മക്ക – ഹജ് തീര്ഥാടകരല്ലാത്തവര്ക്ക് മക്ക നഗരത്തിലേക്ക് പ്രവേശിക്കുന്നതിനുള്ള കര്ശന വിലക്ക് ഇന്ന് മുതല് പ്രാബല്യത്തില് വന്നു. ഹജ് സീസണിന് മുന്നോടിയായുള്ള ഒരുക്കങ്ങളുടെ ഭാഗമായാണ് ആഭ്യന്തര മന്ത്രാലയം ഈ നിയന്ത്രണങ്ങള് ഏര്പ്പെടുത്തിയത്. ഹജ് വിസ കൈവശമുള്ളവര്ക്ക് മാത്രമാണ് ഇനി മക്കയിലേക്ക് പ്രവേശിക്കാനും അവിടെ താമസിക്കാനും അനുമതിയുള്ളത്. ഉംറ വിസയിലെത്തിയ തീര്ഥാടകര് ഇന്നത്തെ ദിവസത്തിനുള്ളില് രാജ്യം വിടണമെന്ന് അധികൃതര് കര്ശന നിര്ദ്ദേശം നല്കിയിട്ടുണ്ട്. കൂടാതെ, സ്വദേശി പൗരന്മാര്ക്കോ പ്രവാസികള്ക്കോ നുസുക് പ്ലാറ്റ്ഫോം വഴി പുതിയ ഉംറ പെര്മിറ്റുകള് ഇനി ഒരു അറിയിപ്പ് ഉണ്ടാകുന്നത് വരെ അനുവദിക്കില്ല.
മക്കയിലെ ഗതാഗതം സുഗമമാക്കാനും ഹജിനെത്തുന്നവര്ക്ക് ആവശ്യമായ സൗകര്യങ്ങള് മികച്ച രീതിയില് ഒരുക്കാനുമാണ് എല്ലാ വര്ഷവും ഇത്തരം നിയന്ത്രണങ്ങള് നടപ്പിലാക്കുന്നത്. ഹജ് നിര്വഹിക്കാന് ആഗ്രഹിക്കുന്നവര് ഔദ്യോഗികമായി പെര്മിറ്റുകള് സ്വന്തമാക്കണമെന്നും എല്ലാ നടപടിക്രമങ്ങളും പാലിക്കണമെന്നും ഹജ് ഉംറ മന്ത്രാലയം അറിയിച്ചു. തീര്ഥാടകരുടെ സുരക്ഷ ഉറപ്പാക്കാനും ഹജ് കര്മ്മങ്ങള് സമാധാനപരമായി പൂര്ത്തിയാക്കാനുമാണ് മന്ത്രാലയം ഇതിലൂടെ ലക്ഷ്യമിടുന്നത്. ഇതിനായി എല്ലാ സേവന ദാതാക്കളും തീര്ഥാടകര്ക്കിടയില് ആവശ്യമായ ബോധവല്ക്കരണം നടത്തണമെന്നും മന്ത്രാലയം ആവശ്യപ്പെട്ടു.
ഔദ്യോഗിക പെര്മിറ്റില്ലാതെ ഹജ് നിര്വഹിക്കാന് ശ്രമിക്കുന്നത് നിയമലംഘനമാണെന്നും ഇത്തരക്കാര് കര്ശനമായ ശിക്ഷാനടപടികള് നേരിടേണ്ടി വരുമെന്നും അധികൃതര് മുന്നറിയിപ്പ് നല്കി. നിയമങ്ങള് പാലിക്കുന്നത് പുണ്യസ്ഥലങ്ങളിലെ ജനക്കൂട്ടത്തെ കൃത്യമായി നിയന്ത്രിക്കാനും തീര്ഥാടകര്ക്ക് പ്രയാസമില്ലാതെ യാത്ര ചെയ്യാനും സഹായിക്കും. ഹജ് സീസണിലെ സേവനങ്ങളുടെ ഗുണനിലവാരം ഉറപ്പാക്കുന്നതിനും തീര്ഥാടകര്ക്ക് മികച്ച അനുഭവം നല്കുന്നതിനും ഈ വ്യവസ്ഥാപിത നീക്കങ്ങള് അത്യന്താപേക്ഷിതമാണെന്നും മന്ത്രാലയം വ്യക്തമാക്കി.