ജനീവ – അധിനിവിഷ്ട വെസ്റ്റ് ബാങ്കില്‍ ഇസ്രായില്‍ സുരക്ഷാ സേന രണ്ട് ഫലസ്തീനികളെ അതിക്രൂരമായി കൊലപ്പെടുത്തിയതിനെ യു.എന്‍ മനുഷ്യാവകാശ ഓഫീസ് ശക്തമായി അപലപിച്ചു. സംഭവത്തില്‍ യു.എന്‍ ഓഫീസ് ഞെട്ടല്‍ രേഖപ്പെടുത്തി. സംഭവം നിയമവിരുദ്ധ വധശിക്ഷക്ക് തുല്യമാണെന്ന് ജനീവയില്‍ നടത്തിയ പത്രസമ്മേളനത്തില്‍ യു.എന്‍ മനുഷ്യാവകാശ ഓഫീസ് വക്താവ് ജെറമി ലോറന്‍സ് പറഞ്ഞു. അധിനിവിഷ്ട വെസ്റ്റ് ബാങ്കിലെ ജെനിനില്‍ രണ്ട് ഫലസ്തീന്‍ യുവാക്കളെ ഇസ്രായില്‍ പോലീസ് കൊലപ്പെടുത്തിയതില്‍ ഞങ്ങള്‍ അമ്പരന്നു. ഇത് മറ്റൊരു നിയമവിരുദ്ധ വധശിക്ഷയാണെന്ന് ജെറമി ലോറന്‍സ് പറഞ്ഞു.
സംഭവത്തെ കുറിച്ച് സ്വതന്ത്രവും വേഗത്തിലുള്ളതും സമഗ്രവുമായ അന്വേഷണം നടത്തണമെന്ന് യു.എന്‍ ആവശ്യപ്പെട്ടു. അധിനിവിഷ്ട വെസ്റ്റ് ബാങ്കില്‍ നടന്ന റെയ്ഡിനിടെ കൈകള്‍ ഉയര്‍ത്തി കീഴടങ്ങിയ, നിരായുധരായ രണ്ട് ഫലസ്തീന്‍ യുവാക്കളെ ഇസ്രായില്‍ സുരക്ഷാ സേന വെടിവച്ചുകൊല്ലുന്നതിന്റെ ദൃശ്യങ്ങള്‍ ഫലസ്തീന്‍ ടി.വിയില്‍ സംപ്രേക്ഷണം ചെയ്തു. വ്യാഴാഴ്ച വെസ്റ്റ് ബാങ്കില്‍ നടന്ന റെയ്ഡിനിടെ ഇസ്രായില്‍ സുരക്ഷാ സേന രണ്ടു പേരെയും മനഃപൂര്‍വം വെടിവച്ചു കൊല്ലുകയായിരുന്നു. വടക്കന്‍ വെസ്റ്റ് ബാങ്കിലെ ജെനിന്‍ നഗരത്തില്‍ സായുധരായ ഇസ്രായിലി സേന വളഞ്ഞ കെട്ടിടത്തില്‍ നിന്നാണ് രണ്ടു യുവാക്കളും കൈകള്‍ ഉയര്‍ത്തി മുട്ടില്‍ ഇഴഞ്ഞ് പുറത്തുവന്നത്. തുടര്‍ന്ന് സൈന്യം ഇരുവരെയും കെട്ടിടത്തിലേക്ക് തിരികെ കൊണ്ടുപോവുകയും പോയിന്റ് ബ്ലാങ്കില്‍ വെടിവെച്ചുകൊല്ലുകയുമായിരുന്നു. 26 വയസ്സുള്ള മുന്‍തസര്‍ ബില്ല അബ്ദുല്ലയും 37 വയസ്സുള്ള യൂസുഫ് അസാഅസയുമാണ് കൊല്ലപ്പെട്ടതെന്ന് ഫലസ്തീന്‍ ആരോഗ്യ മന്ത്രാലയം പ്രസ്താവനയില്‍ പറഞ്ഞു.
ഗാസ മുനമ്പിലും ജറൂസലം ഉള്‍പ്പെടെയുള്ള വെസ്റ്റ് ബാങ്കിലും ഫലസ്തീന്‍ ജനതക്കെതിരെ ഇസ്രായില്‍ നടത്തുന്ന യുദ്ധം ആര്‍ക്കും സുരക്ഷയും സ്ഥിരതയും കൊണ്ടുവരില്ലെന്നും ഇസ്രായില്‍ സ്വീകരിക്കുന്ന ഒരു നടപടിക്കും അത് നിയമസാധുത നല്‍കില്ലെന്നും ഫലസ്തീന്‍ പ്രസിഡന്റിന്റെ വക്താവ് നബീല്‍ അബൂറുദൈന പറഞ്ഞു. തൂബാസ് നഗരത്തിനെതിരെ തുടര്‍ച്ചയായ മൂന്നാം ദിവസവും തുടരുന്ന ഇസ്രായിലി ആക്രമണവും ജെനിന്‍ നഗരത്തിലും ജെനിന്‍ അഭയാര്‍ഥി ക്യാമ്പിലും തുല്‍കറമിലും അവിടുത്തെ രണ്ടു അഭയാര്‍ഥി ക്യാമ്പുകളിലും നടക്കുന്ന ആക്രമണങ്ങളും മേഖലയെ അക്രമത്തിന്റെയും സംഘര്‍ഷത്തിന്റെയും നിലക്കാത്ത ചക്രത്തില്‍ നിലനിര്‍ത്തും. ഗാസ മുനമ്പിലെ വെടിനിര്‍ത്തല്‍ ശ്രമങ്ങള്‍ക്കും വെസ്റ്റ് ബാങ്കിലെ ആക്രമണങ്ങള്‍ അവസാനിപ്പിക്കാനുള്ള ശ്രമങ്ങള്‍ക്കും തുരങ്കം വെക്കാനും മേഖലയില്‍ സുരക്ഷയും സ്ഥിരതയും കൈവരിക്കാനുള്ള ഏതൊരു സാധ്യതയും ഇല്ലാതാക്കാനും അധിനിവേശം അവസാനിപ്പിക്കാന്‍ അന്താരാഷ്ട്ര നിയമത്തെ അടിസ്ഥാനമാക്കിയുള്ള രാഷ്ട്രീയ പ്രക്രിയ ആരംഭിക്കാനുള്ള ശ്രമങ്ങളെ തകര്‍ക്കാനുമാണ് ഇസ്രായേല്‍ സര്‍ക്കാര്‍ ഈ നടപടികളിലൂടെയും മറ്റ് രീതികളിലൂടെയും ശ്രമിക്കുന്നത്.
ഫലസ്തീന്‍ ജനതക്കെതിരായ തുറന്ന യുദ്ധം നിര്‍ത്താന്‍ ഇസ്രായിലിനെ നിര്‍ബന്ധിക്കാനും ജൂത കുടിയേറ്റക്കാരുടെ ഭീകരത അവസാനിപ്പിക്കാനും യു.എസ് ഭരണകൂടം ഉടനടി നിര്‍ണായകമായി ഇടപെടണം. ജൂതകുടിയേറ്റക്കാരുടെ ഭീകരത മേഖലയെ സ്‌ഫോടനാത്മകമായ സാഹചര്യത്തിലേക്ക് തള്ളിവിടുകയും പിരിമുറുക്കവും സംഘര്‍ഷവും അവസാനിപ്പിക്കാനുള്ള യു.എസ് പ്രസിഡന്റിന്റെ ശ്രമങ്ങളെ ദുര്‍ബലപ്പെടുത്തുകയും ചെയ്യുന്നുവെന്നും ഫലസ്തീന്‍ പ്രസിഡന്റിന്റെ വക്താവ് പറഞ്ഞു.
വെസ്റ്റ് ബാങ്കിലെ തൂബാസ് ഗവര്‍ണറേറ്റില്‍ ഇസ്രായില്‍ സൈന്യം തുടര്‍ച്ചയായ മൂന്നാം ദിവസവും സൈനിക നീക്കം തുടരുകയാണെന്ന് ഫലസ്തീന്‍ വാര്‍ത്താ ഏജന്‍സി റിപ്പോര്‍ട്ട് ചെയ്തു. ഗവര്‍ണറേറ്റിന്റെ മിക്ക പ്രദേശങ്ങളിലും കര്‍ഫ്യൂ ഏര്‍പ്പെടുത്തുകയും വന്‍തോതില്‍ സൈന്യത്തെ വിന്യസിച്ചിട്ടുമുണ്ട്. തൂബാസിന് തെക്കുള്ള അല്‍ഫാര്‍അ അഭയാര്‍ഥി ക്യാമ്പില്‍ ഇസ്രായില്‍ സൈന്യം നടത്തിയ റെയ്ഡില്‍ മൂന്ന് ഫലസ്തീനികള്‍ക്ക് പരിക്കേറ്റതായും ഡസന്‍ കണക്കിന് ആളുകളെ കസ്റ്റഡിയിലെടുത്തതായും ഏജന്‍സി റിപ്പോര്‍ട്ട് ചെയ്തു. വടക്കന്‍ വെസ്റ്റ് ബാങ്കിലെ അഭയാര്‍ഥി ക്യാമ്പുകളില്‍ ഇസ്രായില്‍ സൈന്യം പൊളിക്കലും നശീകരണ പ്രവര്‍ത്തനങ്ങളും തുടരുകയാണെന്ന് വെസ്റ്റ് ബാങ്കിലെ യു.എന്‍ റിലീഫ് ഏജന്‍സി ഓപ്പറേഷന്‍സ് ഡയറക്ടര്‍ റോളണ്ട് ഫ്രെഡറിക് പറഞ്ഞു. ജെനിന്‍, തുല്‍കറം, നൂര്‍ ശംസ് അഭയാര്‍ഥി ക്യാമ്പുകള്‍ ഇസ്രായില്‍ സൈന്യം പൂര്‍ണമായും ഒഴിപ്പിച്ചിട്ടുണ്ട്. സൈനിക ആവശ്യങ്ങള്‍ എന്ന വ്യാജേന സൈന്യം പുതിയ പൊളിച്ചുമാറ്റല്‍ ഉത്തരവുകള്‍ പുറപ്പെടുവിക്കുന്നത് തുടരുകയാണെന്നും റോളണ്ട് ഫ്രെഡറിക് കൂട്ടിച്ചേര്‍ത്തു.