റിയാദ്- സൗദി അറേബ്യയിലുള്ള ഇന്ത്യൻ പൗരന്മാരോട് ശാന്തരായിരിക്കാൻ സൗദിയിലെ ഇന്ത്യൻ അംബാസഡർ വിപുൽ അഭ്യർത്ഥിച്ചു. വ്യോമാക്രമണ സമയത്ത് പ്രാദേശിക അധികാരികൾ നൽകുന്ന നിർദ്ദേശങ്ങൾ പാലിക്കാനും വീടുകൾക്കുള്ളിൽ തന്നെ തുടരാനും സൗദി അറേബ്യയിലെ ഇന്ത്യൻ അംബാസഡർ വിപുൽ ആവശ്യപ്പെട്ടു. വിമാന സർവീസുകളിലുണ്ടായ തടസ്സങ്ങൾ ചൂണ്ടിക്കാട്ടിയ അദ്ദേഹം, ആക്രമണത്തിൽ ബാധിക്കപ്പെട്ട ഇന്ത്യക്കാർക്ക് എല്ലാവിധ സഹായങ്ങളും ഉറപ്പുനൽകി.
സൗദി അറേബ്യയിലെ ഇന്ത്യൻ എംബസിയുടെ ഔദ്യോഗിക ‘X’ (ട്വിറ്റർ) ഹാൻഡിലിൽ പങ്കുവെച്ച വീഡിയോ സന്ദേശത്തിലാണ് അംബാസഡർ വിപുൽ ഇക്കാര്യം വ്യക്തമാക്കിയത്. സൗദിയിലെ സിവിലിയൻ കേന്ദ്രങ്ങൾക്ക് നേരെയുണ്ടായ ആക്രമണങ്ങളെ ഇന്ത്യ അപലപിച്ചതായും അവിടുത്തെ ജനങ്ങളോടും നേതൃത്വത്തോടും പൂർണ്ണ ഐക്യദാർഢ്യം പ്രകടിപ്പിക്കുന്നതായും അദ്ദേഹം പറഞ്ഞു.
“നിങ്ങൾ കണ്ടതുപോലെ, സൗദി അറേബ്യയിലെ സിവിലിയൻ സൗകര്യങ്ങൾക്കും അടിസ്ഥാന സൗകര്യങ്ങൾക്കും നേരെയുണ്ടായ ആക്രമണങ്ങളെ ഇന്ത്യ അപലപിച്ചിട്ടുണ്ട്. സൗദി അറേബ്യയിലെ ജനങ്ങളോടും ഭരണകൂടത്തോടും ഞങ്ങൾ പൂർണ്ണ ഐക്യദാർഢ്യം പ്രകടിപ്പിക്കുന്നു. ഈ ആക്രമണങ്ങളിൽ ജീവൻ പൊലിഞ്ഞവരുടെ കുടുംബങ്ങൾക്ക് ഞങ്ങൾ അനുശോചനം അറിയിക്കുകയും പരിക്കേറ്റവർ വേഗത്തിൽ സുഖം പ്രാപിക്കട്ടെ എന്ന് ആശംസിക്കുകയും ചെയ്യുന്നു,” – അംബാസഡർ പറഞ്ഞു.
ഒക്ടോബർ 10-ന് റിയാദ് വിമാനത്താവളത്തിലുണ്ടായ ആക്രമണത്തിൽ ഒരു ഇന്ത്യൻ പൗരൻ കൊല്ലപ്പെടുകയും 11 പേർക്ക് പരിക്കേൽക്കുകയും ചെയ്തതായി വിപുൽ അറിയിച്ചു. മരിച്ചയാളുടെ കുടുംബവുമായി എംബസി ഉദ്യോഗസ്ഥർ ബന്ധപ്പെട്ടു വരികയാണെന്നും പരിക്കേറ്റവരുടെ കുടുംബങ്ങൾക്കും ആശുപത്രി അധികൃതർക്കും ആവശ്യമായ സഹായങ്ങൾ നൽകാൻ എംബസി ഏകോപനം നടത്തുന്നുണ്ടെന്നും അദ്ദേഹം കൂട്ടിച്ചേർത്തു.
വിമാന സർവീസുകളിലുണ്ടായ തടസ്സങ്ങളെക്കുറിച്ച് സംസാരിച്ച അംബാസഡർ, റിയാദ് വിമാനത്താവളം അടഞ്ഞുകിടക്കുകയാണെന്നും ഇന്ത്യൻ വിമാനക്കമ്പനികൾ സർവീസുകൾ നിർത്തിവെച്ചിരിക്കുകയാണെന്നും അറിയിച്ചു. എന്നാൽ സൗദി വിമാനക്കമ്പനികളായ സൗദിയ (Saudia), ഫ്ലൈനാസ് (Flynas), ഫ്ലൈഅദീൽ (Flyadeal) എന്നിവ സർവീസ് നടത്തുന്നുണ്ട്. അയൽരാജ്യങ്ങളായ ഗൾഫ് രാജ്യങ്ങൾ വഴി ലഭ്യമായ വിമാന സർവീസുകൾ ഉപയോഗപ്പെടുത്താൻ അദ്ദേഹം യാത്രക്കാരോട് നിർദ്ദേശിച്ചു.
” ഉംറ തീർത്ഥാടകർക്ക് ചില പ്രയാസങ്ങൾ സൃഷ്ടിച്ചിട്ടുണ്ട്. ഇത് പരിഹരിക്കുന്നതിനായി ഞങ്ങൾ ഹെൽപ്പ് ലൈനുകൾ ആരംഭിച്ചിട്ടുണ്ട്; ഇവയുടെ കോൺടാക്റ്റ് നമ്പറുകൾ ഞങ്ങളുടെ സോഷ്യൽ മീഡിയ പേജുകളിൽ ലഭ്യമാണ്,” എന്ന് പറഞ്ഞ അദ്ദേഹം, ഇന്ത്യയിൽ നിന്ന് സൗദി അറേബ്യയിലേക്ക് യാത്ര ചെയ്യാൻ പദ്ധതിയിടുന്നവർ തടസ്സങ്ങൾ പ്രതീക്ഷിച്ച് വേണം യാത്ര പ്ലാൻ ചെയ്യാനെന്നും നിർദ്ദേശിച്ചു.
റിയാദിലെ ഇന്ത്യൻ എംബസി വ്യാഴാഴ്ച പുറപ്പെടുവിച്ച ജാഗ്രതാ നിർദ്ദേശത്തിൽ റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിൽ വിമാന സർവീസുകൾ നിർത്തിവെച്ചിരിക്കുകയാണെന്നും ദമാം, ജിദ്ദ, മദീന വിമാനത്താവളങ്ങളിൽ ഭാഗിക തടസ്സങ്ങളോടെ സർവീസുകൾ തുടരുന്നുണ്ടെന്നും അറിയിച്ചു. ശനിയാഴ്ച വരെ സൗദിയിലേക്കും തിരിച്ചുമുള്ള വിമാനങ്ങൾ ഇന്ത്യൻ കമ്പനികൾ റദ്ദാക്കിയിട്ടുണ്ട്, എന്നാൽ സൗദിയ എയർലൈൻസ് ദമാം, ജിദ്ദ, മദീന എന്നിവിടങ്ങളിൽ നിന്ന് നിശ്ചിത സർവീസുകൾ നടത്തുന്നുണ്ട്.
▶️ सऊदी अरब में रह रहे भारतीय समुदाय के लिए राजदूत का संदेश | ▶️ Ambassador’s message to the Indian Community residing in the Kingdom of Saudi Arabia. https://t.co/cC67eM0ue3
— India in Saudi Arabia (@IndianEmbRiyadh) October 15, 2026
അടിയന്തിരമായി നാട്ടിലേക്ക് പോകേണ്ട ഇന്ത്യക്കാർക്ക് ബഹ്‌റൈൻ, കുവൈറ്റ്, ഖത്തർ തുടങ്ങിയ അയൽരാജ്യങ്ങളിൽ നിന്നുള്ള വിമാനങ്ങൾ ഉപയോഗപ്പെടുത്താം എന്നും ഇതിനാവശ്യമായ വിസകൾ യാത്രക്കാർ തന്നെ സ്വന്തമാക്കേണ്ടി വരുമെന്നും എംബസി വ്യക്തമാക്കി.
ഇന്ത്യക്കാർ ജാഗ്രത പാലിക്കണമെന്നും അദ്ദേഹം അഭ്യർത്ഥിച്ചു. “നിലവിലെ സാഹചര്യത്തിൽ എല്ലാവരും ശാന്തരും ജാഗരൂകരുമായിരിക്കേണ്ടത് പ്രധാനമാണ്. വ്യോമാക്രമണം ഉണ്ടാകുന്ന സാഹചര്യത്തിൽ ദയവായി വീടുകൾക്കോ കെട്ടിടങ്ങൾക്കോ ഉള്ളിൽ തന്നെ തുടരുക—പുറത്തിറങ്ങരുത്. ആക്രമണങ്ങളുടെ ചിത്രങ്ങളോ വീഡിയോകളോ എടുക്കുന്നതിൽ നിന്നും ഇന്ത്യൻ സമൂഹത്തിനിടയിൽ അത് പങ്കിടുന്നതിൽ നിന്നും ദയവായി പിന്മാറുക. ഇത് സൗദി നിയമപ്രകാരം കുറ്റകരമാണ്, വലിയ നിയമപ്രശ്നങ്ങൾക്ക് കാരണമായേക്കാം. – അദ്ദേഹം വ്യക്തമാക്കി.
മിസൈൽ, ഡ്രോൺ പ്രതിരോധ പ്രവർത്തനങ്ങളുടെയോ അവ പതിച്ച സ്ഥലങ്ങളുടെയോ ചിത്രങ്ങളോ വീഡിയോകളോ എടുക്കുന്നതും പ്രചരിപ്പിക്കുന്നതും പ്രാദേശിക നിയമപ്രകാരം ശിക്ഷാർഹമാണെന്ന് എംബസിയുടെ മുൻ നിർദ്ദേശത്തിലും മുന്നറിയിപ്പ് നൽകിയിരുന്നു.
എംബസിയും കോൺസുലേറ്റും പൂർണ്ണമായി പ്രവർത്തിക്കുന്നുണ്ടെന്നും പാസ്‌പോർട്ട്, അറ്റസ്റ്റേഷൻ സേവനങ്ങൾ തടസ്സമില്ലാതെ തുടരുന്നുണ്ടെന്നും അംബാസഡർ പറഞ്ഞു. എല്ലാറ്റിനുമുപരി, ദയവായി ശാന്തരായിരിക്കുക, പരിഭ്രാന്തരാകരുത്. സൗദി അറേബ്യയിൽ ജീവിക്കുന്ന നമ്മളെ സംബന്ധിച്ചിടത്തോളം, ഓഫീസുകൾ തുറന്നു പ്രവർത്തിക്കുന്നുണ്ടെന്നും എല്ലാ സേവനങ്ങളും ലഭ്യമാണെന്നും മനസ്സിലാക്കുക. ഞങ്ങളുടെ എംബസിയും കോൺസുലേറ്റും ഔട്ട്‌സോഴ്‌സ് ചെയ്ത സർവീസ് പ്രൊവൈഡറും സജീവമായി പ്രവർത്തിക്കുന്നുണ്ട്. അതിനാൽ പാസ്‌പോർട്ട്, അറ്റസ്റ്റേഷൻ സേവനങ്ങൾ ലഭിക്കുന്നതിന് തടസ്സങ്ങളൊന്നുമില്ല. ശാന്തരായിരിക്കുക-അദ്ദേഹം കൂട്ടിച്ചേർത്തു.
ഇതുകൂടാതെ, ആകാശ എയർ (Akasa Air) റിയാദിലേക്കും തിരിച്ചുമുള്ള സർവീസുകൾ ഒക്ടോബർ 24 വരെയും ജിദ്ദയിലേക്കുള്ളവ ഒക്ടോബർ 21 വരെയും നിർത്തിവെച്ചതായി എംബസി അറിയിച്ചു. ഇൻഡിഗോ (IndiGo) വിമാനങ്ങൾ റിയാദ്, ജിദ്ദ, ദമാം, മദീന എന്നിവിടങ്ങളിലേക്കുള്ള സർവീസുകൾ ഒക്ടോബർ 24 വരെ പൂർണ്ണമായി റദ്ദാക്കിയിട്ടുണ്ട്.
നിലവിലുള്ള സാഹചര്യം കണക്കിലെടുത്ത് സൗദി അധികൃതർ നൽകുന്ന നിർദ്ദേശങ്ങൾ തുടർന്നും പാലിക്കാനും ജാഗ്രത പാലിക്കാനും എംബസി ഇന്ത്യൻ പൗരന്മാരോട് അഭ്യർത്ഥിച്ചു.