കുവൈത്ത് സിറ്റി– കുവൈത്തി പൗരനെയും സഹോദരനെയും ബ്ലാക്ക്‌മെയില്‍ ചെയ്ത് അഞ്ചു ലക്ഷം കുവൈത്തി ദീനാര്‍ കൈക്കൂലി ആവശ്യപ്പെട്ട കേസില്‍ രണ്ടു യുവതികള്‍ ഉള്‍പ്പെടെ അഞ്ചംഗ സംഘത്തെ കുവൈത്ത് അപ്പീല്‍ കോടതി ശിക്ഷിച്ചു. ഇവര്‍ക്ക് ഏഴു വര്‍ഷം വീതം തടവും പത്തു ലക്ഷം ദീനാര്‍ പിഴയുമാണ് കോടതി വിധിച്ചത്. കുവൈത്തി യുവതി, ഇവരുടെ ലെബനോന്‍കാരനായ ഭര്‍ത്താവ്, യുവതിയുടെ കൂട്ടുകാരി, മറ്റൊരു കുവൈത്തി പൗരന്‍, യെമന്‍ പൗരന്‍ എന്നിവരാണ് കേസിലെ പ്രതികള്‍.
പ്രതികള്‍ പൗരത്വ ഡിപ്പാര്‍ട്ട്‌മെന്റിലെ ജീവനക്കാരായി ചമഞ്ഞ് കുവൈത്തി പൗരനെയും സഹോദരനെയും ബ്ലാക്ക്‌മെയില്‍ ചെയ്യുകയും അവര്‍ക്ക് പൗരത്വം അനുവദിച്ചതുമായി ബന്ധപ്പെട്ട അന്വേഷണങ്ങള്‍ അവസാനിപ്പിക്കാന്‍ അഞ്ചു ലക്ഷം കുവൈത്തി ദീനാര്‍ കൈക്കൂലി ആവശ്യപ്പെടുകയുമായിരുന്നു. ഇരകള്‍ വ്യാജ രേഖകള്‍ ഉപയോഗിച്ചാണ് പൗരത്വം നേടിയതെന്ന് പറഞ്ഞ് ഭീഷണിപ്പെടുത്തിയ പ്രതികള്‍, മുതിര്‍ന്ന ഉദ്യോഗസ്ഥന് കൈക്കൂലി നല്‍കാനാണ് പണം ആവശ്യപ്പെടുന്നതെന്ന് വ്യാജമായി അവകാശപ്പെടുകയും ചെയ്തു. അന്വേഷണത്തിന് ശേഷം സാമ്പത്തിക കുറ്റാന്വേഷണ വകുപ്പാണ് പ്രതികളെ നേരത്തെ അറസ്റ്റ് ചെയ്തത്. പ്രതികള്‍ക്കെതിരായ തെളിവുകളും വോയ്‌സ് റെക്കോര്‍ഡിംഗുകളും സാമ്പത്തിക കുറ്റാന്വേഷണ വകുപ്പ് പബ്ലിക് പ്രോസിക്യൂഷന് സമര്‍പ്പിച്ചിരുന്നു.