ജറൂസലം – സ്വതന്ത്ര ഫലസ്തീന്‍ രാഷ്ട്രം സ്ഥാപിക്കുന്നതിനെ അമേരിക്ക ഇപ്പോള്‍ പൂര്‍ണമായി പിന്തുണക്കുന്നില്ലെന്ന് ഇസ്രായിലിലെ അമേരിക്കന്‍ അംബാസഡര്‍ മൈക്ക് ഹക്കബി പറഞ്ഞു. ഫലസ്തീന്‍ രാഷ്ട്രം സ്ഥാപിക്കുകയാണെങ്കില്‍ അത് വെസ്റ്റ് ബാങ്കിനു പകരം ഈ മേഖലയിലെ മറ്റെവിടെയെങ്കിലും ആയിരിക്കും. ഗാസയിലെ ഇസ്രായില്‍ യുദ്ധത്തിന്റെ ഉത്തരവാദിത്തം ഹമാസിനു മാത്രമാണ്. ഗാസയിലെ ശേഷിക്കുന്ന ബന്ദികളെ ഹമാസ് വിട്ടയച്ചാല്‍ മാത്രമേ സംഘര്‍ഷം അവസാനിക്കുകയുള്ളൂ.
ഇസ്രായിലില്‍ നിന്നുള്ള സ്ഥലത്തിനു പകരം ഏതെങ്കിലും മുസ്‌ലിം രാജ്യത്തു നിന്നുള്ള സ്ഥലത്ത് സ്വതന്ത്ര ഫലസ്തീന്‍ രാഷ്ട്രം സ്ഥാപിക്കണമെന്ന് മൈക്ക് ഹക്കബി നിര്‍ദേശിച്ചു. സംസ്‌കാരത്തില്‍ കാര്യമായ മാറ്റങ്ങള്‍ക്ക് ശേഷം മാത്രമേ ഫലസ്തീന്‍ രാഷ്ട്രം സ്ഥാപിക്കാന്‍ കഴിയൂ, അത് നമ്മുടെ ജീവിതകാലത്ത് സംഭവിക്കില്ല – അമേരിക്കന്‍ അംബാസഡര്‍ പറഞ്ഞു.
യുറേനിയം സമ്പുഷ്ടീകരിക്കാന്‍ പ്രസിഡന്റ് ഡൊണാള്‍ഡ് ട്രംപ് ഇറാനെ അനുവദിക്കില്ല. ആണവ പ്രശ്‌നത്തില്‍ ഇറാനുമായുള്ള ചര്‍ച്ചകള്‍ പരാജയപ്പെട്ടാല്‍ ഒരു സാധ്യതയും തള്ളിക്കളയാനാകില്ലെന്നും ഇറാനെതിരെ സൈനിക നടപടിയിലേക്ക് തിരിയാനുള്ള സാധ്യതയുണ്ടെന്നും മൈക്ക് ഹക്കബി പറഞ്ഞു.