ടെൽ അവീവ്- ഇസ്രായേൽ തിരഞ്ഞെടുപ്പിൽ വിദേശ രാജ്യങ്ങളുടെ ഇടപെടലുണ്ടായതായി ഗുരുതരമായ സംശയങ്ങളുണ്ടെന്ന് സ്ഥാനമൊഴിയുന്ന പ്രധാനമന്ത്രി ബെഞ്ചമിൻ നെതന്യാഹു. തിരഞ്ഞെടുപ്പ് ഫലം ഔദ്യോഗികമായി പ്രഖ്യാപിക്കുകയും സർക്കാർ രൂപീകരണത്തിനായി പ്രസിഡന്റ് ഐസക് ഹെർസോഗ് കൂടിയാലോചനകൾ ആരംഭിക്കുകയും ചെയ്തതിന് പിന്നാലെയാണ് നെതന്യാഹുവിന്റെ ആരോപണം. ഇസ്രായേലി പതാകയ്ക്കും പ്രധാനമന്ത്രിയുടെ ഓഫീസിന്റെ ലോഗോയ്ക്കും മുന്നിൽ നിന്ന് ചിത്രീകരിച്ച വീഡിയോ സന്ദേശത്തിലൂടെയായിരുന്നു അദ്ദേഹത്തിന്റെ പ്രതികരണം.
തിരഞ്ഞെടുപ്പ് ഫലങ്ങളെ സ്വാധീനിക്കാനായി വിദേശ രാജ്യങ്ങൾ വൻതോതിൽ പണം ചെലവഴിച്ചതായി സംശയിക്കുന്നുണ്ടെന്ന് നെതന്യാഹു ആരോപിച്ചു. ഒക്ടോബർ 27-ന് നടന്ന വോട്ടെടുപ്പിൽ റെക്കോർഡ് സീറ്റുകൾ നേടിയ അറബ് പാർട്ടി സഖ്യം വഞ്ചന കാണിച്ചതായി നെതന്യാഹുവും അദ്ദേഹത്തിന്റെ ലികുഡ് പാർട്ടിയും നേരത്തെ ആരോപിച്ചിരുന്നു. ഖത്തറും തുർക്കിയും ഇതിനായി ഇടപെട്ടെന്നായിരുന്നു പ്രധാന ആരോപണം. അറബ് പാർട്ടികളുടെ അപ്രതീക്ഷിത കുതിപ്പ് നെതന്യാഹുവിന്റെ സഖ്യത്തിന് ഭൂരിപക്ഷം നഷ്ടപ്പെടുത്തിയിരുന്നു.
ആരോപണങ്ങളെ തുടർന്ന്, ഇസ്രായേൽ സുരക്ഷാ ഏജൻസിയായ ഷിൻ ബെറ്റിന്റെ (Shin Bet) തലവനും നെതന്യാഹുവിന്റെ അടുത്ത സഖ്യകക്ഷിയുമായ ഡേവിഡ് സിനിയോട് (David Zini) തട്ടിപ്പ് സംബന്ധിച്ച തെളിവുകൾ ഹാജരാക്കാൻ ഗവൺമെന്റ് ലീഗൽ അഡ്വൈസർ ഗാലി ബഹാരവ്-മീര (Gali Baharav-Miara) നിർദേശിച്ചു.
അതേസമയം, നെതന്യാഹുവിന്റെ ടീമിൽ നിന്നുള്ള കടുത്ത സമ്മർദ്ദങ്ങൾക്കിടയിലും, വോട്ടെടുപ്പിൽ ക്രമക്കേടുകളൊന്നും നടന്നിട്ടില്ലെന്ന് ഇസ്രായേൽ സെൻട്രൽ ഇലക്ഷൻ കമ്മിറ്റി ബുധനാഴ്ച വ്യക്തമാക്കി. രാഷ്‌ട്രീയ പാർട്ടികൾ നൽകിയ പരാതികളും ഒമ്പതിനായിരത്തിലധികം ബാലറ്റ് ബോക്സുകളും വിശദമായി ഓഡിറ്റ് ചെയ്ത ശേഷമാണ് കമ്മിറ്റി ഈ നിഗമനത്തിലെത്തിയത്. ഇത്രയധികം ബാലറ്റ് പെട്ടികൾ പുനഃപരിശോധിക്കുന്നത് ഇസ്രായേൽ ചരിത്രത്തിൽ ആദ്യമായാണ്.
നെസെറ്റിലെ (Knesset) 120 സീറ്റുകളിൽ 61 സീറ്റുകളുടെ കേവലഭൂരിപക്ഷം ഇരു മുന്നണികൾക്കും നേടാനാകാത്തതിനാൽ പുതിയ സർക്കാർ രൂപീകരണ ചർച്ചകൾ സങ്കീർണമാകും. നെതന്യാഹുവിന്റെ സഖ്യം 53 സീറ്റുകൾ നേടിയപ്പോൾ, ഗാഡി ഐസൻകോട്ടിന്റെ (Gadi Eisenkot) നേതൃത്വത്തിലുള്ള പ്രധാന പ്രതിപക്ഷ ബ്ലോക്ക് 48 സീറ്റുകളാണ് നേടിയത്.