മോസ്കോ – ഇറാന് പരമോന്നത നേതാവ് അലി ഖാംനഇയെ വധിക്കുമെന്ന ഇസ്രായില് പ്രതിരോധ മന്ത്രി യിസ്രായേല് കാറ്റ്സിന്റെ ഭീഷണിയെക്കെതിരെ റഷ്യയുടെ മുന്നറിയിപ്പ്. ഒരുനിലക്കും ഇക്കാര്യം അംഗീകരിക്കാനാവില്ലെന്ന് റഷ്യ വ്യക്തമാക്കി. ഖാംനഇയെ വധിക്കുന്നതിനോടുള്ള റഷ്യയുടെ പ്രതികരണം അങ്ങേയറ്റം നിഷേധാത്മകമായിരിക്കുമെന്നും ക്രെംലിന് വക്താവ് ദിമിത്രി പെസ്കോവ് പറഞ്ഞു. ഇറാനില് ഭരണമാറ്റത്തെ കുറിച്ചുള്ള വെറും സംസാരം തന്നെ ആര്ക്കും സ്വീകാര്യമായിരിക്കരുത്.
ഇറാന് പരമോന്നത നേതാവിന്റെ വധം തീവ്രവാദ മിശ്രിതത്തിന്റെ ആവിര്ഭാവത്തിലേക്ക് നയിക്കും. ഖാംനഇയെ വധിക്കുന്നതിനെ കുറിച്ച് സംസാരിക്കുന്നവര് ഇക്കാര്യം കൂടി പരിഗണിക്കണം. ഇറാനില് അമേരിക്ക ആണവായുധങ്ങള് ഉപയോഗിക്കുന്നത് വിനാശകരമായ സംഭവമായിരിക്കുമെന്നും ദിമിത്രി പെസ്കോവ് പറഞ്ഞു. ഖാംനഇയുടെ വധത്തെ കുറിച്ച് റഷ്യന് പത്രപ്രവര്ത്തകന് ഉന്നയിച്ച ചോദ്യത്തിന് മറുപടി നല്കാന് റഷ്യന് പ്രസിഡന്റ് വ്ളാഡിമിര് പുട്ടിന് വിസമ്മതിച്ചു. ഈ വിഷയം ചര്ച്ച ചെയ്യാന് പോലും ഞാന് ആഗ്രഹിക്കുന്നില്ലെന്ന് പുട്ടിന് പറഞ്ഞു.
ഇറാനുമായുള്ള നല്ല ബന്ധം കണക്കിലെടുത്ത് അമേരിക്കയുമായും ഇറാനുമായും ആശയവിനിമയം നടത്തി ഇസ്രായില്-ഇറാന് സംഘര്ഷത്തില് മധ്യസ്ഥത വഹിക്കാനുള്ള സന്നദ്ധത റഷ്യ അടുത്തിടെ അറിയിച്ചിരുന്നു. എന്നാല് ഉക്രൈനുമായുള്ള സംഘര്ഷം പുട്ടിന് ആദ്യം പരിഹരിക്കണമെന്ന് പ്രസ്താവിച്ച് യു.എസ് പ്രസിഡന്റ് ഡൊണാള്ഡ് ട്രംപ് ദിവസങ്ങള്ക്ക് മുമ്പ് റഷ്യയുടെ മധ്യസ്ഥതയെ പരിഗണിക്കാൻ തയ്യാറായില്ല.