കിംഗ് ഫഹദ് സ്പോർട്സ് സിറ്റി സ്റ്റേഡിയം പരിഗണിക്കുന്നു
റിയാദ്- സൗദി പ്രോ ലീഗിൽ 2026 ഡിസംബർ 10ന് നടക്കാനിരിക്കുന്ന അൽ നസ്റും അൽ ഹിലാലും തമ്മിലുള്ള ആവേശകരമായ റിയാദ് ഡെർബിയുടെ വേദി മാറ്റിയേക്കും. അൽ നസ്റിന്റെ ഹോം ഗ്രൗണ്ടായ അൽ അവ്വൽ പാർക്കിൽ നിന്ന് കിംഗ് ഫഹദ് സ്പോർട്സ് സിറ്റി സ്റ്റേഡിയത്തിലേക്കായിരിക്കും മത്സരം മാറ്റുക.
2027 ജനുവരിയിൽ സൗദി അറേബ്യയിൽ വെച്ച് നടക്കുന്ന എ.എഫ്.സി ഏഷ്യൻ കപ്പ് ടൂർണമെന്റിന്റെ ഫൈനൽ ഉൾപ്പെടെയുള്ള മത്സരങ്ങൾ നടക്കുന്നത് കിംഗ് ഫഹദ് സ്പോർട്സ് സിറ്റിയിലാണ്. അതിനു മുന്നോടിയായി സ്റ്റേഡിയത്തിലെ പുല്ല്, ലൈറ്റിംഗ്, കാണികളുടെ സുരക്ഷ എന്നിവ പരിശോധിച്ച് ഉറപ്പുവരുത്താനുള്ള സൗദി കായിക മന്ത്രാലയത്തിന്റെ നിർദ്ദേശപ്രകാരമാണ് ഈ മാറ്റം.
പുതിയ സീസണിന്റെ പോയിന്റ് പട്ടികയിൽ അൽ ഹിലാലും അൽ നസ്റും ഒന്നാം സ്ഥാനത്തിനായി കടുത്ത പോരാട്ടത്തിലാണ്. നാല് മത്സരങ്ങളിൽ നാലും ജയിച്ച് ഇരു ടീമിനും 12 പോയിന്റാണുള്ളത്. ഗോൾ വ്യത്യാസത്തിന്റെ ആനുകൂല്യത്തിൽ അൽ ഹിലാൽ ഒന്നാമതും അൽ നസ്ർ രണ്ടാമതുമാണ്. ഒൻപത് പോയിന്റുമായി സൗദി കിഴക്കൻ പ്രവിശ്യാ ക്ലബ്ബായ അൽ ഖാദിസിയ്യയാണ് മൂന്നാമത്.