തെല്‍അവീവ് – ഇന്നലെ വൈകീട്ട് തെല്‍അവീവില്‍ ഇറാന്‍ മിസൈല്‍ ആക്രമണം നടത്തുന്നതിന്റെ ദൃശ്യങ്ങള്‍ അടങ്ങിയ വീഡിയോ ഇന്ത്യന്‍ നാവിക സേനാ കപ്പലിലെ സൈനികര്‍ പകര്‍ത്തി പുറത്തുവിട്ടു. കിഴക്കന്‍ മെഡിറ്ററേനിയനിലെ അന്താരാഷ്ട്ര ജലാതിര്‍ത്തിയില്‍ വെച്ചാണ് ഇന്ത്യന്‍ സൈനികര്‍ വീഡിയോ ചിത്രീകരിച്ചത്. തെല്‍അവീവിനു മുകളിലൂടെ ബാലിസ്റ്റിക് മിസൈലുകള്‍ എത്തുന്നതും ലക്ഷ്യങ്ങളില്‍ പതിക്കുന്നതും രണ്ടിടങ്ങളില്‍ സ്‌ഫോടനങ്ങള്‍ നടക്കുന്നതും വീഡിയോയിലുണ്ട്. ഇസ്രായിലിലേക്ക് ഇറാന്‍ പുതിയ ബാച്ച് മിസൈലുകള്‍ വിക്ഷേപിക്കുന്നതിന്റെ ദൃശ്യങ്ങള്‍ അടങ്ങിയ മറ്റൊരു വീഡിയോയും പുറത്തുവന്നു. മിസൈലുകള്‍ തടയാന്‍ നിരവധി പ്രദേശങ്ങളില്‍ വ്യോമ പ്രതിരോധ സംവിധാനങ്ങള്‍ സജീവമാക്കിയതായി ഇസ്രായില്‍ അധികൃതര്‍ അറിയിച്ചു.
അതിനിടെ, ഇസ്രായില്‍ വ്യോമസേന തെഹ്റാനിലും ഇറാനിലെ മറ്റ് പ്രദേശങ്ങളിലും ഇന്ന് പുലര്‍ച്ചെയും ആക്രമണം നടത്തി. ആക്രമണത്തിന്റെ ഏഴാം ദിവസമായ ഇന്ന് ഇറാനില്‍, പ്രത്യേകിച്ച് തെഹ്റാനില്‍, നിരവധി ആക്രമണങ്ങള്‍ നടത്തിയതായി ഇസ്രായില്‍ സൈന്യം പറഞ്ഞു. ഇസ്രായില്‍ വ്യോമസേന നിലവില്‍ തെഹ്റാനിലും ഇറാനിലെ മറ്റ് പ്രദേശങ്ങളിലും തുടര്‍ച്ചയായ ആക്രമണങ്ങള്‍ നടത്തുകയാണെന്ന് സൈന്യം ടെലിഗ്രാമില്‍ അറിയിച്ചു.
ഇറാനിലെ അരക് ഹെവി വാട്ടര്‍ റിയാക്ടറിന് ചുറ്റുമുള്ള പ്രദേശം ഒഴിഞ്ഞുപോകണമെന്ന് ഇന്ന് ഇസ്രായില്‍ സൈന്യം പ്രദേശവാസികളോട് ആവശ്യപ്പെട്ടു. ആണവ കേന്ദ്രങ്ങള്‍ക്ക് സമീപമുള്ള ഇറാന്‍ ഗ്രാമങ്ങളായ അരക്, ഖന്ദാബ് എന്നിവിടങ്ങളിലെ താമസക്കാര്‍ ഒഴിഞ്ഞുപോകണമെന്ന് ഇസ്രായില്‍ സൈന്യം ആഹ്വാനം ചെയ്തു. ഇവിടങ്ങളില്‍ ആക്രമണങ്ങള്‍ ആസന്നമാണെന്ന് സൈന്യം പറഞ്ഞു.
അതേസമയം, ഇസ്രായിലിന് നേരിട്ടുള്ള സൈനിക സഹായം നല്‍കുന്നതിനെതിരെ റഷ്യ അമേരിക്കക്ക് മുന്നറിയിപ്പ് നല്‍കി. ഇത്തരമൊരു നടപടി മിഡില്‍ ഈസ്റ്റിനെ അസ്ഥിരപ്പെടുത്തും. ഇസ്രായിലിന് നേരിട്ടുള്ള സൈനിക സഹായം നല്‍കുന്നതിന് എതിരെ ഞങ്ങള്‍ അമേരിക്കക്ക് മുന്നറിയിപ്പ് നല്‍കുന്നു – റഷ്യന്‍ വിദേശ മന്ത്രാലയം പറഞ്ഞു. ഇസ്രായിലിന് നേരിട്ടുള്ള യു.എസ് സൈനിക സഹായം മിഡില്‍ ഈസ്റ്റിലെ സ്ഥിതിഗതികള്‍ സമൂലമായി അസ്ഥിരപ്പെടുത്തുമെന്ന് റഷ്യന്‍ ഡെപ്യൂട്ടി വിദേശ മന്ത്രി സെര്‍ജി റിയാബ്‌കോവും മുന്നറിയിപ്പ് നല്‍കി. റഷ്യ ഇസ്രായിലുമായും ഇറാനുമായും ബന്ധപ്പെടുന്നുണ്ടെന്നും അദ്ദേഹം കൂട്ടിച്ചേര്‍ത്തു.
ബുധനാഴ്ച യു.എസ് പ്രസിഡന്റ് ഡൊണാള്‍ഡ് ട്രംപ് തലസ്ഥാനം വിടാന്‍ ആഹ്വാനം ചെയ്തതിനെ തുടര്‍ന്ന് ആയിരക്കണക്കിന് ആളുകള്‍ തെഹ്റാനില്‍ നിന്ന് പലായനം ചെയ്തു. ഇറാന്‍ ആണവ കേന്ദ്രങ്ങള്‍ ആക്രമിക്കുന്നതില്‍ ഇസ്രായിലിനൊപ്പം ചേരുന്നത് ഉള്‍പ്പെടെയുള്ള ഓപ്ഷനുകള്‍ ട്രംപ് പരിഗണിക്കുന്നുണ്ടെന്ന് ബന്ധപ്പെട്ട വൃത്തങ്ങള്‍ പറഞ്ഞു. ഇറാന്‍ നിരുപാധികമായി കീഴടങ്ങണമെന്ന് യു.എസ് പ്രസിഡന്റ് ആഹ്വാനം ചെയ്തിട്ടും ഇറാനും ഇസ്രായിലും ആക്രമണങ്ങള്‍ തുടരുകയാണ്.