ഇറാന് ടോൾ നൽകിയാൽ കടുത്ത ഉപരോധം; അന്താരാഷ്ട്ര കപ്പൽ കമ്പനികൾക്ക് യു.എസിന്റെ കർശന മുന്നറിയിപ്പ്

​വാഷിംഗ്ടൺ: ഗൾഫ് മേഖലയിൽ ഇറാനെതിരെയുള്ള സാമ്പത്തിക, സൈനിക സമ്മർദ്ദം ശക്തമാക്കിക്കൊണ്ട് അന്താരാഷ്ട്ര ഷിപ്പിംഗ് കമ്പനികൾക്ക് കർശന മുന്നറിയിപ്പുമായി അമേരിക്ക. തന്ത്രപ്രധാനമായ ഹോർമുസ് കടലിടുക്കിലൂടെ കടന്നുപോകുന്നതിനായി ഇറാന് പണമോ ടോളോ നൽകുന്ന കമ്പനികൾക്കെതിരെ കടുത്ത യു.എസ് ഉപരോധം ഏർപ്പെടുത്തുമെന്നാണ് പുതിയ പ്രഖ്യാപനം. ​ലോകത്തിലെ ഏറ്റവും നിർണായകമായ ഊർജ്ജ ഇടനാഴിയായ ഹോർമുസ് കടലിടുക്കിലൂടെയാണ് ആഗോള എണ്ണ, വാതക വിതരണത്തിന്റെ അഞ്ചിലൊന്നും കടന്നുപോകുന്നത്. ഈ ജലപാതയുടെ നിയന്ത്രണത്തെച്ചൊല്ലി യു.എസും ഇറാനും തമ്മിലുള്ള തർക്കം നിലനിൽക്കുന്ന പശ്ചാത്തലത്തിലാണ് അന്താരാഷ്ട്ര കപ്പൽ വ്യൂഹങ്ങൾക്ക് യു.എസ് വിലക്ക് ഏർപ്പെടുത്തിയിരിക്കുന്നത്.
​
ഇറാന്റെ പ്രധാന വരുമാന മാർഗ്ഗങ്ങൾ തടയുക എന്ന ലക്ഷ്യത്തോടെയാണ് യു.എസിന്റെ ഈ നീക്കം. എന്നാൽ, പുതിയ നിർദ്ദേശം ആഗോള ഇന്ധന വിതരണത്തെയും അന്താരാഷ്ട്ര കപ്പൽ ഗതാഗതത്തെയും പ്രതികൂലമായി ബാധിച്ചേക്കുമെന്നാണ് സാമ്പത്തിക വിദഗ്ധർ വിലയിരുത്തുന്നത്.