തെല്‍അവീവ്– ഇറാനില്‍ നിന്നുള്ള ഭീഷണി ഇല്ലാതാക്കാനുള്ള ഏക പരിഹാരം അവിടത്തെ ഭരണകൂടത്തെ അട്ടിമറിക്കുകയാണെന്ന് ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു വ്യക്തമാക്കി. തെക്കന്‍ ഇസ്രായേലി നഗരമായ ഡിമോണയില്‍ നടന്ന തെരഞ്ഞെടുപ്പ് റാലിയില്‍ സംസാരിക്കുകയായിരുന്നു അദ്ദേഹം.
ഇറാന്‍ തങ്ങളെ നശിപ്പിക്കാനും ആണവ ബോംബുകള്‍ നിര്‍മ്മിക്കാനും ആഗ്രഹിച്ചെങ്കിലും തങ്ങൾ അത് തടഞ്ഞതായി നെതന്യാഹു പറഞ്ഞു. എന്നാല്‍ ഇറാന്‍ ഈ പദ്ധതികളുമായി മുന്നോട്ട് പോകാന്‍ പിടിവാശി കാണിക്കുകയാണെന്നും അദ്ദേഹം കൂട്ടിച്ചേര്‍ത്തു.
ഇറാന്‍ ഭരണകൂടം ഇതുവരെ പാഠം പഠിച്ചിട്ടില്ലെന്ന് വ്യക്തമാക്കിയ നെതന്യാഹു, നിലവിലെ പരമോന്നത നേതാവ് മുജ്തബ ഖാംനഇ, യുദ്ധത്തിന്റെ ആദ്യ ദിവസം കൊല്ലപ്പെട്ട തന്റെ പിതാവ് അലി ഖാംനഇയുടെ പാതയാണ് പിന്തുടരുന്നതെന്നും ആരോപിച്ചു. ഇറാന്‍ വീണ്ടും മാരകമായ ബോംബുകള്‍ വികസിപ്പിക്കാന്‍ ശ്രമിക്കുന്നതിനാല്‍, ഈ വിഷയം അവസാനിപ്പിക്കാന്‍ ഭരണകൂടത്തെ അട്ടിമറിക്കുകയല്ലാതെ മറ്റ് മാര്‍ഗമില്ലെന്നും ഇത് ഇസ്രായേല്‍ പ്രതിരോധ സേനയ്ക്കും മൊസാദിനും നല്‍കിയ കര്‍ശന നിര്‍ദ്ദേശമാണെന്നും അദ്ദേഹം വ്യക്തമാക്കി.
തന്റെ ഉറ്റ സുഹൃത്തായ യു.എസ് പ്രസിഡന്റ് ഡൊണാള്‍ഡ് ട്രംപും ഈ വീക്ഷണം പങ്കിടുന്നുണ്ടെന്ന് നെതന്യാഹു അവകാശപ്പെട്ടു. ഇറാനെയും ഗാസയിലെ ഹമാസിനെയും ലെബനോനിലെ ഹിസ്ബുല്ലയെയും ‘നീരാളിയോട്’ ഉപമിച്ച അദ്ദേഹം, നീരാളിയുടെ തലയും അതിന്റെ കൈകാലുകളും തങ്ങള്‍ വെട്ടിമാറ്റുമെന്ന് മുന്നറിയിപ്പ് നൽകി.