ന്യൂദൽഹി- തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഗുരുതര വെളിപ്പെടുത്തലുമായി മുൻ ഐ.എ.എസ് ഉദ്യോഗസ്ഥൻ ജിജി തോംസൺ. തന്നോട് ബി.ജെ.പി ടിക്കറ്റിൽ മത്സരിക്കാൻ ഗ്യാനേഷ് കുമാർ ആവശ്യപ്പെട്ടതായി ജിജി തോംസൺ വെളിപ്പെടുത്തി. 2016-ൽ വിമാനയാത്രയ്ക്കിടെയാണ് ഗ്യാനേഷ് കുമാർ ഇക്കാര്യം ആവശ്യപ്പെട്ടതെന്നും ജിജി തോംസൺ പറഞ്ഞു. ജയിച്ചാൽ കേന്ദ്രമന്ത്രിയാകാകമെന്നും ഗ്യാനേഷ് കുമാർ പറഞ്ഞതായി ജിജി തോംസൺ വ്യക്തമാക്കുന്നു. റിട്ടയർമെന്റിന് ശേഷം എന്താണ് പദ്ധതിയെന്ന് ചോദിച്ചാണ് ഗ്യാനേഷ് കുമാർ സംഭാഷണത്തിൽ ഏർപ്പെട്ടത്. ഓഫർ വെക്കേണ്ടത് ഗ്യാനേഷ് കുമാർ അല്ലല്ലോ എന്നും ജിജി തോംസൺ ചോദിച്ചു. ജിജി തോംസണും ഗ്യാനേഷ് കുമാറും ഒരേ വകുപ്പിൽ ജോലി ചെയ്തിരുന്നു.
അതിനിടെ ഇലക്ഷൻ കമ്മീഷനെതിരെ ശക്തമായ പോരാട്ടത്തിന് തയ്യാറെടുക്കുകാണ് ഇന്ത്യാ മുന്നണി. ചീഫ് ഇലക്ഷൻ കമ്മീഷണർ ജ്ഞാനേഷ് കുമാറിനെ പുറത്താക്കി അറസ്റ്റ് ചെയ്യണമെന്ന് കോൺഗ്രസ് ആവശ്യപ്പെട്ടു. ഇലക്ടറൽ ഫോമുകളിലെ മാറ്റങ്ങൾ, വോട്ടർ പട്ടിക പുതുക്കൽ, വോട്ടർ ഡാറ്റ കൈകാര്യം ചെയ്യൽ എന്നിവയുൾപ്പെടെയുള്ള വിവിധ തിരഞ്ഞെടുപ്പ് കമ്മീഷൻ നടപടികളിൽ, ഇലക്ഷൻ കമ്മീഷണർമാരായ സുഖ്ബീർ സിംഗ് സന്ധുവും വിവേക് ജോഷിയും 10 മാസത്തിനിടെ കുറഞ്ഞത് 14 തവണ രേഖാമൂലം എതിർപ്പുകൾ ഉന്നയിച്ചിരുന്നതായി ‘ഇന്ത്യൻ എക്സ്പ്രസ്’ നടത്തിയ അന്വേഷണ റിപ്പോർട്ടിൽ വ്യക്തമാക്കിയിരുന്നു. ഇതേ തുടർന്നാണ് തെരഞ്ഞെടുപ്പ് കമ്മീഷനെതിരെ വിവിധ കോണുകളിൽനിന്ന് വിമർശനം ഉയർന്നത്.
