ദോഹ: തങ്ങളുടെ ആണവ കേന്ദ്രങ്ങൾക്കു മേൽ നടത്തിയ ആക്രമണത്തിനു മറുപടിയായി ഖത്തറിലെയും ഇറാഖിലെയും അമേരിക്കൻ സൈനിക താവളങ്ങൾ ആക്രമിച്ച് ഇറാൻ. ഖത്തർ തലസ്ഥാനമായ ദോഹയിൽ നിരവധി സ്‌ഫോടന ശബ്ദങ്ങൾ കേട്ടതായി അൽ ജസീറ റിപ്പോർട്ട് ചെയ്തു. ഖത്തറിലെ ഉദൈദ് യുഎസ് സൈനിക താവളം ലക്ഷ്യമാക്കി ആറ് ബാലിസ്റ്റിക് മിസൈലുകൾ അയച്ചതായാണ് റിപ്പോർട്ടുകൾ.
കുവൈത്തിലെയും സൈനിക കേന്ദ്രങ്ങൾക്കു നേരെ മിസൈൽ ആക്രമണം നടത്തിയതായി ‘ഇറാൻ ബിൽ അറബിയ’ എക്‌സ് ഹാൻഡിൽ അവകാശപ്പെട്ടു.
ഇറാൻ മിസൈലുകൾ അയച്ചതിനു പിന്നാലെ ഖത്തറിൽ എയർ ഡിഫൻസ് സംവിധാനം പ്രവർത്തനക്ഷമമാക്കി. ദോഹയുടെ ആകാശത്തിനു മീതെ അഗ്നിനാളങ്ങൾ കാണുകയും സ്‌ഫോടന ശബ്ദങ്ങൾ കേൾക്കുകയും ചെയ്തതായി റിപ്പോർട്ടുകളുണ്ട്.
മിഡിൽ ഈസ്റ്റിലെ തങ്ങളുടെ സൈനികരെയും സന്നാഹങ്ങളെയും സംരക്ഷിക്കാൻ തയാറായതായി ബ്രിട്ടൻ വിദേശ സെക്രട്ടറി ഡേവിഡ് ലാമി പറഞ്ഞു. ഇറാൻ ആക്രമിക്കുമെന്ന സൂചനയിൽ സൈനികരെയും മറ്റും മാറ്റിയതായും അദ്ദേഹം പറഞ്ഞു.