കൂത്തുപറമ്പ്– കണ്ണൂരിലെ പാട്യം മുതിയങ്ങയിൽ നിന്ന് കാണാതായ വയോധികയുടെ മൃതദേഹം സമീപത്തെ തോട്ടിൽ നിന്ന് കണ്ടെത്തി. മുതിയങ്ങ ശങ്കരവിലാസം യുപി സ്കൂളിന് സമീപം വിനോദ് ഭവനിൽ നളിനിയുടെ (70) മൃതദേഹമാണ് ഇന്നു രാവിലെ പത്തോടെ വീടിന് സമീപത്തുള്ള തോട്ടിൽ നിന്ന് കണ്ടെത്തിയത്. വ്യാഴാഴ്ച ദിവസം രാവിലെ എട്ടോടെയാണ് നളിനിയെ കാണാതായത്.
വീട്ടിൽ നിന്നും കാണാതായതിനെ തുടർന്ന് സമീപവാസികൾ നളിനിയെ അന്വേഷണത്തിനിറങ്ങിയിരുന്നു. നളിനി വീടിനു സമീപത്തെ തോട്ടിൽ വീണതാകാം എന്ന സംശയത്തിൽ സമീപത്തെ തോട്ടിലും പുഴയിലും തിരച്ചിൽ നടത്തി കണ്ണൂർ, തലശ്ശേരി, കൂത്തുപറമ്പ്, മട്ടന്നൂർ, പാനൂർ, പേരാവൂർ എന്നിവിടങ്ങളിലെ അഗ്നിരക്ഷാ സേനയും സ്കൂബ ടീമും നാട്ടുകാരും ജനപ്രതിനിധികളും ചേർന്നാണ് തിരച്ചിൽ നടത്തിയത്.
പുഴയിലെ ഒഴുക്കും ശക്തമായ മഴയും കാരണം ഇന്നലെ തിരച്ചിലിന് പ്രയാസം നേരിട്ടിരുന്നു. ഇന്ന് രാവിലെ വിവിധ ഭാഗങ്ങളിലെ ഫയർഫോഴ്സ് സംഘം എത്തി പാത്തിപാലം പുഴയിൽ ഉൾപ്പടെ തിരച്ചിൽ നടത്താനുള്ള തയാറെടുപ്പ് നടത്തവെയാണ് മൃതദേഹം കണ്ടെത്തിയത്.