വാഷിംഗ്ടണ്-അമേരിക്കന് പ്രസിഡന്റ് ഡോളാള്ഡ് ട്രംപിന് ബാലപീഡന കേസില് പങ്കുണ്ടെന്ന ആരോപണവുമായി സ്പേസ് എക്സ് ഉടമ ഇലോണ് മസ്ക്. ജെഫ്രി എപ്സ്റ്റൈന് ബാലപീഡന പരമ്പരയുടെ കേസ് റിപ്പോര്ട്ട് രഹസ്യമാക്കി വെച്ചിരിക്കുകയാണെന്നും അതില് പങ്കുള്ളതിനാലാണ് ഇത് എന്നും മസ്ക് എക്സില് കുറിച്ചു. ബിഗ് ബോംബ് എന്ന് വിശേഷിപ്പിച്ചാണ് മസ്ക് എക്സില് രംഗത്തെത്തിയത്. വലിയൊരു ബോംബ് പൊട്ടിക്കാനുള്ള സമയം എത്തിയിരിക്കുന്നു. എപ്സ്റ്റൈന് ഫയലില് ഡോണാള്ഡ് ട്രംപ് ഉള്പ്പെട്ടിട്ടുണ്ട്. അതുകൊണ്ട് മാത്രമാണ് പൊതു ഇടത്തിലേക്ക് ഫയലുകള് എത്താത്ത്..ശുഭദിനം നേരുന്നു…. ഇങ്ങിനെയായിരുന്നു മസ്കിന്റെ എക്സ് പോസ്റ്റ്.
ഭാവിയില് സത്യം പുറത്തുവരുമെന്നും ഈ പോസ്റ്റ് കുറിച്ച് വെച്ചോളൂ എന്നും മറ്റൊരു പോസ്റ്റില് അദ്ദേഹം പറയുന്നുണ്ട്. ആരോപണത്തിന് പിന്നാലെ പ്രതിപക്ഷമായ ഡെമോക്രാറ്റിക് പാര്ട്ടി രംഗത്തെത്തി. ഫയലുകള് പുറത്തുവിടണമെന്നും സംഭവത്തില് അന്വേഷണം വേണമെന്നും എഫ്ബിഐയോടും നീതിന്യായ വകുപ്പിനോടും അവര് ആവശ്യപ്പെട്ടു. അതിനിടെ ട്രംപിനെ ഇംപീച്ച് ചെയ്യണമെന്ന വാദത്തേയും മസ്ക് പിന്തുണച്ചിരുന്നു. ജെ.ഡി വാന്സിനെ പ്രസിഡന്റ് ആക്കണമെന്നും എക്സില് ഒരു ഉപയോക്താവ് കുറിച്ച പോസ്റ്റ് പങ്കുവെച്ച് മസ്ക് പിന്തുണ അറിയിച്ചിരുന്നു.
കൂടാതെ പുതിയ പാര്ട്ടിക്കുള്ള അഭിപ്രായ സര്വ്വേയുമായും മസ്ക് രംഗത്തുണ്ട്. 80 ശതമാനം വരുന്ന ജനങ്ങളെ പ്രതിനിധീകരിച്ചുകൊണ്ട് ഒരു രാഷ്ട്രീയപ്പാര്ട്ടി രൂപീകരിക്കുന്നതിന് സമയമായോ എന്ന ചോദ്യമാണ് അദ്ദേഹം ഉന്നയിച്ചത്. 81 ശതമാനം പേരും അതെ എന്നായിരുന്നു മറുപടി നല്കിയത്. 46 ദശലക്ഷം പേരാണ് പോസ്റ്റ് കണ്ടു. 30 ലക്ഷത്തോളം പേര് അഭിപ്രായവും രേഖപ്പെടുത്തി.