ഗാസ- ഗാസ മുനമ്പിലും അധിനിവിഷ്ട വെസ്റ്റ് ബാങ്കിലും ഇസ്രായേൽ ആക്രമണം തുടരുന്നു. ശനിയാഴ്ച ഗാസയിലുണ്ടായ വിവിധ ആക്രമണങ്ങളിൽ ഏഴ് ഫലസ്തീനികളും വെസ്റ്റ് ബാങ്കിൽ സൈന്യത്തിന്റെ വെടിവെപ്പിൽ ഒരാളും കൊല്ലപ്പെട്ടു. നിരവധിയാളുകൾക്ക് പരിക്കേറ്റിട്ടുണ്ട്.
ഗാസ സിറ്റിയുടെ പടിഞ്ഞാറുള്ള ഹൈദർ അബ്ദുൽശാഫി റൗണ്ട്എബൗട്ടിന് സമീപം റെസിഡൻഷ്യൽ കെട്ടിടത്തിന് മുന്നിൽ നിന്ന യുവാക്കൾക്ക് നേരെ ശനിയാഴ്ച ഉച്ചയ്ക്ക് ഇസ്രായേൽ നടത്തിയ ഡ്രോൺ ആക്രമണത്തിൽ നാല് പേർ കൊല്ലപ്പെടുകയും ഏഴ് പേർക്ക് പരിക്കേൽക്കുകയും ചെയ്തു. പരിക്കേറ്റ ചിലരുടെ നില ഗുരുതരമാണ്. ഇതിന് തൊട്ടുമുമ്പ് കിഴക്കൻ ഗാസ സിറ്റിയിലെ യാഫ സ്ട്രീറ്റിൽ നടന്നുപോവുകയായിരുന്നവർക്ക് നേരെയുണ്ടായ ആക്രമണത്തിൽ ഒരാൾ കൊല്ലപ്പെടുകയും രണ്ടുപേർക്ക് പരിക്കേൽക്കുകയും ചെയ്തു. ടണൽ സ്ട്രീറ്റിലുണ്ടായ മറ്റൊരു ആക്രമണത്തിൽ രണ്ടുപേർക്ക് ഗുരുതരമായി പരിക്കേറ്റു.
ഗാസ നഗരത്തിന് പടിഞ്ഞാറുള്ള അൽജവാസത്ത് പ്രദേശത്ത് കുടിയിറക്കപ്പെട്ടവർ താമസിച്ചിരുന്ന ടെന്റുകൾക്ക് നേരെ ഇസ്രായേലി ക്വാഡ്കോപ്റ്റർ ഡ്രോൺ നടത്തിയ വെടിവെപ്പിൽ ശഹദ് അൽനജ്ജാർ എന്ന ഏഴ് വയസ്സുകാരി കൊല്ലപ്പെട്ടു. ഖാൻ യൂനിസിലെ മവാസി പ്രദേശത്ത് വെള്ളിയാഴ്ച വൈകുന്നേരം ടെന്റിനു നേരെയുണ്ടായ വ്യോമാക്രമണത്തിൽ ഗുരുതരമായി പരിക്കേറ്റ മറ്റൊരു ഫലസ്തീനിയും ഇന്ന് മരണത്തിന് കീഴടങ്ങി.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group