിവയും ഇതിന്റെ സവിശേഷതകളാണ്.
ഹജിനിടെ പുണ്യസ്ഥലങ്ങളില്‍ മരുന്നുകളും മെഡിക്കല്‍ വസ്തുക്കളും വേഗത്തില്‍ എത്തിക്കാന്‍ ആരോഗ്യ മന്ത്രാലയവും ഇത്തവണ ഡ്രോണുകള്‍ ഉപയോഗിക്കുന്നുണ്ട്. തീര്‍ഥാടകര്‍ക്ക് നല്‍കുന്ന മെഡിക്കല്‍ സേവനങ്ങള്‍ ത്വരിതപ്പെടുത്താനും അടിയന്തിര സാഹചര്യങ്ങളോടുള്ള പ്രതികരണം മെച്ചപ്പെടുത്താനുമുള്ള മന്ത്രാലയത്തിന്റെ ശ്രമങ്ങളുടെ ഭാഗമായാണ് പുതിയ സേവനം ആരംഭിച്ചത്. മരുന്നുകളുടെ ഡെലിവറി സമയം ഒന്നര മണിക്കൂറില്‍ നിന്ന് വെറും ആറ് മിനിറ്റായി കുറക്കാന്‍ പുതിയ സേവനം ഫലപ്രദമായി സഹായിക്കുന്നു. ഇത് ഹജ് സീസണില്‍ മെഡിക്കല്‍ ലോജിസ്റ്റിക്കല്‍ പിന്തുണയുടെ വേഗതയില്‍ ഗുണപരമായ മാറ്റം വരുത്തുന്നു. ആരോഗ്യ സേവനങ്ങളുടെ ഗുണനിലവാരം വര്‍ധിപ്പിക്കാനും അവശ്യ സാധനങ്ങള്‍ എത്രയും വേഗം ആവശ്യമുള്ള സ്ഥലങ്ങളില്‍ എത്തുന്നുണ്ടെന്ന് ഉറപ്പാക്കാനുമുള്ള സാങ്കേതിക, സ്മാര്‍ട്ട് പരിഹാരങ്ങളുടെ ഉപയോഗം വിപുലീകരിക്കുന്നതിന്റെ ഭാഗമായാണ് പുതിയ സേവനമെന്ന് ആരോഗ്യ മന്ത്രാലയം പറഞ്ഞു.