ദുബൈ– യുഎഇയുടെ ഐക്യവും കരുത്തും വിളിച്ചോതാൻ യുഎഇ പതാക ഉയർത്തണമെന്ന ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ ആഹ്വാനം ഏറ്റെടുത്ത് മാജിദ് ഒമർ. ദുബൈ ബൊളിവാർഡ് സ്ട്രീറ്റിലൂടെ പോകുന്നവർക്ക് കുഞ്ഞു പതാകകൾ വിതരണം ചെയ്താണ് ഈ കൊച്ചു മിടുകൻ ഇത്തവണ ശ്രദ്ധേയനായത്. മാജിദ് പതാകകൾ നൽകുന്നതിന്റെയും ജനങ്ങളുമായി ഇടപഴകുന്നതിന്റെയും ദൃശ്യങ്ങൾ ഇതിനോടകം തന്നെ സോഷ്യൽ മീഡിയയിൽ വൈറലായിട്ടുണ്ട്.
രാജ്യത്തെ കെട്ടിടങ്ങളിലും വീടുകളിലും എന്തിനേറെ ഡെലിവറി ബൈക്കുകളിൽ വരെ പതാകകൾ സ്ഥാപിച്ച് ജനങ്ങൾ ഭരണാധികാരിയുടെ ആഹ്വാനം നെഞ്ചേറ്റിയപ്പോൾ, അതിനോടുള്ള തന്റെ സ്നേഹം ലളിതമായ രീതിയിൽ പ്രകടിപ്പിക്കുകയായിരുന്നു ഈ കൊച്ചു എമിറാത്തി ബാലൻ. തന്റെ ചെറിയ പ്രവൃത്തിയിലൂടെ വലിയൊരു സന്ദേശം കൈമാറാൻ മാജിദിന് സാധിച്ചുവെന്ന് സോഷ്യൽ മീഡിയയിൽ പലരും കുറിച്ചു. ചെറിയൊരു മെഴ്സിഡസ് കാറിൽ യാത്ര ചെയ്യുന്ന വീഡിയോ വൈറലായതോടെയാണ് മാജിദ് യുഎഇയിൽ എല്ലാവർക്കും പ്രിയങ്കരനായി മാറിയത്.
ഇതിനു മുൻപും ഹൃദ്യമായ പ്രവൃത്തികളിലൂടെ മാജിദ് വാർത്തകളിൽ ഇടം നേടിയിട്ടുണ്ട്. കഴിഞ്ഞ ഫെബ്രുവരിയിൽ നടന്ന ‘ഹോപ്പ് മേക്കേഴ്സ്’ പരിപാടിക്കിടെ ദുബൈ കിരീടാവകാശി ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിന് റോസാപ്പൂവ് സമ്മാനിച്ചത് ഏറെ ജനശ്രദ്ധയാകർഷിച്ചിരുന്നു. ഷാർജ സ്വദേശിയായ മാജിദ് ഒമർ, തന്റെ കുഞ്ഞു പ്രവൃത്തികളിലൂടെ സമൂഹത്തിൽ സന്തോഷവും ഒത്തൊരുമയും പകരുന്ന ഒരു കൊച്ചു മാതൃകയായി മാറിയിരിക്കുകയാണ്.