റിയാദ്: മലപ്പുറം ജില്ലാ പ്രവാസി അസോസിയേഷന്റെ (മിഅ) ആഭിമുഖ്യത്തിൽ “ഖൽബിലെ ഫുട്ബോൾ ” എന്ന പേരിൽ സംഘടിപ്പിച്ച പരിപാടി റിയാദിലെ അൽ വഫ ഷോലമാളിൽ വിപുലമായ ആഘോഷങ്ങളോടെ നടന്നു. മിഅ സെക്രട്ടറി സഫീറലി തലാപ്പിൽ സ്വാഗതം ആശംസിച്ച ചടങ്ങിൽ വൈസ് പ്രസിഡന്റ് ഉമറലി അക്ബർ അധ്യക്ഷത വഹിച്ചു. അൽ വഫ ഗ്രൂപ്പ് ഡയറക്ടർ അബ്ദുനാസർ പരിപാടിയുടെ ഔദ്യോഗിക ഉദ്ഘാടനം നിർവഹിച്ചു. മിഅ ഉപദേശക സമിതി അംഗം ഇബ്രാഹീം സുബ്ഹാൻ, ഷോലാ മാൾ പ്രതിനിധി അബ്ദു എന്നിവർ ചടങ്ങിൽ ആശംസകൾ അർപ്പിച്ചു സംസാരിച്ചു. ലോകകപ്പ് ആവേശത്തിന്റെ ഭാഗമായി ടൂർണമെന്റിലെ ആദ്യ മത്സരമായ മെക്സിക്കോ – സൗത്ത് ആഫ്രിക്ക പോരാട്ടം 274 ഇഞ്ച് ഭീമൻ സ്ക്രീനിൽ കാണികൾക്കായി തത്സമയം പ്രദർശിപ്പിച്ചത് പരിപാടിയുടെ പ്രധാന ആകർഷണമായി.
പ്രമുഖ സൗദി ഫുട്ബാൾ ക്ലബ്ബുകളിലേക്ക് തിരഞ്ഞെടുക്കപ്പെട്ട മലയാളി യുവതാരങ്ങളായ അൽ ഹിലാൽ റിയാദ് ക്ലബ്ബിലെ കീർത്തജ വിനോദ്, അൽ അത്തിഫാഖ് എഫ്.സി. ദുബായിലെ തഹ്സീൻ റഹ്മാൻ മുജീബ്, അൽ ഷബാബ് എഫ്.സി. റിയാദിലെ ഫാദിൻ റഹ്മാൻ മുജീബ്, അൽ ഹിലാൽ അക്കാദമിയിലെ ഈഡൻ ജോൺ കോശി എന്നിവരെ ആദരിച്ചു. യുവതാരം കീർത്തജ വിനോദ് കിക്കോഫ് നിർവഹിച്ച ഷൂട്ടൗട്ട് മത്സരത്തിലും ജഗ്ലിങ്, ലോകകപ്പ് ക്വിസ് മത്സരങ്ങളിലും നിരവധി പേർ ആവേശത്തോടെ പങ്കെടുത്തു. വിവിധ മത്സരങ്ങളിൽ വിജയികളായവർക്ക് സമ്മാനങ്ങൾ വിതരണം ചെയ്തു.
വേദിയിൽ റാമി ബഷീർ അവതരിപ്പിച്ച ഫുട്ബോൾ ഫ്രീസ്റ്റൈൽ പ്രകടനവും ഫുട്ബാളിൽ പ്രാവീണ്യം തെളിയിച്ച മലയാളി പ്രതിഭകളായ ഷക്കീബ് തിരൂർക്കാട്, റിയാസ് താനൂർ, സത്താർ എന്നിവർ പങ്കെടുത്ത തുറന്ന സംവാദവുമെല്ലാം കാണികൾക്ക് നവ്യാനുഭവമായി മാറി. പ്രോഗ്രാം കൺവീനർ ഹബീബ് റഹ്മാൻ, ശിഹാബ് എ.പി. കരുവാരകുണ്ട്, എടവണ്ണ സുനിൽ ബാബു, നിസാം പൂളക്കൽ, വിനീഷ് ഒതായി, ഷമീർ കല്ലിങ്ങൽ, മുക്താർ പൊന്നാനി, അബൂബക്കർ മഞ്ചേരി, നവാർ മുഹമ്മദ്, ബിന്യാമിൻ ബിൽറു, ഉമ്മർ അമാനത്ത്, രഞ്ജു പാടത്ത് എന്നിവർ പരിപാടികൾക്ക് വിജയകരമായ നേതൃത്വം നൽകി. മിഅ ട്രഷറർ അബ്ദുൽ കരീം ഒളവട്ടൂർ ചടങ്ങിൽ നന്ദി പ്രകാശനം നടത്തി.